Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> جیون دی وار:کجھ اکھر سسی تے سوہنی دے یقین بارے (پہلی لڑی)

جیون دی وار:کجھ اکھر سسی تے سوہنی دے یقین بارے (پہلی لڑی)

عزیز الدین احمد
January 2nd, 2017
5 / 5 (3 Votes)

ا ک ’’دلے‘‘ دی وار ہے، اک’’ نادر‘‘ دی وار ہے تے اک’’ چٹھیاں‘‘ دی وار ہے ۔پر اک جیون دی’’ وار‘‘ وی ہے۔جیون دی جنگ سب توں پرانی تے سبھ تو ں اوکھی تے سبھ توں وکھرے طریقے نال لڑی جاون والی جنگ ہے ۔ ایہ جنگ نہ تے زورآوری نال بھرتی کیتی گئی لوکائی لڑدی ہے، نہ تنخواہ دار سپاہی تے نہ کرائے تے لڑن والے فوجی۔ایہ من مرضی دی جنگ ہے جنہوں پگدی ہے، آجاندا ہے، جنہوں نہیں پگدی ،اوہ نہیں آوندا۔ ایس جنگ لڑن آلیاں نوں دنیا دار’ سودائی‘ آکھدے نیں۔اتے سودائیاں نوں وٹے وی وجدے نیں۔اج تیکر کسے مجنوں ایہہ گلہ نہیں کیتا پئی اوس بڑی قربانیاں دتیاں نیں۔
جیون دی جنگ وچ جس شے دی سب توں پہلاں لوڑ ہے اوہ جثے دا زور نہیں، پر اپنے مقصد دا یقین تے اوس توں پیدا ہوون والی نابری ہے۔ چننگ اگر موجود ہووے تے پھوکاں نال اوس دا بھانبڑ بنایا جا سکدا ہے۔ پر خالی مٹی نوں سو سال وی پھوکاں ماردے رہو اوہ چننگ نہیں بن سکدی ۔
ایہو چننگ جد مرزے وچ پیدا ہوئی تے اوس’ گرم رضائیاں چھڈ کے تے ملی ساندل بار‘۔ایسے تراں ایہ چننگ، سسی تے سوہنی وچ بھانبڑ بن گئی سی۔ سسی وچ ایس کیہ رنگ وکھایا اوہدا ویرو اہاشم شاہ نے کیتا ہے،
نازک پیر ملوک سسئی دے تے مہندی نال سنگھارے
بالو ریت تپے وچ تھل دے جیون جو بھنن بھٹیارے
ہاشم ویکھ یقین سسی دا اسیں صدقوں مول نہ ہارے
جے تسی سوہنی تے اوس دا کچے گھڑے دے سہارے ٹھاٹھا ں ماردے تے گھڑیا لاں بھرے چناں وچ چھال مارن دی داستان دا اصل مطلب سمجھنا ہے تے شاہ لطیف دے سر سوہنی نوں پڑھو۔شاہ نے ایس دے اندر عشق دی چننگ بارے جو ڈونگیا ں گلاں کیتیاں نیں ؂ اونہاں نوں اج دے د ور دے اک سرکڈہویں شاٗعر شیخ ایاز نے اردو دے وچ ڈھا لن دی کوشش کیتی ہے ،

کہیں پر ہول دریاؤں کے ڈر سے
چلن بدلا ہے اپنا عاشقی نے
خوشا وہ جذبہ ایثار الفت
جسے اپنا لیا تھا سوہنی نے

اگر ہے ڈو بنے کا شوق تم کو
تو بے خوف و خطر دریا میں آؤ
ننطر آئے اگر ساجن کی نیا
تو بھولے سے نہ ہا تھ اس کو لگاؤ
کٹھن ہے یہ ملن کی ریت لیکن
جہاں تک نبھ سکے ہنس کر نبھاؤ

جیون دی جنگ شروع ہوئی سی جدوں کئی ملین سال پہلا ں جاندار پیدا ہوئے ۔جد اینہاں انسان دی شکل اختیار کیتی تے اودوں ایہ دھرتی تے برفا نی سما ں ہولے ہولے مکن دے ول جا رہیا سی۔ اج تیکر دی سائینسی جانچ پڑتال موجب افریقہ تو ں چند سیکڑے پریوار نگھی تھاواں دی کھوج وچ نکلے،تے ایشیا ، آسٹریلیا ، یورپ تے ریڈ انڈین لوکاں دی شکل وچ امریکا تیکر جا آپڑے ۔
ایہ سفر بہت اوکھا کم سی ۔ شروع وچ کئی ایسے سیانے وی ہوون گے جنہاں آکھیا ہوسی پئی ایتھے ہی بیٹھے رہوکیونجے اگے سمندر ہے۔ تہاڈے پیو دادیاں وچوں اج تیکر کوئی ایس نوں پار نہیں کرسکیا اتے نہ تسی کر سکدے ہو۔اوہ جنہاں اندر چننگ سی،اوہ چل پئے ۔ ادوں انہاں نوں وی پاگل آکھیا گیا ہو سی۔جہیڑے لوک’ نویں دنیا‘ دی کھوج وچ نکلے اونہاں نے غلطیاں وی کیتیاں۔اونہاں وچوں کئی ڈب گئے ، کئی جنگلی جنورا ں کھاہدے، پر سفر جاری ریہا ۔
ہر نویں تجربے وچ کوتاہیاں ہونیاں لازم جے ۔ جہیڑے سیانے کوتاہیاں توں ڈردے گھر بیٹھے رہے۔پراوہ، سارے دے سارے، اوس پوری نسل دے نال، جیہڑی اونہاں دے آکھے ’نوویاں راہواں‘ دی کھوج وچ نہیں نکلے،اخیر، برفاں ہیٹھاں دبے گئے۔اج دنیا دی ساری حیاتی ایہناں ہی’ پاگلاں‘ دی دین ہے جنہاں افریقہ تو ں نکلن دا چیلنج قبولیا۔
نویاں راہاں تے نکلن والیاں، بھیڈاں، بکریاں چاریاں ، کھیتی باڑی کیتی تے انہاں دا جیون پہلاں توں چنگا ہوگیا۔ پر ایس نوویں جیون نال وی سفر نہیں مکیا۔حقیقت تے ایہ ہے،پئی سفر کدی وی نہیں مکدا ۔
پہلاں، بندی وانی نظام خلاف تے پھیر جاگیرداری نظام خلاف چننگ بھڑکن لگی۔ فیر سیانیاں سمجھایا ، چھاتیاں کھول کھول، گھاہ وکھائے، . ساتھیاں دی بے وفائیاں دا گلہ کیتا،ہاریاں ہوئیاں جنگاں دیاں کہانیاں سنائیاں ،دشمناں دی طاقت توں ڈرایا، پر چننگ والے’ نویں مورچے‘ لا ون توں باز نہ آئے۔ اوہ کراہے وی پئے، کیونجے نویں راہ لبھن والیاں کولوں ہمیش غلطیاں ہو ندیاں نیں۔ پر ایہناں غلطیاں کیتے بغیر نواں رستہ نہیں لبھدا۔ ایہہ لوک کئی جنگاں ہارے ، کئی شیہنہ جوان پھٹر ہوئے ، کئی لڑدے لڑدے تھک گئے ، کئی مارے گئے ۔پر نوویں رستے لبھ گئے۔
ہر لمی جنگ وچ کئی مورچے لگدے نیں۔ لڑائی توں پہلاں کسی مورچے دے کامیاب ہوون دی کوئی گارنٹی نہیں دے سکدا۔کئی لڑائیاں ایہہ جانن دے باوجود وی لڑیاں جاندیاں نیں کہ ایہہ ناکام ہوون گیاں۔کیونجے ایہہ لڑائیاں ایس لئی لڑنیاں ضروری ہوندیاں نے کہ انہاں دے بغیروڈی جنگ نہیں جتی جاسکد ی۔ کئی واری، دشمن دی طاقت تے اپنیاں کمزوریاں دا اندازہ ٹھیک نہیں لگایا جاندا ، یا جنگ وقت توں پہلاں شروع کر دتی جاندی ہے۔کئی جگہ کمانڈر غلطی کردے نیں تے. کئی وار سپاہی مورچہ چھڈ جاندے نیں۔
جے’ نویں رستے‘ تے پین توں پہلاں ہر کوئی ایس دے سپھل ہوون دی گارنٹی منگدا تے دنیا دے وچ اک پنڈ توں دوجے پنڈ تیکر جاون او الیاں پگڈنڈیاں توں سوا کجھ وی نہ ہوندا۔ (جاری جے)


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels