Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بند کردیو

بند کردیو

جاوید بُوٹا
April 4th, 2017

سرکار نوں اوہناں وچارے غرِیباں مسکِیناں دی منگ منن وِچ کیہ حرج اے۔ اوہناں دی جان وی سُکھالی ہووے گی وچاریاں نوں وار وار وکھالے کرن دی کھیچل نہیں کرنی پئے گی۔ سرکار دی اپنی ہڈ حرامی وی ڈھکی لُکی رہے گی تے ذمے واری دے بھار توں وی جان چُھٹی رہے گی۔ اِنٹر نیٹ بند کرن لئی بس پلگ کِھچ کے، اِک بٹن نپ کے جاں پھیر تار کٹ کے کم سر جائے گا۔ ایہہ کم تاں اِک نیانے توں وی کروایا جا سکدا۔ نہیں تاں اِنٹر نیٹ توں گُستاخاناں مواد ہٹاؤن لئی ذمے وار پڑھے لِکھے ایماندار محنتی عملے دی لوڑ کِیویں پُوری ہووے گی جیہڑا اِنٹر نیٹ دی پھولا پھالی کر کے مواد لبھے۔ اوہدی عِلمی اَتے دھرمی پدھر اُتے چھان چھٹ کر کے پک کرے کہ اوہ سچی مُچی گُستاخاناں مواد اے۔ پھیر اوہ مواد سرکاری وڈیریاں موہرے رکھے اوہناں توں اجازتاں دی اُڈیک کرے۔ ہری جھنڈی مِلے تاں اوہنوں ہٹائے۔ پر گُستاخی کرن والیاں تاں مُڑنا نہیں۔ تُسی اینی کھیچل کرن بعدوں گُستاخاناں مواد ہٹاؤ گے اَتے اوہ پلاں وِچ پھیر اِنٹرنیٹ اُتے نواں مواد تھپ دین گے۔ پھڑِیچنے ہے کوئی نہ ۔ خبرے دُنیا دی کِیہڑی نُکرے لُکے بیٹھے اپنا کم کردے نیں۔ تُسی اینی کھجل خواری تے محنت نال ہڈ بھن کے مواد ہٹاؤ اَتے اوہ پھیر تھپ دین گے۔ تُسی ہٹاؤندے جاؤ اوہ تھپدے جان۔ اوہ جِیوں 1950 دے دہاکے دی اِک فِلم اے جِیہدے وِچ اﷲ بخشے ظریف مرحوم اِک بندے نوں منجی چُکوا کے تھاں تھاں پِھردا لوکاں دے جھگڑے نبیڑدا اے۔ اوہ ماما جی دی عدالت دے ناں توں اپنے علاقے دے پِنڈاں وِچ مشہور ہوندا اے۔ اِک تھاں اِک زنانی دانے بُھنن والی بھٹھی بناؤنا چاہوندی اے تے دوجا اوتھے نہیں بنن دینا چاہوندا۔ ماماجی دی عدالت دا ایہہ فیصلہ کئی ورہے گھر گھر گلی گلی پِنڈ پِنڈ سُنایا جاندا رہیا سی۔ ماماجی دی عدالت دا فیصلہ سی، ’توں بھٹھی بنائی جا اَتے توں بھٹھی ڈھائی جا۔‘ خیر اُتوں مردم شماری دا کم وی چالو اے ہزاراں دے حساب نال سرکاری عملہ تے فوجی جوان ایس کم وِچ رُجھے ہوئے نیں۔ سرکار دا اپنا بھار وی ہولا ہو جائے گا۔ ماماجی دی عدالت والے پھیر توں وی بچا رہووے گا۔ ایس لئی بہتر اے اِنٹر نیٹ دا مکُو ای ٹھپ دِتا جائے۔ ’نہ رہے گا بانس، نہ وجے گی بانسری۔‘
ویکھیا جائے تاں ایس کم دا بڑا وڈا تے کامیاب تجربہ وی ہے سرکار نوں۔ اوہدی ورتوں کیوں نہ کِیتی جائے۔ ’بسنت‘ دا وی تے مکُو ہڈحرامی تے نالائقی پاروں ای ٹھپیا گیا اے نا۔ بھئی کیہڑا کوٹھیاں تے گُڈی اُڈان والیاں دی ڈور دی پڑتال کرے۔ تھاں تھاں تے ڈوراں لاؤن والے اڈیاں تے جا کے چھاپے مار کے پرکھ کِیتی جائے کہ دھاگے دی ڈرو پئے بناؤندے نیں جاں کوئی پلاسِٹک دِیاں مچھِیاں پھڑن والی ڈوری اے، ایہدے اُتے روایتی مانجھا اے جاں کِسے کیمیکل دا رلا وی اے ایہدے وِچ ۔ گُڈی ڈور ویچن والِیاں ہٹِیاں اُتے چھاپے مارے۔ سختی کِیتی جائے۔ کرڑِیاں سزاواں دِتیاں جان۔ نوٹ نہ کمائے جان۔ رعائت نہ کِیتی جائے۔ لوکاں نوں سُچیت کِیتا جائے.......۔
پر دماغ پِھریا اے کِسے دا کہ اوہ اینی مُشقت کرے۔ سوکھا طریقہ ’بند‘ دا ٹھپا۔ چُھٹی...... بسنت دے دھاڑے دے نال گُڈی بازی وی ٹھپی گئی۔
کئی وار افغانِستان دا باڈر بند کرن دا وی تجربہ اے بھاویں نِکا نِکا اے۔
دو گُروپاں دے جھگڑے بعدوں پنجاب یونیورسٹی بند کرن دے تجربے۔
اگوں توں ایہناں نِکے موٹے تجربیاں دی ورتوں وی لازمی ہونی چاہیدی اے۔ جے پھیر کدے کھوتے دا جاں ایہو جیہے ہور جانور دے گوشت وِچن دی سچی جُھوٹھی اوائی اُڈے تاں کِسے قِسم دی پرکھ پڑچول دی کھجل خواری توں بچن لئی، بُچڑ خانے بند۔ قصائیاں دِیاں ہٹِیاں بند۔ گوشت دا کاروبار بند۔
تجربیاں دی چھتر چھاویں، ٹُٹی بھجی گندی سڑک جاں گلی، صفائی جاں مرمت کروان دے سیاپے توں بچن لئی بند۔
ڈاکٹر حکِیم توں روگی ول نہیں ہوندا تاں سوکھا اتے ’شارٹ کٹ‘ راہ اوہدا ساہ بند کر دیو۔ ساتھوں کوئی شئے ٹِھیک نہیں ہوندی، سِدھی پدھری نہیں ہوندی جاں اسیں کرنا ای نہیں چاہوندے۔ محنت کرنی پیندی اے، سوچ وچار کرنا پیندا اے۔ ذمے واری مندیاں ایمانداری نال مُشقت کرنی پیندی اے۔ ناکامی دی پِیڑ سہنی پیندی اے۔ ایہناں نِکے وڈے سیاپیاں دی ایس ساری کھجل خوای توں بچن لئی اِکو ای دارُو اے، تِناں حرفاں دا اِک نِکیا جیہا لفظ ’بند‘
اِنٹر نیٹ ’بند‘......
بارڈر ’بند‘......
سکول ’بند‘......
گوشت ’بند‘......
ساہ ’بند‘.......
’بند‘...... ’بند‘......’بند‘...... ایہہ تِناں حرفاں دا نِکیا جیہا لفظ...... واہ.......
ہِنگ لگے نہ پھٹکڑی، رنگ چوکھا.................


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels