Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بسنت بہار: اج دنیا نوں پاکستان لیاون دی لوڑ جے اتے بسنت وڈی کششاں رکھدی جے

بسنت بہار: اج دنیا نوں پاکستان لیاون دی لوڑ جے اتے بسنت وڈی کششاں رکھدی جے

وقار سپرا
January 19th, 2017

پنج دریاواں دی ،دھرتی پنجاب، وچ بار دے وقتاں توں اک ثقافت چل دی پئی ہے۔ایس نوں ’’بار دا ویلا‘‘آکھدے نیں۔ اج بہوں سارے لوکاں نوں ویلے دی ایہہ ونڈسمجھ نہیں آندی ۔پر اک ویلہ سی جدوں پنجاب دے اصلی تے حقیقی باسی’’ بار‘‘ وچ ہی رہندے سن۔بار دی رہتل وچ کئی تہوار وی سی جندے وچ کُجھ اج تک چلدے پئے نیں اتے انہاں وچ اک بسنت وی ہے۔ بسنت کیوں بند ہوئی ؟ ہُن دوبارہ اس سال ہووے گی؟ اے سوال میرے کولوں میرے اک دوست نے کیتے۔ اسی برٹش کونسل لائبریری وچ رسالے دے ورقے اُلٹ رہے ساں کہ ساڈی نظر اک انگریز ی رسالے دے پورے صفحے دے اشتہار تے پئی۔ایہہ اشتہار انڈونیشیا وچ ونڈرفُل انڈونیشیاء دے بارے وچ سی کہ تُسی بغیر ویزہ انڈونیشیا آ کے ایہہ میلہ ویکھ سکدے ہو۔ اسی سوچیا تے فیر اک دوجے کولوں پُچھیا کہ یار کوئی ساڈی وی رہتل یاثقافت ہے؟ اگر ہے تے فیر اس دا وی میلہ ہووے گا؟ ہُن میں اس کالم وچ اوہی روایتی بحث کہ جی بسنت کس مذہب دا تہوار (میلہ) ہے؟ شروع نہیں کرنا چاہندا۔
لیکن گل اے ہے کہ ساڈی قومی حیثیت اک سوالیہ نشان ہے۔ا ساڈی خارجہ پالیسی دی ناکامی دا عالم اے کہ ساڈا پاسپورٹ دنیا وچ عملی طور تے اک سب توں زیادہ بُری نظر نال ویکھی جان والی سفری دستاویز بن چکی ہے۔اسی اپنے میلیاں راہیں ایس نوں بدل سکدے ہاں۔
ہُن بہوں دور نہیں جاندے۔ ایس رسالے دے اشتہار دے وچ’’ ونڈرفل انڈودنیشیا‘‘ دے میلے تے بغیر ویزے توں دوجے ملکاں دے باسیاں واسطے سہو لتاں سن۔ اسی میلے دی تاریخ تے انہاں مُلکاں دی فہرست وی ویکھی جیہڑے ایس میلہ وچ وی ویزا دے نال ہی آسکدے سن۔ انہاں دس خوش قسمت ترین ملکاں دے وچ وطن عزیز دا نام وی شامل سی ۔ نال ای جدوں تاریخ تے نظر پئی تے اسی بہوں خوش ہوئے کیونجے ایندی تاریخ نکل چکی سی ۔ لیکن نال ہی دُکھ وی ہویا۔انڈونیشیا قدر کر لیندا کہ ساڈی قوم دیاں امت دے لئی کڈیاں قربانیاں نیں۔لیکن بس جی! کی ہو سکدا ہے۔ بہر حال ہُن اگر ساڈی کلچرل پالیسیاں ٹھیک ہو جاون تے پنجابی لوکائی دی اپنی ثقافت ایڈی تگڑی ہے کہ اسی ایسے سال بسنت دے نال نال کئی میلے منا سکدے آں۔ بسنت دا میلہ تے ساڈے اپنے مُلک دا ہے۔ دنیا بھر توں لوک بسنت دے لئی لہو رآن گے۔ لہور شہر دا اپنا رنگ سی تے رہے گا ۔ ایس قدیم شہر دیاں گلیاں تے انہاں وچ اُڈدی ہوئی گڈیاں دا جادو پوری دنیا نوں ایتھے کھچن لئی وادھو ہے۔ لیکن ایس لئی بصیرتاں ہونیاں لوڑی دیاں نیں۔ایہہ وی حقیقت جے پئی جداں تیز دھار ی ڈور قاتل بن کے شہر دیاں گلیاں وچ موت نوں واجاں ماردی سی تے شہر وچ اک نواں ڈر پیدا ہو گیاسی ۔ خونی ڈور توں لہولہان معصوم بچیاں دیاں تصویراں جدوں میڈیا وچ آیاں یا جان بجھ کے لیایاں گیاں تاں پکار پئے گئی۔
اندرون لہوروچ تے بسنت مناہی جا سکدی ہے۔ جے لہور دی سٹی حکومت ،والڈ سٹی اتھارٹی تے لہوریے اندرون شہر نوں بچاون لئی اک مک ہوجاون تے گل بن سکدی ہے ۔ اندرون لہور نوں سوہنے وطیریاں نال سجایا جائے جیویں دنیا بھر دے وچ میلے مناندے نیں ۔اینج نہ صرف اندرون لہوردی گلیاں، محلے صاف ستھرے ہو جاون گے سگوں میلیاں پاروں عام لوکاں نوں اس روزگار وی ملے گا۔
اصولی طور تے حکومت چاہندی اے کہ اس سال 2017وچ بسنت منان دی اجازت دیتی جاوے لیکن اگر اسی لوکاں نے اے عہد کر رکھیا ہے کہ اسی کسے وی قانون نوں نہیں مننا تے من مرضیاں کرنیاں نیں تے فیر نتیجہ او ہی نکلے گا جیہڑا پہلاں نکلیا سی ۔
میری شہر لہور دا باسی ہون دے طور تے اپنے ورگے باسیاں توں ایہہ اپیل ہے کہ اوہ اس سال بسنت تے قانون دے مطابق تہوار مناون تے نال ہی حکومت توں وی اپیل ہے کہ اوہ اس تاریخی ثقافتی تہوار نوں ،جیہڑا ساڈی پنجابی لوکائی دا اک اہم تہوار سی، سرکاری طور تے منان دی اجازت دے۔ اج دا کالم اس دعا نال ختم کردا واں کہ ’’شہر لہور ‘‘تیری رونقاں ہمش آباد رہن تے اسی تیرے رنگ نوں مزید ترقی کردے ہوئے ویکھیے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels