Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ریلوے دے خونی پھاٹک

ریلوے دے خونی پھاٹک

جمیل پال
January 23rd, 2017

ریلوے دے خونی پھاٹک
گوجرہ دے لاگے’’ پکا آنا‘‘ ٹیشن توں دو کلو میٹر دُوری اُتے بغیر پھاٹک ریلوے کراسنگ توں گذردے ہویاں کراچی توں لاہور جاون والی شالیمار ایکسپریس دی مار وچ آ جاون والی کار دے پاڑچھے لتھ گئے۔ ٹرین کار نوں اک کلو میٹر تک دھریکدی لے گئی تے کار وچ سوار لوک لاشاں وچ ای تبدیل نہیں ہوئے سگوں اوہناں دے ٹوٹے اک کلو میٹر تک کھلر گئے۔ کار دے ڈرائیور نوں گڈی دے آون بارے پتہ نہیں سی لگ سکیا۔ پنڈ واسیاں نے احتجاج کردے ہویاں ریلوے ٹریک چار گھنٹے تیک بلاک رکھیا تے نعرے بازی کیتی۔
فوج دے بعد ریلوے ملک دا سبھ توں وڈا محکمہ اے جہدا جال پورے دیس وچ کھلریا ہویا اے۔ اک زمانا سی کہ گڈیاں ویلے سِرآوندیاں سن‘ اوہناں دے کرائے مناسب سگوں تھوڑے ہوندے سن تے لوک سہولتاں نال سفر کردے سن۔ان ویکھے ہتھاں نے ایس محکمے نوں فقیر محکمے وچ بدل چھڈیا۔ ایس ویلے کدھرے کدھرے کوئی گڈی چلدی اے‘ ریلوے دِیاں ودھیریاں زمیناں اُتے قبضے ہو چکے نیں تے ایہ محکمہ منافعے دی تھاں کسارے دا محکمہ بن چکیا اے۔ کرائے وی ہوائی جہاز دے کرائے توں تھوڑے ای گھٹ رہ گئے نیں جس پاروں لوکاں دا رحجان پرائیوٹ کوچاں تے جہازاں ول ای ہو گیا اے۔
اینے لمے چر وچ جہڑی چیز اُکا نہیں بدلی تے اپنا کم اوسے طرحاں کیتی آوندی اے‘ اوہ اے ریلوے دے بغیر پھاٹک لانگھے۔ پورے دیس وچ تھاں تھاں ایہو جہے لانگھے ویکھن نوں ملدے نیں جتھے نہ تے کوئی پھاٹک ہوندا اے‘ نہ چوکیدار۔ گڈی گھگو وجاندی پوری رفتار نال گذردی اے تے لوک اللہ توکل ای اوہدی مار توں بچدے نیں۔ جتھے پھاٹک ہے نیں‘ اوتھے وی ساڈی قوم دا بے صبرا مزاج ٹک کے بیٹھن کھلون نہیں دیندا تے لوک سایکلاں نوں سر اُتے چک کے تے موٹر سایکلاں نوں دھریکدے‘ آوندی گڈی دے ساہمنیوں موت دِیاں اکھاں وچ اکھاں پا کے لنگھ جاندے نیں۔ ریلوے دا چوکیدار جے موجود وی ہووے تاں اجہے لوکاں دا کجھ نہیں وگاڑ سکدا۔
گوجرہ دا تازا حادثہ اک المیا اے کہ بیمار لوک جو کدھرے دَم کران جا رہے سن‘ راہ وچ ای دَم کر دتے گئے۔ ڈرائیور جے ڈورا سی تاں اوہنوں ڈرائیونگ سیٹ اُتے نہیں سی بٹھایا جانا چاہیدا۔ اک کلو میٹر تک گھسیٹے جان دے بعد کار تے کار دِیاں سواریاں دا جو حال ہویا ہووے گا‘ اوہدا اندازا کیتا جا سکدا اے۔
ممکن نہیں کہ ساڈے لوکاں دی بے صبری نوں کوئی قرار آ سکے۔ ریلوے دا سارے لانگھیاں اُتے پھاٹک لائے جانا وی شاید ممکن نہیں۔ پرحادثے ہوندے رہنا وی کوئی چنگی گل نہیں۔ ریلوے نوں اپنے بجٹ وچ لوکاں اندر جاگرتی پیدا کرن لئی مہم چلان دی گنجایش رکھنی چاہیدی اے۔ لوکاں نوں دسیا جاوے کہ آوندی گڈی توں پہلاں لنگھ جاون دا شوق انتہائی احمقانہ تے جان نوں خطرے پاون والا اے تے ڈرائیونگ سیٹ سنبھالن والے جدوں ریلوے لاین توں گذرن تاں سجے کھبے چنگی طراں ویکھان بہت ضروری ہوندا اے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels