Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> تہوار

تہوار

جاوید بُوٹا
February 15th, 2017
5 / 5 (2 Votes)

پَچھلے اِک ڈیڈھ ہفتے توں اِنٹر نیٹ اَتے موبائل فون اُتے ویلنٹائن دے خِلاف آؤن والے میسجاں نال اگ لگی ہوئی اے۔ قُران شریف دِیاں آئیتاں اَتے حدِیثاں دے حوالے۔ ایہہ عِیسائیاں دا دیہاڈا اے۔بے غیرتی اَتے بے حیائی پھیلاؤندا اے۔ ویلنٹائن مناؤنا پہاڑ جیڈا گُناہِ اے۔ مُسلماناں نوں سِدھے راہ توں پُٹھے راہ ول ٹوردا اے۔ ویلنٹائن تِیسری صدی دا اِک پادری سی جیہدا اوس ویلے دے بادشاہ دی دھی نال ناجائز تعلق سی جیہنوں بادشاں نے پھاہے چاڑھ دِتا سی۔ اوس بے غیرت دی یاد وِچ منائیا جاندا اے ایہہ دِن۔ تھوڑے تھوڑے چِر بعدوں موبائل فون ٹُوں ٹُوں کرن لگ پیندا اے کئی وار اِکو ای میسج کئی کئی وار آؤندا اے۔ سُن سُن کے کن پک گئے نیں۔ پڑھ پڑھ کے اکھاں سڑن لگ پیندِیاں نیں۔ چنگے بھلے سیانے بیانے لوک کملے ہوئے پئے نیں۔ کئی تاں سڑ بُھج کے ایہہ میسج ایس لئی اگانہہ ٹور دے نیں کہ ویکھو دُنیا جھلی ہوئی پئی اے۔ کئی جنت وِچ آپنی تھاں دی ایڈوانس بُکِنگ کروان لئی ایہو جیہے میسج اگانہہ ٹوردے نیں تے نال ڈروؤنی نصِیحت وی کردے نیں جے ایس نوں ہور اگانہہ نہ ٹوریا تاں تُہاڈا بیڑا غرق ہو جائے گا۔ تُہادا ککھ نہیں جے رہنا۔ پرباد ہوجاؤ گے۔ دین دُنیا اَتے آخرت توں دُدھکارے جاؤ گے۔ دوزخ دی اگ وِچ سڑو گے ایس لئی اگانہہ ٹور کے تُسی وی جنت وِچ اپنا پلاٹ الاٹ کرا لؤ متے تھاں مُک نہ جائے تے حُوراں وی ونڈِیاں وونڈِیاں جان۔
دُکھاں دی ماری ہوئی خلقت بھورا کو سُکھ مانن لگدی اے تاں کوئی نہ کوئی شوشہ کھڑا ہوجاندا اے۔سرکار گُھگھو ہو جاندی اے۔
عدالتاں فیصلے کڈھ ماردِیاں نیں۔ دھرمی ٹھیکیدار فتوے ٹھوک دیندے نیں۔
’’بسنت ہندواں دا تہوار اے۔‘‘ نہیں منا سکدے۔
’’ویلنٹائن عِیسائیاں دا تہوار اے۔ نہیں منا سکدے۔
اسیں اپنا تہوار،خود کُش جیکٹ دا بٹن جاں کلاشنکوف دا گھوڑا کِسے ویلے وی کِسے تھاں نپ کے لہُو نال لِبڑِیاں لِیرو لِیر ہوئیاں معصوماں دِیاں لوتھاں کھلار کے منا سکدے آں؟


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels