Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> نجم حُسین سیدّ:ادبی مہاندرا لڑی وار۔1

نجم حُسین سیدّ:ادبی مہاندرا لڑی وار۔1

February 6th, 2017

(نجم حُسین سیدّ بارے ایہہ لیکھ 10ورھے پہلاں انگریزی وچ لکھیا گیا سی۔اصلوں ایہہ لیکھ جرنل آف پنجاب سڈیز دے رسالے لئی لکھیا گیا سی جویونیورسٹی آف کیلیفورنیا،سینٹا بابرا،امریکا توں لڑی وار چھپدا اے۔جرنل دے شمارے 13 وچ سن 2006 وچ ایس لیکھ دا کجھ حصہ چھپیا سی۔ایتھے اسیں وچار دے پڑھیاراں لئی پورا لیکھ پنجابی وچ سانجھا کردے پئے آں ’بناں کسے دعوے دے۔‘)
باہرلا
نجم حُسین سیدّ دے کم دی پرکھ کرنی اوکھی اے پر اوہناں پنجابی بولی تے سلیکھ(ادب) وچ جو شانداروادھا کیتا اے اوس دی سلاہنا گھٹ اوکھی اے پر اوہناں دی نندیا کرنا سبھ توں سوکھا اے۔کیوں جے اوہ ویہارو پنجابی اکیڈمک اداریاں توں باہر نیں تے پیتلے نِوین موہریاں توں وی۔ایہناں دواں نیں سڑ سڑ کے ایس گل دی راکھی کیتی اے پئی اوہناں دی کوئی کتاب کسے پنجابی نصاب دا حصہ نہ بنے،جیہڑے ہمیش اوہناں دی ’متروک تے پیچدار‘ بولی نوں نندن لئی اُتھاولے رہندے نیں تے جو ہمیش شکیت کردے نیں اوہناں نوں پڑھنا اوکھا اے تے کدی پڑھن دی کھیچل نہیں کردے۔
کلاسیکل مارکسٹاں توں لے کے ادھ پڑھے ریتل پڑھائیاں والے نجم حُسین سیدّ دے ورودھ وچ اکّ مکّ ہن۔اوہناں کدی انٹرویو نہیں دتا،کدے کسے میڈیا دے پروگرام وچ نہیں آئے تے اوہناں دیاں کتاباں وڈے پبلشر نہیں چھاپدے۔اوہناں دی کتاب وچ پوند کدی کوئی مُکھ بند یاں پچھلے حصے اُتے لکھاری بارے کوئی جانکاری نہیں ہوندی۔ہور تے ہور اوہ اپنیاں کتاباں نوں کسے دے ناں نہیں کردے۔ہمیش کوئی سطر یاں شعرکلاسیکل شاعری توں شروع وچ دے دنیدے نیں۔اوہ کون اے؟ کسے وی پنجابی لکھاری توں پُچھو تے بہوں گھٹ ہوسن جیہناں اوہدا ناں نہ سُنیا ہووے تے اجیہے تے بہوں نیں جیہناں اوہناں دی کوئی نہ کوئی لکھت جے رج پڑھی نہیں تے چس ضرور مانی ہووے گئی۔
اوہناں دیاں لکھتاں ہمیش رسالیاں وچ چھپدیاں رہندیاں نیں۔ اوہناں نوں کسی وچاردھارے وچ بھننا اوکھا اے تے نہ ای اوہناں دی ذاتی حیاتی بارے ساڈے کول بوہتی جانکاری اے ایس لئی ایہہ ای چنگا رہوے گا پئی اسیں اوہناں دیاں لکھتاں دی گل کریئے۔ کیہ اوہ آپے وی ایس گل دی اُڈیک نہیں کردے رہے؟
اسیں ایس لئی اوہناں دیاں لکھتاں دی ای گل کراں گے۔پر ایس توں پہلاں سانوں پچھلے 150 ورھیاں دے پنجابی سلیکھ تے بولی دا پچھوکڑ دینا پووے گا کیوں جے ایس توں بناں اوہناں دی اجوکے پنجابی سُلیکھ وچ تھاں نہیں متھی جا سکدی۔
پوند وچ اکھر سی
اسیں نصاباں دے متھے اصولاں نوں مُکھ رکھ کے پنجابی لکھاری دی گل نہیں کر سکدے،نہ ای اسیں کسی لکھاری دی حیاتی تے کم اُتے گل کر سکدے آں،اُچیچے پکھوں اُس لکھاری بارے جو لہندے پنجاب وچ رہندا اے تے اپنی ماں بولی وچ لکھدا اے۔ جیویں اسیں چڑھدے پنجاب دے لکھاری یاں جگ دے کسی وی لکھاری بارے گل کر سکدے آں،جس توں اوس دی بولی دا حق نہیں کُھسیا۔ دکھنی ایشیاء دے اوہ لکھاری جیہڑے لہندے وچ رہندے نیں یاں اپنے ملکاں وچ تے جیہناں مرضی موجب یاں بناں مرضی اپنیاں بولیاں نوں تیاگ دتا ہویا اے،اوس لکھاری دی پیڑ تے روہ(غصہّ) نہیں سمجھ سکدے جو اپنی بولی توں غیر حاضر نہیں اے۔اوس لئی لکھنا نرا اپنی گل کرنا نہیں اے،دل نوں ہولا کرنا یاں جگ نال گل کرنی۔سگوں ایہہ اوس دی کُل ہوند دی گل اے،اوس دے آپے دی۔ایہہ لوکاں نال حاضر رہنا اے، اپنی وار(تواریخ) تے دھرتی نوں من کے ۔بولی دی چون اصلوں پڑھیاراں دی چون اے۔جیویں بولی باہرلی اے ایویں ایس نوں بولن والے وی باہرلے نیں،تے پڑھیار تے لکھاری وی۔تے پھیر اپنی بولی دی چون کرنی تے ایس گل دے ہوندیاں وی پئی بولی تاں کتھے ’موجود‘ نہیں اے،کیوں جے ایہہ ویہارونظام دا حصہ نہیں اے۔ایہہ گل منگ کردی اے اک اجیہی تکنی دی جیہڑی کھوج دے چالو وچاراں اُتے پورا نہیں اُتر سکدی۔ایس لئی پاکستانی پنجابی لکھاری دا معاملہ جیہڑا اپنی بولی وچ لکھ رہیا اے، نویکلا اے اتے سانوں بولی سیاست نوں سمجھن لئی کجھ سُوجھ وکھانی پوسی۔
(چلدا)


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels