Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ’’لمز‘‘ وچ سلطان باہوؒ ، ہوراں بارے لیکچر

’’لمز‘‘ وچ سلطان باہوؒ ، ہوراں بارے لیکچر

زاہد حسن
April 10th, 2017

لاہور یونیورسٹی آف مینجمنٹ سائینسز وچ، گُرمانی مرکزِ زبان و ادب دے پربندھ نال سلطان باہوؒ دی شخصیت تے شاعری دے حوالے نال اِک لیکچر دا اہتمام کیتا گیا۔ لیکچر پروفیسر سید احمد سعید ہمدانی ہوراں دتا جہیڑے سلطان باھوؒ ہوراں بارے ’’ احوال و مقامات حضرت سلطان باھوؒ ‘‘ سمیت کئی ہور کتاباں دے لکھیار نیں۔ ایہہ ہک بھرواں لیکچر سی جیہدی تطامت پروفیسر معین نظامی ہوراں کیتی۔ ایس پروگرام وچ سابق چیف جسٹس آف پاکستان جواد ایس خواجہ‘ ہوراں خاص طور تے شرکت کیتی۔ پروفیسر سید احمد سعیدہمدانی ہوراں اپنے لیکچر نوں دو حصیّاں وچ ونڈیا۔ پہلے حصّے وچ اوہناں سلطان باہوؒ ہوراں دی ذاتی زندگی بارے چانن پاندیاں دسیا جو صاحبزادہ حامد سلطان ہوراں اوہناں دی زندگی بارے اک بہت اہم کتاب ’’ مناقبِ سلطانی‘‘ لکھی ہے۔ ایس کتاب توں سلطان باہوؒ ہوراں دی شاعری، فکرو فن توں وکھ اوہناں دے وڈکیاں بارے وی جان کاری ملدی ہے۔ اوہناں دسیا جو سلطان باہوؒ ہوراں دے دادا دا مزار خوشاب دے مشہور قصبے ’’ انگہ‘‘ وچ ہے جدوں آپ دی عمر حالے تن چار ورھے ای سی تاں اوہناں دی وفات ہو گئی سی۔ اوس پچھوں اوہناں دی تعلیم و تربیّت تے پرو رش اوہناں دی والدہ نے کیتی جو بہت محنتی، مُتقیّ تے پرہیز گار خاتون سن ۔آپ نے اپنی والدہ دی بہت زیادہ تعریف کیتی ہے۔
تواریخ توں پتہ چلدا ہے جو جدوں سلطان باہوؒ ، ہوراں دی عُمر30 ورھے سی تاں اورنگ زیب تے دارا شکوہ وچکار جنگ وی ہوئی سی۔ اوہناں دسیا جو اک ہور غلط فہمی دا دُور ہوونا وی لازمی ہے جو اوہناں دِیاں لکھیاں کتاباں دی گنتر ی عام طور تے 134 دسی جاندی ہے پر اوہ 33 یاں 34 توں ودھ نہیں۔ اوہناں فارسی وچ شاعری وی کیتی تے نثر وی لکھی پر جس شئے نے اوہناں دی ہستی نوں دوام بخش دتا اوہ اوہناں دی پنجابی شاعری ہے۔ اوہناں سی حرفیاں دی صورت وچ پنجابی بیت لکھے جو اج وی پنجاب بھر وچ ہرتھاں پڑھے تے سُنے جاندے نیں‘ ہر شعردے اخیر تے لفظ ’’ہُو ‘‘ دا وادھاکر کے اوہدے وچ اک خاص طرح دا سرور تے لُطف پیدا کر دتا۔ اوہناں اپنے بیتاں وچ لوکل امیجری ورتی جیہدے راہیں اوہناں دی شاعری وچ حُسن تاں پیدا ہویا ای پر اوس نوں ابدیت وی حاصل ہو گئی۔ جدوں کہ اوہناں دیاں تصنیفات دا مطالعہ کرن توں پتہ چلدا ہے جو اوہناں قدیم فارسی ادب تے شاعری دا ڈونگھا مطالعہ کر رکھیا سی۔ مجموعی طور تے ایہہ اک ودھیا لیکچر سی جیہدے وچ حاضرین تے طلباو طالبات دی وڈی تعداد شریک ہوئی۔
ایس سلسلے دا اگلا لیکچر لمز لائبریری وچ 14 ۔اپریل نوں شامیں چار بجے بُلھے شاہ بارے ہووے گا۔ بلھے شاہ بارے گل بات اقبال قیصر ہوریں کرن گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels