Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> برطانیہ کھوبے وچ؟ بریگسٹ بعدوں دایورپ تے امریکہ ا تے انتہا پسندیاں تنویر زمان

برطانیہ کھوبے وچ؟ بریگسٹ بعدوں دایورپ تے امریکہ ا تے انتہا پسندیاں تنویر زمان

پروگرام لوک لہر
January 13th, 2017

اج اساں اک سانجھی دنیا وچ رہ رہے ہاں۔ جو کجھ امریکہ، یورپ وچ ہورہیا ہے اس دا اثر ساڈے تے ترت پیندا ہے۔ جے ساڈے تے اوہناں دا اثر پیندا ہے تے اوہناں تے ساڈا اثر وی پیندا ہے۔ بریگسٹ برطانیہ دے عوام دی ڈیمانڈ نہیں سی سگوں اوس برٹش اشرافیہ دی آواز سی جیہڑی سمجھدی سی پئی یورپی یونین وچ انہاں دا زور نہیں چل رہیا۔ ایس وچ انہاں انگلش لوکاں وڈا حصہ لتا جیہڑے امریکہ وچ اہم عہدیاں تے بیٹھے نیں اتے امریکی میڈیا وچ وی انہاں کول وڈی تھاں ہے۔ بریگسٹ دے حق وچ پین والے ووٹاں دی سٹڈی آپدے تھاں بہوں دلچسپ ہے۔ اوہ بڈھے جیہڑے ہن آپدی زندگی دے اخیرلی سالاں وچ نیں انہاں سلطنت دے تفاخراں نوں بچاون لئی یورپ چھڈن دے حق وچ ووٹ دتا۔تساں ریفرنڈم وچ پین والے ووٹاں دی سٹڈی ویکھ لو تہانوں بہوں گلاں دا پتہ چل جا سی۔ ہن لندن نے تے بریگسٹ نوں اکا مسترد کر چھڈیا۔ یوکے دے نوجواناں دی وڈی گنتری یورپ نال رہنا چاہندی ہے۔ ایہہ وی جاپدا ہے پئی برطانیہ دی اشرفیہ بریگسٹ نوں چک تے رہی سی پر اوس لئی تیاریاں کوئی نہیں سن۔ ایسے لئی اج وی آرٹیکل 50 پاروں وکھرا ہون دی درخاست یورپی یونین وچ برطانیہ نہیں دتی۔ اج وی ابہام پایا جاندا ہے۔ بریگسٹ بعدوں برطانیہ دی اکنامی بہہ گئی ہے۔ جون 2016 توں اج تک دے اعداد وشمار ویکھ لو۔ وڈے سرمایہ داراں اتے بینکاں آپدا روپیہ کڈہنا شروع کردتا ہے۔ قیمتاں ودھ رہیا نیں۔بریگسٹ دا اثر دوجے یورپی ملکاں تے وی پیا ہے۔ اج فرانس، جرمنی وچ وی وڈی لابی بریگسٹ نوں فالو کررہی ہے۔ ہر تھاں امیگریشن دے قنون سخت ہورہے نیں۔ دوجے یورپی ملکاں توں جیہڑے برطانیہ آرہے سن اوہناں دی ہیلتھ انشورنس گھٹا دتی۔ بہوں سارے یورپی واپس وی گئے۔ کجھ لوک سمجھدے نیں پئی ہن بریگسٹ والا فیصلہ ہورے واپس ہوجائے پر ایہہ ہو نہیں سکدا۔ یورپی یونین دی قنوناں پاروں 9 مہینے دے اندر اندر برطانیہ نوں آرٹیکل 50 دی درخواست دینی ہے ہر صورت۔ ہن کدی ایہہ پارلیمنٹ جارہے نیں کدی عدالت وچ پر ایس نوں کوئی روک نہیں سکدا۔ ایس درخاست بعدوں وی دوسال دا ٹائم لگے گا کیونجے بہوں سارے معاہدے نیں جہناں نوں مڑ نویں صورتحال پاروں بدلیا جائے گا۔ دفاع توں لے کے تعلیم تک بہوں وڈا پواڑا ہے۔ برطانیہ لئی ایہہ دو سالاں دا ٹائم بہوں اوکھا ویلہ ہے۔ اک ہور وڈا مسئلہ سکاٹ لینڈ دا ہے جس وچ 60 فیصدی لوکاں نے بریگسٹ خلاف ووٹ دتا ہے۔ تہانوں یاد ہوسی پئی برطانیہ دی ایس تھاں یعنی سکاٹ لینڈ وچ کجھ دیر پہلاں یوکے توں وکھرا ہون دے حوالیاں نال ریفرنڈم ہویا سی۔ اوس وچ بڑے تھوڑے مارجن نال برطانیہ وچ رہن حوالے نال فیصلہ ہویا سی۔ اوہ ہن کہہ رہے نیں پئی اساں تے یورپ نال رہنا چاہندے ہاں ایس لئی برطانیہ دے وچ سکاٹ لینڈ دے حوالیاں نال مڑ ریفرنڈم کرواؤ۔ ایہہ اک وڈا مسئلہ ہے کہ کتھے برطانیہ ترٹ ہی نہ جائے۔ ایس بارے ہن اندروں دبا ودھ رہیا ہے۔ اجہے مسلیاں پاروں اج برطانیہ دی اکنامی ہور تھلے جارہی ہے تے بے روزگاریاں وی ودھ رہیاں نیں۔ اج لیبر فورس ملدی ہی نہیں اتے جے مل جائے تے بہوں مہنگی ہے۔ پولینڈ، رومانیہ، بلغاریہ وغیرہ دے لوک نسل پرستی ودھن پاروں برطانیہ توں واپس چلے گئے نیں۔ اجہی سیاستاں نال اج برطانیہ تے یورپ وچ سجے اور کھبے دی سیاستاں وچ ابھار ہے۔ جرمی کوربن وی آرہیا ہے جیہڑا ترقی پسند پالیسیاں رکھدا ہے اتے اوس نیں لیبر پارٹی نوں بدل دتا ہے۔ صادق خان دے مےئر بنن وچ جرمی کوربن دی مدد حاصل سی۔ صادق خلاف نسل پرستیاں تے دھرمی ونڈ نوں ورتیا پر لوکاں اوس پروپیگنڈا نوں نہیں منیا۔ ایہہ سمجھن دی گل ہے پئی نویں لڑائیاں وچ تنگ نظر قوم پرستاں دا انہاں نال ٹاکرا ہے جیہڑے رہتلی رنگا رنگی (Multi culturasim) نوں منیندے نیں۔ ایس ٹاکرے دا اثر اج پوری دنیا تے پئے گا ہے۔ پاکستان وچ وی اک پاسے اوہ نیں جیہڑے کسے دوجے فرقے نوں وی نہیں منیندے۔ رنگارنگی دے خلاف مذہب، فرقہ تے قوم نوں ورتدے نیں۔ امریکہ، فرانس، جرمن، پاکستان، بھارت ہر تھاں تے تنگ نظر قوم پرستاں تے نفرتاں تے سیاستاں کرن والیاں دا سانگا ہے۔ پر دوجے پاسے کھبے دی سیاستاں کرن والیاں دا سانگا وی بن رہیا ہے ۔ کھبے دی سیاستاں وی مڑ تگڑیاں ہورہیاں نیں۔ ایہہ گل بات تنویر زمان ہوراں ایف ایم 103 دے ہفتہ وار پروگرام لوک لہر وچ کیتی جیہڑا لہور سٹیشن تے ریکارڈ ہویا۔ایس پروگرام وچ انہاں دے نال ڈاکٹر سعید الرحمن وی رلتی سن جہیڑے ایف سی کالج یونیورسٹی وچ انگریزی ڈیپارٹمنٹ دے ہیڈ نیں اتے انہاں آسٹریلین نیشنل یونیورسٹی توں پوسٹ کالونیل ازم وچ پی ایچ ڈی کیتی ہے۔تنویر زمان ہوری کھبے دے پرانے کارکن نیں اتے طلبا جتھے بندی این ایس او نال کم کیتا ہے۔اوہ اج کل یوکے دے شہری نیں۔ تساں ایس پراگرام نوں تھلے دتے لنک تے کلک کر کے سن سکدے ہو ۔
http://punjabpunch.blogspot.com/2017/01/listen-radio-show-rise-of-rightist-and.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels