Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> نین سُکھ دی کہانی مُکنی نہیں

نین سُکھ دی کہانی مُکنی نہیں

February 19th, 2017

اجے ہوا وچ نین سُکھ دے جگ سلائے جان والے ناول ’مادھو لال حسین،لہور شہر دی ویل‘ دی گونج مُکی نہیں سی کہ اوہ اک ہور کہانیاں دی کتاب لے آیا اے۔ شاعری دی پہلی کتاب ’ککّر تے انگور‘(1992)،ٹھِیکریاں(2002)،اُتھل پتھل(2004) مادھو لال حُسین(2014) تے ہن شہید (2016) تیک دا ایہہ لما پینڈا خالد محمود توں نین سُکھ دا وی اے۔ ایس ویلے جے میں آکھاں پئی نین سُکھ سبھ توں بوہتا پڑھیا جان والا پنجابی نثر دا لکھاری اے تاں جھوٹ نہ ہوسی۔
نین سُکھ دے پچھلے ناول مادھو لال حُسین دے لکھن ڈھنگ اُتے ایہہ جھیڑا وی پیا سی پئی ایہہ ناول اے یاں نہیں یاں ایہہ نری وار(تریخ) اے؟ ہن ایہہ گل وی سُنن وچ نہیں آئی ایس دا مطلب اے پئی ہن اوہناں دے لکھن ڈھنگ نوں پروان کر لیا گیا اے۔لکھن دا ایہہ ڈھنگ جس وچ نین سُکھ اپنے ویلے دی وار نوں کہانی راہیں کردا اے پنجابی سلیکھ وچ اک نواں ڈھنگ اے جس دی خورے نقل وی شروع ہو جائے۔ ایہہ پنجابی دے بھاگ نیں جس سانوں اجیہا بھرواں لکھاری دان کیتا جس دا توڑ مینوں تاں اُردو وچ وی نظریں نہیں آوندا۔
’شہید؟‘ وچ چار کہانیاں تے اک ناولٹ ’جپّھی‘ اے۔ دوکہانیاں’چنبے دی بُوٹی‘ تے ناولٹ ’جپھی‘ اوس ویلے بارے اے جیہڑا ضیاء الحق دے ’اسلامی جہاد‘ توں چھوہیا۔ ’چنبے دی بُوٹی‘ اک بھرویں کہانی اے جیہڑی ساڈی وار دے اک خاص ویلے دی کہانی کردی اے جس وچ ایتھے کیویں فرقوسیاست دا مُڈھ بجھیاتے کیویں اوس پورے ملک وچ اگاں لایاں تے فرشتہ کوئی وی نہیں۔جے نین سُکھ ایہہ کہانی انگریزی وچ لکھدا تے احمد رشید نے نیویارک ٹائمز وچ ایس بارے لکھنا سی تے ایہہ کاملہ شمسی دے کسے ناول توں گھٹ نہیں ۔اوہناں نوں تاں اجیہاں کہانیاں گھڑنیاں پوندیاں نیں پر ایہہ تاں ساڈی واپری دیاں کہانیاں نیں۔
میں ایتھے ناولٹ جپھّی بارے ای گل کراں گا۔
ناولٹ ’جپھی‘ وچ کُل باراں کہانیاں نیں۔جیہڑیاں کجھ پاتراں دوالے گم دیاں نیں جس وچ مجید جپھّی مُڈھلا پاتر اے۔
’میں کون؟‘ ایہہ وچاردیاں مجیدجپھّی اپنی حیاتی دا ویروا کرے کہ اوہ میلہ میلہ بھَوندی ملنگی دا جاء۔سرکس،موت دا کھوہ،ٹھیٹھر،چڑیا گھر،میجک شو تے بھنگُوڑے۔اوہنے میلہ کھیڈدیاں ہوش سمھالی۔اوہ مزاراں دے ملنگاں دا کھڈونا۔ایڈا سوہنا نہ پر من موہنا۔بے دھیانا رہندا پر جیہڑی گل جی نوں لگے،اوہ دھیان نال سُنے،چیتا اوہدا چنگا۔لاپرواہ تتی رُتے بے پرواہ فقیراں دیاں درگاہواں دے ٹھنڈے فرش اُتے لیڈیاں ننگا ای سوں جائے۔اوتھوں ای اوہنوں کوئی فقیر چمڑ گیا۔جیہڑا اوہنوں آکھے ’روندے نوں ہسا۔۔۔۔رُسے نوں منا۔۔۔۔۔مردے نوں بچا‘ ۔انج ای اوہ پھردا پھراندا مُڑ توکّل پراپرٹی ڈیلرز دا مالک بنیا جیہدے اگوں دو بانہہ بیلی رانا مُخبرتے بشیر ریڈیو۔’ رانا مُخبر ’پہلاں سپیشل برانچ وچ ملازم رہیا،ہُن ریٹائر ہو کے مُخبر بنیا ہویا‘۔ دوجا ’بشیرریڈیو،آغا صاحب دا مُنشی۔‘ ایس توں اڈ ہور لوک وہ ہن جیہناں دی مجید جپھّی مدد کردا جیہناں وچ ای بلاک دا چوکیدار پٹھان،نسرین صفائی والی،الیکڑیشن منیر،پلمبر شاہجہان تے مِستری یعقوب۔
توکّل پراپرٹی دے نال دوجی کہانی چلدی اے ،’الفلاح سڑیٹ ‘ دی۔جتھوں ناولٹ چھوہندا اے۔ایہہ کہانی اے پئی کیویں مذہب دے ناں اُتے کرائے دار اک پورے گھر اُتے مَل مار لیندے نیں تے مُڑ ہولی ہولی پورا ادارہ اُسار لیندے نیں۔
’الفلاح سٹریٹ
گلی دی نُکر تے جِتھے ایہہ بورڈ لگا ہویا،ایتھے کُجھ ورھے اگدوں No.8 دی تختی کسے نوں اج چیتے نہیں!۔۔۔۔۔پاکستانی لائی لگ،اِسلامی ریاست وچ جیہڑے عربی لفظاں دی یلغار تے بھرمار رہی،اوہ ہن فیشن ہو گئے!۔۔۔۔‘خالہ جی دا ایہہ مُکان ہولی ہولی کیویں ’الفلاح ویلفیئر ٹرسٹ(رجسٹرڈ) بنیا۔جیہدا سبھ توں وڈا حمایتی ’الحاج اشرف ٹرانسپوٹر جیہڑا پہلاں اچھُو بلیڈ سی تے جس نوں اک واری مجید جپھّی نے پُلس توں بچایا سی۔الفلاح ویلفیئر ٹرسٹ دی چیئر پرسن عالم مسز نجمہ ہارون تے الفلاح سکول دے پرنسپل سر ہارون اختر۔ایہناں نال مُڑ مجید جپھّی دی نونہہ سلمی وی رل جاندی اے جیہدی خوند تے سس نال لڑائی ہو جاندی اے۔
’الفلاح سڑیٹ دا جیہڑا پاسا مسجد روڈ اُتے،اوہدیاں دوناں نُکراں اُتے الفلاح دا قبضہ۔اک نکُر وچ الفلاح گرلز سکول جیہدے اُتے اسلامک میرج بیورو۔دُوجی نکُر وچ الفلاح فری ڈسپنسری جیہدے اُتے مجاہد سٹوڈنٹس ریسورس سنٹر کُھلا ہویا۔‘ ایہہ سنٹر چلدا رہیا تے ایس نوں رج فنڈنگ وی ہوندی رہی کسے پُچھیا وی نہ پر جد سرکار نوں لوڑ پئی تے کہانی بدلن لگی تے مُڑ ایس تھاں چھاپہ پے جاندا اے تے پتہ چلدا پئی ہارون اختر ابونصر ،نجمہ ہارون اُم سلمی تے سلمی دا ناں ایمن حریری اے تے ایہناں نوں فنڈ التحریر توں آوندا سی تے ایہہ داعش دا ریکروٹنگ سنٹر سی۔
تیجی کہانی آغا صاحب دی اے جو بہوں بھیت بھری تے لُکی ہوئی اے۔اوہناں دی
بیگم دا ناں نوریہ اصفہانی اے جیہنے اوہنوں ککھ توں لکھ کیتا اے۔ایہہ کہانی اے مُڑ قزلباش ہاؤس دی۔قزلبا ش دا ناں پرانے لہوریاں دے چیتے وچ اجے وی جیوندا اے جیہنوں نین سُکھ نے مُڑ نویں رنگ وچ کھیڈیا اے۔ بیگم صاحبہ پیرس کسے گمنام ایرانی موسیقار نال سرور وچ رہندے نیں۔آغا صاحب دی کئیرٹکیر یوَلی اے جیہدا پورا ناں یوَلانڈا کاسٹیلو۔دِھی تے تاجک جوائی انگلینڈ رہندے، دویں یوِاین وچ ملازم،پُتر تے لبنانی نُونہہ امریکا وسدے جیہڑے ورلڈ بنک دی نوکری کردے۔آغا صاحب دی سالی مہوش تے افغان ہم زُلف عبداﷲ عُرف مِسڑ ہراتی رُوم وچ رہندے۔آغا دا لوک نمائندہ ملک بنیا تے دواں نے مُڑ ناجائز دھندے کیتے تے رج پیسہ کمایا۔
اج کل سباٹرن تواریخ دا بڑی گل ہوندی اے جس نوں لوک وار وی آکھیا جا سکدا اے تے جیہڑی اصلوں ماتڑاں تے ماڑیاں دی وار اے۔نین سُکھ سباٹرن سلیکھ لکھدا پیا اے۔کل نوں جد کوئی وار کار ساڈے وسیب دی وار لکھے گا تے اوس لئی ایہہ کہانیاں تے ناول بہوں بھرواں وسیلہ ہوون گے۔
پچھے دس باراں ورھیاں وچ اوس نثر دیاں چار کتاباں لکھ کے اپنی ماں بولی ایہہ کھپا پورن دا آہر کیتا اے پئی ساڈے کول چنگی کہانی یاں ناول نہیں۔’مادھو لال حُسین‘ جیہے ناول نوں جگ دی کسی وی بولی ساہویں رکھیا جاسکدا اے۔تے مینوں خبر اے اوہ کئی ہور کتاباں جوڑی بیٹھا اے۔ساڈے توں پہلی پیڑھی تاں ہن لکھن توں ہتھ چُکی بیٹھی اے تے کئی اک دو کتاباں لکھ مُکت ہو جاندے نیں۔ سانوں لوڑ اے اجیہاں ہور کتاباں دی،کیوں جے اجوکے تے بدلدے پنجاب دی کہانی نثر راہیں ای ہونی اے۔
نین سُکھ نے ایہہ کہانیاں بڑی دلیری نال لکھیاں نیں خاص کر اپنے شہید بھرا دی کہانی۔رب اوہنوں سلامت رکھے تے تتی ہوا توں بچائے تے پنجابی بولی وچ انمُلے وادھے کردا رہوے۔
(ایہہ لیکھ18فروری 2017 نوں نین سُکھ دی نویں کتاب ’شیہد‘ دی مُکھ وکھالی دے اکٹھ وچ پڑھیا گیا جیہڑا پیلاک وچ پنجابی سنگت،پاکستان رل مل کیتا۔)


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels