Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سا رے گا ما پا

سا رے گا ما پا

جاوید بُوٹا
March 13th, 2017

پھڈا پاؤن والیاں نوں جاں پنگا لین والیاں نوں کِسے پج دی لوڑ نہیں ہوندی اوہ پج گھڑن دے ماہر ہوئے ہوندے نیں۔ اِنڈیا وِچ سنگِیت دے اِک ٹیلنٹ شو سا رے گا ما پا وِچ اِک مُسلمان کُڑی نے حجاب پا کے بھجن کیہ گا دِتا کہ ’مینگلور مُسلمز‘ ناں دے دھرمی ٹھیکیداراں دے اِک گرُوپ نے حجاب دی بے عزتی دے خِلاف جھنڈا چُک لِتا اے۔ اوہناں اوس کُڑی اُتے اِلزام لایا اے، بھئی حجاب پہن کے بھجن گان پاروں مُسلماناں دی ساکھ نوں نُقصان اپڑایا اے۔ مُسلم براداری نال غداری اے۔ گانا، اَتے اوہ وی حِجاب پہن کے۔ جے توں حجاب دا آدر مان نہیں کر سکدی تاں حجاب پہننا چھڈ دے۔ اوہناں ایہہ وی آکھیا اے کہ ایہہ ٹی. وی. پروگرام وی غیر اسلامی ای۔ جے اوہنے مرداں موہرے گانا ای اے تاں حجاب پہننا چھڈ دیووے۔ حیرانی دی گل ایہہ اے کہ حالے تائیں ایہناں ٹھیکیداراں دی حمایت وِچ کِسے ہور پاسیوں کوئی آواز نہیں آئی..... شُکر اے۔ بلکہ سوشل مِیڈیا اُتے ایہدے خِلاف اِک دو لوکاں آکھیا اے کہ ایہہ تاں لوکاں وِچ پاڑ پاؤن والی گل اے۔ بے شُمار مُسلمان گاؤن والیاں بھجن گائے نے اَتے ہِندواں سِکھ نے نعتاں تے قوالِیاں گائیاں نیں۔
گل تاں ایہناں سوا سولاں آنے ٹھیک ای آکھی اے بھئی ایہہ اِک خوامخوہ دا پواڑا کھڑا کرن والی گل اے کہ حِجاب نال سِر ڈھک کے بھجن نہ گاؤ تے متھے تِلک لا کے بُلّھے شاہ، مِیاں مُحمد بخش جاں سُلطان باہُو دا کلام نہ گاؤ۔
سوچن والی گل اے جے حِجاب نال بھجن گاؤن پاروں حِجاب دی بے عزتی اے پھیر تاں انگریزی بولن، دفتراں وِچ کم کرن، موبائل فون جاں کمپوٹر دی ورتوں نال وی حِجاب دا آدر مان خراب ہوندا ہووے گا؟ ایس لئی آپ سِر کھپاؤن توں بہتر اے جو ’مینگلور مُسلمز‘ گرُوپ والیاں موہرے ای بینتی کرنی چاہیدی اے کہ اوہ فتویٰ جاری کر دین جیہدا ناں ہووے ’حِجاب فتویٰ‘ ۔
مہر بانی کر کے ایس فتوے دے نال اِک فہرِست وی جاری کر دین کہ حجاب پہن کہ کیہڑے کیہڑے کم جائز نے تے کیہڑے کیہڑے ناجائز، تاں جے کُل مُسلماناں دا بھلا ہووے۔ اوہناں دی ساکھ نوں لِیک نہ لگے۔ اپنی برادری نال غداری کرن توں بچدیاں حِجاب دے آدرمان نوں قائم رکھن وِچ کوئی کوتاہی نہ کرن۔
****


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels