Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پنجابی صوفی شاعراں بارے لیکچر سیریز

پنجابی صوفی شاعراں بارے لیکچر سیریز

زاہد حسن
February 5th, 2017

گرمانی مرکزِ زبان و ادب لہور یونیورسٹی آف مینجمنٹ سائنسز (لمز) دے پر بندھ نال پنجابی صوفی شاعراں بارے لیکچرز سیریز شروع کیتی گئی ہے۔ 3 فروری 2017 توں شروع ہون والی ایہہ سیریز 21 اپریل 2017 تیک چلے گی۔ 3 فروری نوں ہون والے پہلے پروگرام وچ موضوع دی اہمیت تے کورس دا ویروا پیش کیتا گیا۔ ایس پہلے پروگرام وچ پنجابی دے سرکڈھویں لکھاریاں لمز دے پڑھیاراں تے اہم سماجی شخصیات نے رلت کیتی۔ کورس دا ویروا گرمانی مرکز زبان و ادب دے ڈائریکٹر اردو، فارسی تے پنجابی دے شاعر ادیب مترجم معین نظامی ہوراں کیتا تے دسیا کہ پنجابی دے حوالے نال لمز وچ پروگرام تے ہوندے رہندے نیں پر پہلی واری اجہیا پروگرام ہورہیا ہے جو پنجابی صوفی شاعراں بارے ہے جس وچ باقاعدہ لیکچرز سیریز دا اہتمام کیتا گیا ہووے۔ ایس مڈھلے تواریخی پروگرام وچ پنجابی دے منے پر منے شاعر، سوجوان، ترجمہ کار تے قالم کار اتے صدر پنجابی ادبی بورڈمشتاق صوفی ہوراں پنجابی شاعری، شاعراں تے اوہناں دی وزڈم اُپر بھرواں لیکچر دتا۔ اوہناں بابا فرید تے بابانانک توں لے کے خواجہ غلام فرید(مٹھن کوٹ والے)، تیک اپنی گل دا وسہ رکھدیاں ہویاں دسیا جو ساڈے ایہناں پنجابی صوفی شاعراں اکاّ وسّوں دی ورتوں ،زبان تہذیب تے سماجی رویاّں نوں شاعری دا ٹیچا نہیں بنایا سگوں طبقیاں دی ونڈ،طاقتور دے ورودھ تے ظالم دے ظُلم خلاف لکھیا اتے عام لوکائی نال جُڑکے رہے۔ ایہی کارن ہے جواج تیک خلقت دے دلاں وچ پنجابی صوفی شاعر اپنے کلام راہیں اج وی آباد نیں۔ اوہناں دی فکر تے پیغام دھرتی اْتے وسدے لوکاں بارے سی ۔ایہونہیں سگوں اوہناں دین ،دھرم، طبقے تے فرقے توں پراں ہوکے انساناں دی گل کیتی۔ اجو کے فرقو سمے وچ اوہناں دی شاعری تے فکر نوں عام کرن دی لوڑ بہوں زیادہ ہے۔ اکٹھ وچ موجود لوکاں مشتاق صوفی ہوراں دے ایس لیکچر نوں دلچسپی نال سُنیا تے پچھوں اوہناں دے سوالاں دے جواب وی دتے۔ اوہناں صوفی شاعری تے شاعراں دے پنجابی لوک شاعری نال جُڑت، فلسفہء وحدت الوجود صوفیاں دے کول انسان تے خدا دے تعلق دے حوالے نال شاعری، پنجابی شاعری دیاں صنفال بارے وی گل چھوئی۔ خاص طور تے گورونانک ہوراں جیہڑیاں صنفال نوں شاعری وچ ورتیا جیویں وار، سوہلا، سی حرفی، بارہ ماہ وغیرہ بارے گل کیتی۔ مجموعی طور تے ایہہ پروگرام بہت ورسیا رہیا تے اوہناں لمز تے گرمانی مرکزِزبان و ادب دی ایس کاوش نوں سراہیا جیہدے وچ آون والے دناں وچ بابا فرید شاہ حسین، سلطان باہُو، بُلھے شاہ، میاں محمد بخش تے خواجہ غلام فرید بارے لیکچراں دا بھنڈار ہو سی۔اجہے لیکچراں راہیں پڑھیاراں نوں صوفی شاعراں دے کلام تے فکر نوں سمجھن وچ مدد ملے گی۔ ایس اکٹھ دی اینکری احمد بلال اعوان ہوراں کیتی جدوں کہ لمز دے پنجابی پڑھ رہے طلبا توں وکھ فقیر سید اعجاز الدین، قاسم جعفری، اقبال قیصر، شہناز اعجاز الدین، زبیر احمد انجم قریشی، نین سُکھ، رخشندہ نوید، عامر ریاض، رفاقت علی شاہد، ذی شان دانش، توقیر کھرل، سارہ کاظمی،وقار مصطفیٰ سپرا تے ہور لوکاں رلت کیتی۔

زاہد حسن پنجابی دی سیوک وی نیں تے لکھاری وی اتے ایس سال انہاں نوں ڈاھاہاں انٹرنیشنل پنجابی ایوارڈ وی ملیا ہے۔اج کل اوہ لمز دے گرمانی سنٹر نال جڑے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels