Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> دُعاواں

دُعاواں

جاوید بُوٹا
March 26th, 2017

جاوید آفریدی ہوراں قوم اُتے اِک ہور بھار لدھ دِتا اے۔ اوہناں قوم اگے بینتی کِیتی اے کہ سارے رل کے دُعا منگو تانجے ڈیرل سیمی اِسلام قبُول کر لئے۔ پہلاں پاکِستانی کِرکٹ ٹِیم نوں میچ جِتاؤن لئی گھٹ دُعاواں منگنیاں پیندِیاں سن جو ہُن ڈیرل سیمی نوں اِسلام قبُول کرن لئی وی دُعاواں منگن۔ ویسے تاں ہڈحراماں وانگ سانوں عادت پئے گئی اے ہر اِک کم دُعاواں راہیں پُورا کرن دی۔
جے کر جاوید آفریدی ہوراں دی خواہش تے قوم دِیاں دُعاواں قبُول ہو گئیاں، ڈیرل سیمی نے اِسلام قبُول کر لیا تاں پھیر قومی کرِکٹ ٹِیم دا حوصلہ وی ودھ جائے گا تے اوہ کرِکٹ کھیڈن دے نال نال پارٹ ٹائم اِسلام دے پرچار دی ذمہ واری سنبھال کے تبلِیغی جماعتاں اَتے مولوِیاں دا بھار وی ہولا کرن وِچ اوہناں دا ہتھ ونڈاؤناں شُروع کر دئے گی۔ ویسے تاں ایہہ کم اوہناں ’یوسف یوحنا‘ (مُحمدیوسف) توں ای شُروع کر دِتا ہویا اے۔ پر ویکھیا جائے تاں اوہ ’ گھر دی مُرغی دال برابر‘ والا کم لگدا سی۔ اصل کم تاں ڈیرل سیمی والا اے، T 20 دا ورڈ کپ جِتی ہوئی ویسٹ اِنڈیزی کِرکٹ ٹِیم دا کُپتان، اوہ کُپتان جیہڑا پاکِستان سُپر لِیگ دی جِتی ہوئی ٹِیم دا کُپتان وی ہووے۔ لگدا اے جاوید آفریدی ہوراں دی جانکاری کِرکٹ سٹیڈیم دی ولگن توں باہر نہیں۔ بھئی ڈیرل سیمی تاں کرِکٹ ٹیم دا کُپتان اے، پھیر اوہ وی کالا۔ کرِکٹ سٹیڈیم توں باہر دُنیا دے سٹیڈیم وِچ اِک ہور کُپتان وی ای۔ جیہدے ہتھ وِچ ڈاڈھا بھارا بلّا اے۔ اوہ گورا وی اے۔ اوہدا ناں اے ڈونلڈ ٹرمپ۔ آفریدی جی اوہدے بارے وی سوچو، دھیان کرو۔ اوہدے بارے اِنٹر نیٹ اُتے وائرل ہوئی اِک ویڈیو خبرے تُساں نہیں ویکھی۔ ’کندھ اُتے لگی سُنہری فریم وِچ جڑی ہوئی خانہ کعبہ دے دوالے طواف کردی خلقت دی تصویر،‘ ٹرمپ ہوریں اپنے نال کھلوتے ہوئے بندیاں نوں وکھاؤندے کُجھ ایسطرحاں آکھ رہے نیں،’ ویکھو امن دا سُمندر۔‘ آفریدی جی رُک جاؤ، رُک جاؤ، اُتاولے نہ ہونا۔ ہو سکدا اے ایہہ نقلی وِیڈیو ہووے، اوس ایکٹر دی جیہڑا ڈونلڈ ٹرمپ دی نقل کردا اے۔ تُسی حالے سٹیڈیم وِچ ای رہ کہ قوم دی دوعاواں نوں ڈیرل سیمی اُتے ای ازماؤ۔ قوم اپنی دُعاواں نال اپنے بھیڑے نصِیب تاں نہیں بدل سکی، ہوسکدا اے ساری قوم دِیاں دُعاواں نال اِک بندے دا نصیب بدل جائے اتے تُہاڈی خواہش وی پُوری ہوجائے۔ پھیر مُحمد عرفان، خالد لطِیف، شرجِیل خان، شازیب حسن، ذولفقار بابر دے نال سیمی نے بتھیرا ویلا ہنڈایا اے۔ ایہناں پنجاں مثالاں نوں مُکھ رکھدیاں ہوسکدا اے سیمی مسِیت ول ٹُرن دی تھاں دوڑن لگ پوّے۔ قوم نوں تاں دُعاواں منگن دی عادت اے۔ اوہنے تاں دوعاواں منگنِیاں ای منگنِیاں نیں۔ پہلاں تُسی آپ ای بھورا کُو ہمت کر کے اپنی ٹِیم دا ناں مُسلمان کر لؤ۔ زلمی دے نال اسلامی دا وادھا کر لؤ ’پشاور اسلامی زلمی‘۔ اکھان اے، ’’خربُوزے نوں ویکھ کے خربُوزہ رنگ پھڑدا اے‘‘ تُہاڈے ورگے باقی دے چار نِکیاں خربُوزیاں توں اڈ وڈے خوبُوزے وی جِیویں ’پی. سی. بی‘، پاکِستاں اسلامی کرِکٹ بورڈ اتے ’پی. ایس. ایل‘ پاکِستان اسلامی سُپر لِیگ‘ دے رنگ وِچ رنگے جان گے۔
خیر چھڈو ایس ساری بحث نوں آفریدی جی۔ ڈیرل سیمی دے اِسلام قبُول کر لین پاروں بتھیرے فیدے ہون گے۔ پھیر طالبان تے مولوی حضرات وی خوشِیاں مناؤن گے کہ غیر مُسلماں نوں مُسلماناں دے ویڑھے وِچ واڑن لئی اِک ہور بُوہا کُھل گیا اے۔
پر آفرِیدی جی، فیدے تے خوشِیاں توں اڈ، اِک گل وِچار جوگ اے۔ اِک پاسے تاں تُساں اِک غیر مُسلم نوں مُسلماناں دی ولگن وِچ ولن لئی پُوری قوم اگے دُعا کرن دی بینتی کِیتی اے، اَتے دوُجے پاسے بنُوں وِچ نوکرِیاں لئی چھپے اِک اِشتہار نے شیعہ برادری نوں مُسلماناں دے ویڑھے وِچوں باہر دھک کے غیر مُسلماں دے مُحلے وِچ واڑ دِتا اے۔ خبرے ایس اشتہار وِچ کوئی بُھل چُک ہوئی اے جاں تُہاڈے خِلاف کوئی کٹھ جوڑ اے؟ جاں پھیر ایہہ اِشتہار ’’بارش کا پہلا قطرہ‘‘ ........؟


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels