Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ضرب قلم: مڈھلی گل (لڑی ۱)

ضرب قلم: مڈھلی گل (لڑی ۱)

January 6th, 2017

وزیر اعظم نواز شریف نے اکیڈمی آف لیٹرز دے اکٹھ وچ لکھاریاں نوں للکاریا ہے جو اوہ ات واد دے خلاف اپنی قلم دی سٹ مارن۔ ایس کم لئی اوہناں پنجاہ کروڑ روپئے وی دین دا اعلان کیتا۔ ظاہر گل ہے جو وزیر اعظم دے بیان دے پچھے ایس گل دا مننا ہے جو پاکستان وچ ات واد دی مڈھلی وجہ اوہ بیانیہ ہے جیہڑا جہادی پیدا کردا ہے تے دھرم دے پکھوں لوکاں وچ نکھیڑ پیدا کردا ہے۔ پاکستان دے خلاف لڑن والے جہادیاں دا تے فوج نے کافی حد تائیں مکو ٹھپ دتا ہے پر سماج وچوں اوہ کارن نہیں مکائے گئے جیہڑے ات واد نوں پیدا کردے نیں۔

پاکستان وچ ات وادمذہبی نفرتاں وی پیدا کردا ہے تے سماج دی کل (اجتماعی) سوچ نوں وی سوڑا کردا ہے۔ پاکستان وچ اجیہی سوڑی سوچ پیدا ہو چکی ہے جو گھٹ گنتی دے مذہب تے فرقیاں دیاں لوکاں دا جینا حرام ہو چکیا ہے۔ سوال ایہہ پیدا ہوندا ہے جو ایس ڈھنگ دے سوڑے تے زہریلے وچار کیویں پیدا ہوئے۔ بہت سارے اجوکے سوجھوان ایس دیاں جڑاں ضیاالحق دی اسلامئزیشن تے افغان جنگ وچ لبھدے ہین۔ ایہہ گل بڑی حد تائیں ٹھیک وی ہے جو ضیاالحق نے مذہبی ات واد نوں کافی چکیا تے ایہہ وی ٹھیک ہے افغان جہاد دے ناں تے بہت کجھ لکھیا تے بولیا گیا جیہڑا اخیر مذہبی ات واد دی شکل وچ سامنے آیا۔

پر اسیں ویکھنے آں جو ضیاالحق دے آون وچ قومی اتحاد نے مڈھلا کم کیتا سی تے اوسدا نعرہ سی نظام مصطفےٰ قائم کرنا۔ ایس توں پہلاں بھٹو دور وچ احمدیاں نوں غیر مسلم ہونا متھیا گیا سی ، جمعے دی چھٹی، شراب تے گھوڑ دوڑ تے روکاں لگ چکیاں سن۔ بھٹو توں پہلاں یحیی خان نے وی اسلامی قانون بنائے سن تے اوہدے جرنیلاں نے (جنرل شیرعلی خان وغیرہ) تعلیمی اداریاں تے میڈیا وچوں اوہناں لوکاں نوں کڈھوایا سی جیہڑے اوہناں دی اسلام پسندی دے پیمانے تے پورے نہیں سن اتردے۔ ایس توں پہلاں جنرل ایوب خان کشمیر جہاد دے ناں تے ایس پاسے پیر پٹیا سی۔ جے ہور دھر پچھے چلے جائیے تے اسلامئزیشن دی کہانی قرارداد مقاصد دی منظوری توں شروع ہو گئی سی۔

مکدی گل ایہہ ہے جو ات واد دے پچھے ریاست دا مذہبی بیانیہ ہے جیہڑا پاکستان بنن توں تھوڑا چر مگروں ہی شروع ہو گیا سی۔ ایہو ہی نہیں سگوں اہدیاں نیہاں انگریز وارے وچ رکھیاں جا چکیاں سن: انگریز نے تاریخ نوں ہندو تے مسلمان واریاں وچ ونڈ کے ہندوستان وچ مذہبی نکھیڑے دا مڈھ بنھ دتا سی۔ انگریز دا دتا ہویا ایہہ بیانیہ اج وی منیا جاندا ہے جیس کرکے تعلیم دے سلیبس وچ اسلامی دور دے ناں تے مسلمان باشاہاں نوں وڈیایا جاندا ہے۔ باہروں آکے حملہ کرن والے دھاڑویاں نوں ہیرو بناکے وکھایا جاندا ہے۔ ایس گل تےکوئی چانن نہیں پایا جاندا جو ایہہ باہروں آون والے دھاڑوی ہندوواں تے مسلماناں وچ کوئی فرق نہیں کردے سن تے دوہاں نوں اک ہی طرحاں قتل کردے تے لٹدے سن۔ (جاری)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels