Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کینڈین ایمبسی وچ ڈھاہاں پرائز بارے اکٹھ

کینڈین ایمبسی وچ ڈھاہاں پرائز بارے اکٹھ

زاہد حسن
March 27th, 2017

جیویں بُہت سارے دوست جاندے نیں جو پچھلے ورھے میرے ناول ’’تسی دھرتی‘‘ نوں پنجابی دا سبھ توں وڈا ایوارڈ ڈھاہاں پرائز (کینڈا) دتے جاون دا اعلان ہویا سی۔ ڈھاہاں پرائیز کینڈا توں ای دتے جاون والے ہک ہور ایوارڈ’’ گِلر پرائیز‘‘ دے برابر ہے تے اجہے ایوارڈ دا ملناں کسے وی پنجابی فکشن رائٹر لئی وڈے مان دی گل ہے۔ یونیورسٹی آف برٹش کولمبیا نال مِل کے دتے جاون والے ایس ایوارڈ دے جیتو نوں کینڈا بلایا جاندا ہے۔ میں کسے وجہوں اوتھے نہیں اپڑ سکیا، تاں برج ایس ڈھاہاں ہوراں مینوں ایوارڈ دی شیلڈ دین لئی اسلام آباد وچ کینڈین ہائی کمیشن وچ اک اکٹھ دا پربندھ کیتا۔ کینڈین ہائی کمشنر ولوں ہوئے25 مارچ2017ء دے ایس اکٹھ وچ کینڈا توں برجندر ڈھاہاں‘ ہریندر کور ڈھاہاں توں اڈ پنجابی ادبی بورڈ دی پردھان پروین ملکدے نال نال بابا نجمی، اقبال قیصر، راجہ صادق اللہ، نین سکھ، زبیر احمد، ثمینہ اسما، قاضی جاوید، ظہیر وٹو، شبنم اسحق، علی انور احمد، کرامت مغل، احمد نواز الغنی، نصیر احمد،محمود اعوان، یوسف پنجابی، آسیہ اکبر، عباد نبیل شاد، علی عثمان باجوہ، ہیتم تنویر اکرم، خالد فرہاد دھاریوال، ملک مہر علی، سعید احمد، طارق بھٹی، ارشد وحید، عرفان احمد عرفی، عامر بٹ، توحید چٹھہ، اظہر محمود چوہدری، وسیم گردیزی، علی اعجاز تے ہور سجناں متراں رلت کر کے ایس اکٹھ نوں یادگار حیثیت دے دتی، ہورے کسے وی ایمبیسی وچ پنجابی دے حوالے نال ہون والی ایہہ پہلی تقریب سی، جہدے وچ کینڈین ہائی کمشنر ہوراں دے ساتھی اینڈریوٹرنر نے اپنے وچار سانجھے کردیاں ایہہ دسیا جو اوہناں نوں پنجابی دے حوالے نال ایہہ تقریب کر کے تے پنجابی شاعراں ادیباں نوں مِل کے وڈی خوشی ہوئی ہے۔ کینڈا وچ پنجابی تیجی وڈی زبان ہے تے ساڈے من وچ ایہدی بہت زیادہ قدر ہے۔ اکٹھ نال برج ایس ڈھاہاں دے نال نال کجھ ہور سجناں نے وی اپنے وچار سانجھے کیتے۔
مڈھلے طور تے ایہہ اکٹھ مینوں شیلڈ دین لئی کیتا گیا سی سو میں وی گل کرنی سی جو کہ میں لکھ کے لے آیا ہویا آہا پر پڑھن دا ماحول نہیں سی تاں میں گل بات کردیاں کیہا پنجابی زبان اپنی تواریخی پچھوکڑ وچ اجیہا تہذیبی تے رہتلی سرمایہ رکھدی ہے جہدے وچ ناول تے کہانیاں لکھن آسطے ان گنے تے ان ملے رنگ موجود نیں۔ اُکّا ایہدے وچ لکھن تے اوہناں نوں دنیا تیک اپڑان دی لوڑ ہے۔ دنیا، آون والے لمیاں سمیاں تیک جیہناں دا آنند مان سکدی ہے۔ ہن تیک پنجابی وچ لکھے فکشن وچ حالے اوہدا دسواں حصہ وی بیان نہیں ہو سکیا۔ ہر شئے نال جہان دا جُڑیا ہک راز ہوندا ہے۔ انج ای زبان دی وی ہک راز ہے اتے پنجابی اپنے راز اپنے بھیت ہولے ہولے کھول رہی ہے۔ رازاں تے بھیتاں نوں سمجھن آلے ایہدے الوں ہوندی کنسو تے اپنا دھیان پئے دیندے نیں۔
پنجابی زبان نے اپنی سمجھ توں پہلی بھیت بانی ڈھاہاں پریوار تے کھولی ہے۔ ڈھاہاں پرائیز، نے پنجابی دے ناویں نوں عالمی پدّھرتیک لے آندا ہے۔ ایہہ ہک وڈا کم ہے جو پہلی واریں ہویا ہے ۔میرا ایمان ہے جو ہک ایہہ ایوارڈ پنجابی زبان دی تواریخ، اجوک تے بھلک تے اوہدے نال جُڑے مسئلیاں نوں کھولن تے حل کرن وچ ویہونا چاہیداہے۔فکشن لکھن آلیاں نوں ایہدی نوعیت سمجھن تے جی جان نال اپناں کم اگے ودھان وچ جُپ جان دی لوڑ ہے۔ حقّی گل ایہہ ہے جو کسے وی زبان دی وڈیائی اوہدیاں لوک کہانیاں تے لوک داستاناں وچ لُکی ہوندی ہے۔ لاطینی امریکی ملکھاں دے لکھیاراں بورخیس، مارکیز، رُلفوتے ہورس لکھن آلیاں دیاں لکھتاں ایہدیاں گواہ نیں۔
ڈھاہاں پرائیز پنجابی فکشن لکھیاراں نوں عالمی پدّھر تے فکشن بارے ہوری گل بات دے مُدّے وچ اوہناں دی رلت نوں یقینی بنا رہیا ہے۔ میں ایس گل دا احساس اپنے دوجے فکشن لکھیاراں نوں وی دِواوناں چاہنداں ہاں پئی اوہ اگے آون کہانیاں تے ناول لکھن تے ایس سانجھ نوں بنائی رکھن۔ پنجابی زبان اینی امیر ہے اپنے ورثے پکھوں لوک داستاں لوک شاعری تے اپنی تہذیبی پچھوکڑ وجہوں بہت گھٹ خطّے تے زباناں نیں جو پنجابی دا مقابلہ کر سکن۔ اسیں لوک داستاں نوں ای کہانیاں دا موضوع بنا لیئے تاں اوہی نہیں مکن گیئیاں۔
اخیر وچ میں ڈھاہاں پرائیز کمیٹی ‘برج ایس ڈھاہاں‘ ہریندر کور ڈھاہاں تے کینڈین ہائی کمشنرتے اوہناں دے سنگیاں دا شکر گزار ہاں، تے آس رکھداں جو ایہہ سلسلہ انج ای چلدا رہے گا۔!


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels