Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> لائلپور پنجابی سلیکھ میلہ 2017: دُھکدی رہی تے مچ وی پووسی

لائلپور پنجابی سلیکھ میلہ 2017: دُھکدی رہی تے مچ وی پووسی

March 6th, 2017

14فروری دی دوپہریں فقیر،عامرریاض،عرفان ملک،نین سُکھ تے امداد حُسین میری آٹو کار وچ رمکے رمکے لائل پور سلیکھ میلے لئی اپڑ گئے۔آوندے دو دن آساں اوتھے ہی لنگھانے سن۔اساں گورمنٹ کالج یونیورسٹی دے ’گسٹ ہاؤس‘ وچ رہے تے عامر بٹ تے توحید چٹھا نے پروہنا چاری وچ کوئی گھاٹا نہ آون دتا۔ پھگن دا پوند سی تے ورھے دے سبھ توں سوہنے دن۔دنے دُھپ نال ہوا وگدی سی تے رات نوں ٹھنڈ ہوجانی۔
ایتکی میں ایہہ گل پکا کے آیا ساں پئی وچار لئی سارے اکٹھاں دا بھرواں ویروا دیا ں گا۔ ایس لئی میں ڈھیر نوٹس لئے جیہدی پہلی لڑی حاضر اے۔
لائلپور سلیکھ میلے دا پہلا اکٹھ سجناں دی جانکاری لئی تے مُکھ وکھالی سی جس دے اُچیچے پروہنے لائلپور جی سی یونیورسٹی دے وائس چانسلر ڈاکٹر محمدعلی سن۔عامربٹ نے گل بات کردیاں آکھیا سوال ایہہ اے پئی اسیں ایہہ میلہ کیوں کرنے آں؟اوہناں دسیا ایہہ میلہ کران دا مقصد پنجابی زبان،رہتل نوں نوجواناں نال جانکاری کرانا اے۔جیہڑے بھلیکھے پائے جاندے نیں اوہناں نوں دور کرنا اے۔شوشل میڈیا وچ ایہہ گل نہیں کیتی جاندی۔اسیں ایس میلے راہیں وچار وٹاندرا کرنا چاہندے آں۔
توحید چٹھا ہوراں اپنی ڈھانی ققنس دی گل کیتی۔اوہناں بیتے نوں سمجھن تے آوندے نوں جانن دی گل کیتی۔ہن سرمایہ داری دا ات ہویا پیا اے۔اسیں اپنے سماج نوں کیویں لے کے چلنا اے۔اک اجیہا سانجھا پلیٹ فارم بنائیے جتھے اپنے حوالے نال لکھیا جا سکے۔اوہناں لائلپور دی پنجاب دی وار وچ خاص تھاں ہوون دی گل کیتی۔ایہہ پورے پنجاب وچ کسان لہر دا مرکز سی۔1907 دی مقامی لہر ایتھوں چلی،سردار اجیت سنگھ،بھگت سنگھ ایتھوں دے سن۔پھیر اجوکے لائلپور وچ فضل حُسین راہی وی ایتھوں دا سی۔جٹ دی کرتوت وی ایتھوں لکھیا گیا۔اسیں وی اگے دی پیڑھی جوڑدے پئے آں۔سانوں سبھ شیواں سمجھن دی لوڑ اے۔گلوبل ازم دے جیہڑے ہتھیار نیں اوہناں نوں اسیں کیویں ورتنا اے؟
امریکا واسی عرفان ملک ہوراں نوں گل بات دا اُچیچا سداّ دتا گیا۔ اوہناں دسیا پنجابی وچ بوہتا حصہ مسلماناں دا سی۔ہن اسیں اپنی بولی نوں سابنھنا تے سنوارنا اے۔ اوہناں اپنی اک نظم وی سُنائی جیہڑی بولی بارے سی۔
پروفیسر محمدعلی وائس چانسلر جی سی یو آکھیا ایہہ بڑی خُشی دی گل اے ایتھے اجیہے لوک موجود نیں جیہناں نوں پنجابی نال دلچسپی اے تے ایس دا ودھا چاہندے نیں۔اساں پنجابی زبان تے پنجاب نوں اوہ اہمیت نہیں دتی جیہڑی دینی چاہیدی سی۔جس طراں پختون پشتو تے سندھی سندھ اُتے فخر کردا اے کیہ اسیں وی کردے آں؟جیہڑے سفید پوش نیں اوہناں فیشن بنا لیا اے،اساں بالاں نال اُردو یاں انگریزی وچ گل کرنی اے۔جنی سوہنی پنجابی بولی اے ہور کوئی وی نہیں۔میری ماں فیصل اباد دی سی ۔اساں نوکراں کولوں پنجابی سکھی۔عقل تے سیانپ پنڈ وچ وی ہوندی اے۔نوکراں نے سانوں رہتل نال جوڑیا ،ایہہ ہونا نہیں چاہیدا سی۔سانوں اُنج ای اپنے لباس نوں چنگا سمجھنا چاہیدا اے جیویں سندھی سمجھدا اے۔انج ای ساڈا کھانا وی اے۔پورے جگ وچ ساگ تے روٹی دا کوئی جوڑ نہیں۔اساں کیوں اپنا سبھ کجھ چھڈ دتا۔انج ای ساڈیاں کھیڈاں تے تھیڑ سی۔سانوں اپنی شاعری اُتے مان ہونا چاہیدا اے۔جنھے سانوں بابا فرید،بُلھے شاہ تے سلطان باہو جیہے شاعر دتے۔اوہناں آکھیا میں دل نال تہاڈی قدر کرنا آں تے ہرطراں دی خدمت لئی حاضر آں۔
آرٹس کونسل دے رزیڈنٹ ڈاریکٹر طارق جاوید نے آکھیا چٹھا تے عامر بٹ بڑا کم کردے نیں۔اوہناں پنجابی رہتل تے بولی نوں ودھان دی گل کیتی۔ محمد طفیل امیر جماعت اسلامی نے پنجابی نوں گالی دتی سی۔1958تیک یوپی سی پی دی اشرافیہ دا زور سی۔پنجابی اوہناں توں مرغوب ہو گئے۔
اخیر وچ اوہناں سبھ دا شکریہ ادا کیتا تے ہر طراں دی مدد دا یقین دوایا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels