Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ضرب قلم: کیہہ محمود غزنوی سومنات دا مندرفتح کیتا؟

ضرب قلم: کیہہ محمود غزنوی سومنات دا مندرفتح کیتا؟

January 7th, 2017

انگریزاں دے ہندوستان دی تاریخ نوں مسلمان تے ہندو واریاں وچ ونڈن دا مقصد دوہاں مذہباں دیاں لوکاں وچ پاڑ پاونا تے حکومت کرنا سی۔ انگریز دی ہندوستانی تاریخ دی دھرمی ونڈ(اپنے وارے نوں اوہناں عیسائی نہیں کہیا) نال کئی بھلیکھے پیندے ہین۔ ایس طرحاں دی ونڈ دے نال دوہاں مذہباں دے قوم پرست اکدوجے دے خلاف اپنی اپنی مرضی دیاں گلاں لبھ لیندے ہین تے ایس طرحاں مذہبی مڈھ پرستی دیاں تحریکاں چلاوندے ہین۔ ایہہ کم اجوکے دور وچ وی ہو رہیا ہے: مسلمان مڈھ پرست مسلمان بادشاہیاں نوں وڈیاندے ہین تے ہندو مسلماناں دے جبر تے ظلم دی گل کردے ہین۔

تاریخ دے مسلمان وارے توں بھلیکھا پیندا ہے جیویں کہ عام مسلمان نال حکمران رئی (رعایت) کردے سن تے ہر ہندو نوں دبا کے رکھدے سن۔ مغلاں دی تاریخ پڑھدیاں بابر دے حملے نوں ایویں دسیا جاندا ہے جو جیویں اوہ ہندو کافراں نال جہاد کر رہیا سی۔ حقیقت تے ایہہ ہے جو اوسدا پانی پت دی لڑائی وچ ابراہیم لودھی نال یدھ پیا سی جیہڑا اوس ویلے دلی وچ لودھی پٹھاناں دی بادشاہی دا آگو سی۔ بابر دے حملے بارے ایہہ بھلیکھا وی پایا جاندا ہے جیویں بابر نے اپنے حملے وچ ہندوواں دا قتلام کیتا تے مسلماناں نوں کجھ نہیں کہیا۔ بابا گورونانک نے بابر دے حملیاں نوں اکھیں ڈٹھا سی تے اوہناں دا کہنا ہے جو بابر نے کسے دا کوئی لحاظ نہیں کیتا تے مسیتاں نوں وی انج ہی ڈھایا جیویں مندراں نوں۔ اوہ بابر دے حملے بارے کہندے نیں:
پاپ کی جنج لے کابلوں دھایا
جوری منگے دان وے لالو
گل مسیتاں مندراں دی ہوون لگی اے تے گل سومنات دے مندر دی وی ہو جاوے۔ مسلمان تاریخ دان کہندے ہین جو محمود غزنوی نے سومنات دا مندر ڈھایا تے اوتھوں جیہڑا سونا ہی نکلیا اوہ سو اوٹھاں تے لد کے غزنی پہنچایا گیا۔ ایس بارے وڈھی تاریخ دان پامیلا تھاپر نے اپنی کتاب "سومنات" وچ بڑی کاہڈ کڈی ہے۔ اوس نے اوس ویلے دے سارے حوالے تے شہادتاں پھرول کے ایہہ نتیجہ کڈھیا ہے جو سومنات دا مندرکوئی ایڈا وڈھا نہیں سی جیس وچ بہت مال دولت اکٹھا کیتا گیا ہووے۔ اوہناں دا کہنا ہے جو ودھ توں ودھ ایہہ مقامی مندر ہووے گا جیہدی نکے نکے راجے امداد کردے ہوون گے۔ دوجے کوئی تاریخی شہادت نہیں ملدی کہ محمود غزنوی اوتھوں تیکر اپڑیا وی سی۔ تسیں آپ سوچو اوس ویلے دے اک نکے جیہے مندر وچوں سو اوٹھاں تے لدن جوگا سونا کتھوں آونا سی۔ سومنات تے محمود غزنوی دی فتح دی ساری کہانی فرضی لگدی ہے۔ پر ایہہ کہانی جیوندی ایس واسطے رہئی کہ مسلمان تاریخ دان اپنے بادشاہ دیاں کارنامیاں نوں ودھا چڑھا کے دسنا چاہندے سن تے ہندو قوم پرست ایس نوں مسلماناں دے ظلم تے جبر دے ثبوت دے طور پیش کرنا چاہندے سن۔ ہندو قوم پرست ایہہ وی ثابت کرنا چاہندے سن جو ہندوستان مسلماناں دے آون ویلے کڈا امیر سی۔

پاکستان وچ جو تاریخ پڑھائی جاندی ہے اوہدے سومے اوہ تاریخ دان ہین جیہڑے مسلمان باشاہاں دے نال آئے سن یا اوہناں دے درباری سن۔ اہناں تاریخ داناں دے ذمے سی جو اوہ بادشاہاں نوں وڈیاون تے اوہناں دے ناں وڈے وڈے کارنامے لاون تاں جو اوہناں دے اپنے وطن (افغانستان ایران) وچ اہناں بادشاہاں دی دھاک بیٹھ جاوے۔ پاکستان بنن مگروں تاریخ بارے کوئی کاہڈ نہیں کڈہی گئی کیوں جے پاکستان دے نویں حکمران مسلمان اشرافیہ دی تاریخ ہی لوکاں نوں پڑھانا چاہندے سن۔ پاکستان وچ پاکستان دیاں لوکاں دی تاریخ نہ لکھی گئی ہے تے نہ ہی پڑھائی گئی ہے۔ تاریخ دے ناں تے باشاہاں دے فرضی قصے کہانیاں پڑھایاں جاندیاں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels