Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> لہور وچ ات گردی:این جی اوز،بسنت، بلاگرز،ویلنٹائن ڈے ،پی ایس ایل فائنل تے فرانس

لہور وچ ات گردی:این جی اوز،بسنت، بلاگرز،ویلنٹائن ڈے ،پی ایس ایل فائنل تے فرانس

February 14th, 2017

آندے نیں جداں ہلاکو بغداد ول ودھ رہیا سی تے بغدادی مسلمان ایہہ بحثاں کرن وچ رجھے ہوئے سن پئی فرشتہ سوئی دے نکے تے گھلو سکدا ہے یا نہیں۔ ہورے کیوں جداں کل دوپہری اسلام آبادی ہائیکورٹ ویلنٹائن ڈے تے پابندیاں دا فیصلہ دتا تے مینوں ’’نان ایشوز‘‘ پاروں لوکاں نوں کراہے پاون والی گلاں اک وار پھیر یاد آون لگیاں۔اک ڈر وی سی پئی ساڈی اشرافیہ کی کر رہی ہے تے شام نوں اوہ ڈر پورا ہو گیا جداں میرے شہر تے اک ہور ات گرد حملہ ہویا۔
پنجاب دی ونڈ ، لکھاں بندیاں دی بے گھری تے قتلام بعدوں مساں مساں پاکستان بنیا سی پر اوس وچ فیڈرل آئین بناون تے صوبیاں وچ رلت ودھاون دی تھاں اشرافیہ نے سانوں ’’قرارداد مقاصد‘‘ پاروں کراہے پا دتاسی۔ملک ات گردیاں وچ وڑددا گیا پر قوم نوں کدی ’’کابل دی مسیت وچ جمعہ پڑھاون‘‘ مگر لایا جاندا سی تے کدی ’’دلی دے لال قعلے وچ جھنڈا لاون‘‘ دے سفنے وکھائے جاندے سن۔افغان مجاہدین طالبان بنے اتے طالبان وچوں ات گرد جمے پر اساں اج دیہاڑ تیک گھلو کے ایہہ نہیں آکھیا پئی ساڈی افغان پالیسی کوڑ سی۔ات گردیاں دا چلینج سامنے گھلوتا ہے تے عدالتاں،سیکورٹی پالیسیاں بناون والے کدی این جی اوز تے بلاگراں ول جاندے نیں تے کدی بسنت تے ویلنٹائن ڈے نوں ڈک کے رانجھا راضی کر دے نیں۔ایسے تسلسل وچ ہن ’’پی ایس ایل‘‘ دی واری جے۔چلو ہور کجھ نہیں تے بغدادی مسلماناں دی بربادیاں توں ہی سبق سکھ لو۔
فرانس دے دل پیرس وچ دو سال پہلے جداں چارلی ہیبڈو تے ات گرد حملہ ہویا سی تے بہوں لوکاں یورپین فٹ بال مقابلیاں وچ نہ جاون دا مشورہ دتا سی کیونجے انہاں حملیاں وچ 129بندے مرے سن۔حملہ آور دولت اسالامیہ دے دسے جاندے سن پر فرانس دے صدر نے نہ تے مسلماناں تے اسلام خلاف بیان دتا اتے نہ ہی یورپین فٹ بال مقابلیاں وچ رلت دی مخالفتاں کیتیاں۔انہاں آکھیا پئی اساں ات گرداں دے دابے وچ نہیں آواں گے۔پرساڈے تے ادارے آپ ات گرداں نوں سافٹ تھاواں فرہم کر دے نیں تاں اساں کس ماں نوں ماسی آکھیے۔جداں وی کوئی ایسی گل کردا ہے جہیڑی اداریاں دے بیانیاں نال نہیں رلدی اوس نوں ’’اینٹی پاکستان‘‘ تے ’’اینٹی اسلام‘‘ آکھ دتا جاندا ہے۔پھڑیچے بلاگر گورایہ نے چھٹن بعدوں والائیت اپڑ کے بیان دتا پئی میں نہ تے پاکستان دے خلاف ہاں نہ ہی اسلام دے سگوں میں تے سمجھدا ہاں پئی پاکستان جمہوریت تے قنون دی حکمرانیاں نال تگڑا ہو سی۔ پر کل اک بھارتی اخبار اوس دے ایس بیان نوں کوڑ آکھیا۔ ذرا غور کرو پئی بھارتی اخبار تے پاکستان وچ بلاگراں خلاف زہری پروپیگنڈا کرن والیاں وچ کڈی سانجھ ہے۔ویلنٹائن ڈے دے خلاف آون والا حکمنامہ دنیا نوں ایہہ دسن لئی کافی ہے پئی اساں ات گرداں خلاف کیہہ کجھ کر رہے ہاں۔بلاگراں والے مسلہ وانگ ایس تے وی کوئی بھارتی لکھاری مضمون لکھ مار ے گا۔ بسنت ہندواں دا تہوار، ویلنٹائن ڈے مغرب دا تہوار تے پھیر ایہہ وی دسو ساڈا قومی کھیڈ ’’ہاکی‘‘ کتھوں اسلامی ہویا؟ویسے ’’مقدس‘‘ کھیڈ ’’گاف‘‘ بارے کیہہ خیال ہے جہیڑا اشرافیہ دا پسندیدہ تے ہشیار کھیڈ ہے اتے طاقت دا گھما وی۔
ات گردیاں تے ات گرد ’’خوف‘‘ ودھاندے نیں کیونجے انہاں دا وڈا ہتھیار ’’خوف‘‘ ہوندا ہے۔ذرا انٹرنیٹ تے لکھ کے ویکھو، تہانوں ات گردیاں نال پیدا ہون والے خوف نوں مٹاون وچ سپورٹس دے وڈے کردار بارے ودھیا لکھتاں ملن گیاں۔جس سال چارلی ہیبڈو ہویا اوسے سال انگلینڈ تے فرانس والیاں ویمبلے(برطانیہ)وچ برطانیہ نال وڈا فٹ بال مقابلہ کیتا اتے سائمن ہوراں مضمون وچ لکھیا
Tonight England played France in a football match at Wembley. You can call it a glorious assertion of the spirit of humanity, or a glorious up-yours to all the terrorists in all the world. Either way you would be right.
فرانس نے نرا سیکورٹی نوں ودھان تے بندیاں نوں پھڑیچن تیک گل نہیں رکھی سگوں نصاباں توں کھیڈاں تیک ہر میدان وچ ات گردیاں دا مقابلہ کیتا اتے سب توں پہلاں اپنے ہمسائیاں نال گل بات ودھان لئی سیکورٹی اداریاں نوں انٹیل جنس شئیرنگ ول لایا۔اج پاکستان تے بھارت دے ات گرد دوناں ملکاں وچ کرکٹ دے خلاف ایویں نہیں ہیگے۔انہاں نوں پتہ ہے پئی میلے، ٹھیلے اتے کھیڈاں ات گردی نال بنائے ماحول نوں برباد کر دیندے نیں۔ پر ایہہ گل جج ہوراں نوں کون سمجھائے ؟اج ویلنٹائن ڈے ہے تے پاکستان نوں پھلاں دی لوڑ ہے اتے ایس بسنتی موسم وچ نویں نویں پھل کھڑدے نیں۔اک دوجے نوں کنڈے نہیں پھل دیو۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels