Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> اقوامِ متحدہ دے نویں سیکٹری جنرل تے دکھنی ایشیا

اقوامِ متحدہ دے نویں سیکٹری جنرل تے دکھنی ایشیا

January 9th, 2017

اقوامِ متحدہ دے سیکٹری جنرل بان کی مون نے آپنے عہدے دی مدت پوری کر لئی ہے اتے اوہناں دی تھاں پرتگال دے گزریل وزیرِ اعظم اینٹونیو گوٹیرس نے نویں سیکٹری جنرل دا حلف چُک لیا ہے۔
بان کی مون دکنی کوریا توں ہن اتے اوہ 2007 توں 2016 تکرش اقوام متحدہ دے پردھان رہے۔ ایس توں پہلاں اوہ دکنی کوریا دے وزیرِ خارجہ سن۔
نویں سیکٹری جنرل اینٹونیو گوٹیرس پناہ گزیناں لئی اقوامِ متحدہ دے ہائی کمشنر وی رہ چکے ہن۔ اوہ اقوامِ متحدہ دے نویں سیکٹری جنرل ہن۔ حلف چکن مگروں اوہناں انگریزی، فرانسیسی اتے ہسپانوی بولیاں وچ خطاب کیتا اتے کہیا پئی ایس ویلے دنیا دی انسانی برادری نوں جہڑے بحراناں دا ساہمنا ہے، اوہناں نوں پنگرن توں روکن لئی رل کے ہور زیادہ کوششاں کرنیاں پین گیاں۔ اوہ کہندے ہن کہ کسے وی بحران نوں روکنا کوئی عجیب گل نئیں ہے اتے اقوام متحدہ دے بانیاں اسانوں ایہو کرن لئی آکھیا سی۔ جتھے بحراناں نوں روکن دیاں کوششاں ناکام ہوندیاں ہین، اوتھے دنیا وچ جھگڑے پنگرن لگ پیندے ہن۔

گوٹیرس نے پہلی جنوری نوں کم کرنا شروع کیتا سی۔ اوہناں دے موہرے سب توں وڈے بحراناں وچ وکھ وکھ تھاواں تے جاری لڑائیاں، آتنک وادی دے خطرے اتے موسم دی تبدیلی دے اثر رلتی ہن۔ پر سوجھواناں دا خیال ہے کہ اوہناں لئی سبھ توں اوکھا مسلہ شام وچ جاری لڑائی ہے۔ گوٹیرس کہندے ہن پئی ایہ اک ایہوجہی لڑائی ہے جیس وچ کسے نوں وی جت نئیں ملے گی اتے سارے پکھ جنگ ہار رہے ہن۔ ایس کارن ایہ دنیا لئی خطرہ بن گیا ہے اتے جےکر ایہنوں چھیتی مکایا نہ گیا تاں بہت وڈا نقصان ہو جائے گا۔

پچھلے دناں جدوں کشمیر وچ نیئن ترن ریکھا دے آر پار گولی باری ودھن نال دوویں پکھاں دے فوجی اتے عام شہری مارے گئے تاں گزریل سیکٹری جنرل بان کی مون نے پاکستان اتے بھارت نوں آپنی سیوا پیش کیتی سی پئی جے دوویں دیش چاہون، اوہ کشمیر دے مدے اتے تناؤ گھٹاؤ لئی مدد کر سکدے ہن۔ پاکستان نے تاں ترنت ایہ سیوا قبول کر لئی سی پر بھارت نے انکار دتا سی اتے آکھیا سی کہ کسے باہرلے بندے نوں دوویں دیشان دے آپسی مسلیاں وچ گھسیٹنا اوہ ٹھیک نئیں سمجھدا۔ بان نے دکنی ایشیا دے دو وڈے ملکاں وچ جاری تناو تے ڈاڈھی چنتا ظاہر کیتی سی۔

ہُن با ن کی مون تاں نئیں رہے اتے سوتراں انوسار اوہ شاید دکنی کوریا دے صدر دا چناو لڑن۔ پر کیہ نویں آؤن آلے سیکٹری جنرل گوٹیرس وی بھارت پاکستان وچکار تناو گھٹ کرن اتے کشمیر بارے کوئی کردار ادا کر سکدے ہن۔ ایہ تاں آؤن والا ویلہ ہی دسے گا۔ پر اقوام متحدہ چ پاکستان دی مستقل مندوب ڈاکٹر ملیحہ لودھی نے سیکٹری جنرل گوٹیرس نال ملاقات کیتی ہے اتے پاکستان چ دہشت گردی پھیلا ن وچ بھارت دیاں کوششاں بارے اک ڈوزیئر وی پیش کیتا ہے۔ پاکستانی سفارتخانے دا کہنا ہے پئی ایس ڈوزیئر چ بلوچستان، فاٹا اتے کراچی و چ را دیاں کارروائیاں بارے ہور جانکاری دتی گئی ہے۔

ایس ڈوزیئر دے نال پاکستانی وزیر اعظم دے بیرونی سیواواں اتے سلامتی دے مشیر سرتاج عزیز ولوں ایک چٹھی وی گوٹیرس دے حوالے کیتی گئی ہے جیس وچ بھارتی را دے ایجنٹ اتے حاضر سروس فوجی افسر کلبچن یادو دی گرفتاری اتے اوس کولوں ملن والی جانکاری دی تفصیل وی دتی گئی ہے۔
پر سوجھواناں دا خیال ہے کہ نویں سیکٹری جنرل وی بھارت نوں ناراض کرنا نہیں چاہون گے اتے دکنی ایشیا دے مسلیاں بارے گوٹیرس ولوں کوئی وی کردار ادا کرن دی اُمید رکھنا بے وقوفی ہی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels