Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بی بی سی دا ’’نواں حملہ‘‘؟ بوس،مارک ٹیلی توں پانامہ تیک

بی بی سی دا ’’نواں حملہ‘‘؟ بوس،مارک ٹیلی توں پانامہ تیک

January 14th, 2017

میڈیا طاقت ورکھڈاریاں دا مراثی (مراثیاں نال معذرتاں) میڈیا آپوں طاقتاں دا ’’گھما‘‘، پر ایس دے نال نال میڈیا راہیں لوکاں تیک خبراں دا بھنڈار وی آندا ہے پئی ایہہ تینوں گلاں آپدے تھاں تے درست۔ آزاد میڈیا ناں دی کوئی چیز نہیں ہوندی البتہ صحافی آزاد ہوسکدا ہے۔ میڈیا سرکار دا لاڈوسپیکر ہوندا ہے اتے اشتہاری کمپنیاں دا پحھکک وی تے پبلک پرائیوٹ پارٹنرشپ پاروں اج کل سرکار تے پرائیوٹ دوناں نوں نال نال کھدا جے۔ کیہڑی خبر کدوں لگنی ہے، سرخی کیہڑی ہونی چاہیدی ہے، کس خبر نوں چکنا ہے، کس نوں لانا ہی نہیں ،ایہہ سب سیاستاں دا بھنڈاراتے میڈیا انہاں دا بلارا۔ 94 سالہ بی بی سی وی ایہو کجھ، پر فرنٹ بینر توں ایہو لگدا ہے پئی ایہہ نرا اظہار دی آزادی دا چوکیدار جے۔
انفارمیشن، ٹیکنالوجی دے ایس دور وچ تسی سکندر، قاسم، غزنوی،نادرشاہ تے ابدالی دے حملے بھل جاؤ گے پئی ماڈرن حملیاں دابوہتاتے میڈیا جے۔ عراق وچ لوک مررہے ہوندے نیں تے تہانوں سمندر کنارے مریا ہویا اک بگلا وکھایا جاندا ہے پئی تسی صدام حسین نوں ہی بس سب دا ذمہ وار سجھو۔ جدوں تیک پاکستان وچ الیکٹرانک میڈیا نویں چینل تے ایف ایم ریڈیو نہیں آئے سن اوس ویلے تک بی بی سی ہی خبراں دا وڈا ’’گھما‘‘ سی۔ پر دُوجی لام ویلے تیک برلن ریڈیو نے وی آپدے پیر کھلارے ہوئے سن۔انگریز مخالف ہی نہیں سگوں دوجے وی برلن ریڈیو سندے سن۔انگریزاں ایس تے روک لا دتی سی ساڈے ایتھے،1940وچ پر لوکاں نوں کون روک سکیا ہے۔دوجی لام بعدوں نہ تے جنمن رہیا تے برلن ہی ونڈیا گیا تاں بی بی سی دی گڈی چڑھ گئی۔ساڈے ایتھے ریڈیو ٹی وی تے سرکار دا قبصہ سی اتے اتوں فوجی ڈکٹیٹراں آکے اکا ہی سرکار دا اعتبار مکادتا تاں ایس وتھ پاروں بی بی سی دا ہور ناں ہوگیا۔
میڈیا وچ خبر نشر یا چھاپن دی ٹائمنگ خبر توں وادھو اہمتیاں رکھدی ہے۔ حقیقت کجھ وی ہوئے ایس دا ورتاوا ایس نوں اک نواں روپ دیندا ہے۔ سبھاش چندر بوس ہوری پنجاب، افغانستان توں ہوندے ہوندے اخیر سنگاپور اپڑے سن اتے انڈین نیشنل آرمی بناکے انگریز خلاف وڈا مورچہ لایا سی جیہڑا عسکری وی سی تے سیاسی وی۔ سنگاپور اپڑن اتے سنگارپور وچ اک وڈی بغاوت پاروں انگریزاں دی چھٹی ہون توں پہلاں سبھاش انگریزی ریڈاراں وچ نہیں آرہیا سی۔ پریشان انگریز سرکار نوں کھوبے چوں کڈن دا آسرا بی بی سی بنیا اتے سرت چندربوس دے پوتے سوگھاتا بوس نیں آپدے دادے دے بھرا دی سوانح وچ ایہہ کہانی پوری لکھ دتی۔ بی بی سی والیاں اک دن سبھاش دے مرن دی خبر جاری کردتی۔ ایس جعلی خبر نوں پکا کرن دا کم آپدے مہاتما ہوراں کیتا اتے خبر بعدوں انہاں بی بی سی تے آن ائیر آکے اوسے سبھاش دی تعریفاں کیتیاں جس نوں کجھ ورہے پہلاں انہاں ٹاٹا، ابوالکلام آزاد تے پٹیل نال رل کے کانگرس دی صدارتاں توں کڈوایا سی۔ بس ایس پاروں سبھاش نوں ’’اوپن‘‘ ہونا پئے گیا اتے انگریز نوں وی پتہ چل گیا کہ اوہ سانگا پور اپڑ چکیا ہے۔ ایہہ تے پاکستان بنن توں کجھ سال پہلے دا ’’حملہ‘‘ سی۔ پاکستانیاں نوں تے مارک ٹیلی وی یاد ہے جس نے 1965 دی جنگ وچ بھارت دے پاکستان تے قبضہ دی خبر جاری کیتی سی۔ خیر موجب بھارتی سپاہی لہور تے قبضہ کرلتا سی۔ ویسے تے پچھلے دناں جنج الطاف خلاف پہلاں خبراں پلائیاں اتے پریشر ودھا کے اوس توں پاکستان خلاف تقریراں کروا لتیاں اتے ایس بودوں جداں بٹش سرکار وی ٹھنڈی ہو گئی تے فیر ہن بی بی سی وی چپ دا روزہ رکھ لتا۔ برطانیہ دی پلس ولوں کیسے کیسے بیان آئے سن سب یاد نیں۔ ہن خبر چلاون دی ٹائمنگ حوالیاں نال اخیری ’’حملہ‘‘ لندنی فلیٹاں دی کہانی نوں مطلبی رنگ دینا ہے۔ اک پاسے پاکستان وچ ملٹری کورٹ پاروں سول ملٹری پھڈے جاری نیں،دوجے پاسے کوئی بلاگراں نوں غیب کررہیا ہے ۔تریجے پاسے اک عالمی این جی او دے ہرکاریاں وچ رلتی طالبانی مجرم دی پھانسی دی سزا نوں پشور ہائی کورٹ ڈک دتا ہے اتے پانامہ کیس ایس سب نال آپدی تھاں موجود۔ ضیالحق دے قنون 63,62 دی تلوار نوں ایس وار کیہڑا تارا مسیح ورتے گا ایس بارے گلاں وادھو۔ جتھے سارا زور ٹائمنگ تے ہوئے اتھے سچ، جھوٹ دی اہمتیاں مک جاندیاں نیں۔ خبر دے اخیر وچ تحریک انصاف دا حوالہ دے کے بی بی سی ایہہ وی دس دتا پئی نواز نوں کڈکے اوہ کس نوں پاکستان وچ حکمران ویکھنا چاہندے نیں۔ اینج لگدا ہے پئی ایہہ گورے اج وی پاکستان نوں آپدی نو آبادی ہی سمجھدے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels