Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> نصابی کتاباں وچ ڈکٹیٹراں دی سیوا: جمہوریت نال ویر

نصابی کتاباں وچ ڈکٹیٹراں دی سیوا: جمہوریت نال ویر

December 31st, 2016

جے اساں نصابی کتاباں وچ آمریتا ں خلاف خموش رواں گے تاں فیر نویں نسل نوں اساں کیہ پیغام دے رہے ہاں۔نرا دھرنیاں نوں رگیدن دا کوئی فیدہ نہیں سگوں بیانیہ بدلنا لوڑی داجے۔تہاڈا دھیان نصابی کتاباں ول نہیں تے پھیرمیڈیا یادوجے گروہاں تے تنقیداں نہ کرو۔ میرے سامنے پنجاب ٹیکسٹ بک بورڈ دی 9 ویں تے 10 ویں دی مطالعہ پاکستان دی کتاباں نیں۔9 ویں د ی کتاب دے لکھاری محمدحسین چوہدری تے مسزاعظمی اعظم نیں۔ستمبر2016 وچ ایس داتریجاایڈیشن چھاپیا گیا سی۔دسویں دی کتاب دے لکھاری دا ناں پروفیسر(ر)آفتاب احمدڈار جے۔کتاباں دی پڑچول تے لکھاں روپیئے دتے جاندے نیں۔کئی کمیٹیاں انہاں دی منظوریاں دیندیاں نیں۔انہاں کتاباں وچ بچیاں نوں چاروں ڈکیٹراں بارے دسیا گیا ہے۔ حیران نہ ہونا، ٹیکسٹ، بک بورڈ مطابق نرے مشرف دور نوں ’’فوجی قبضہ‘‘ آکھیا گیا ہے پر پرانے تینوں آمراں بارے سرخیاں ہور نیں۔کیہ ایہہ ویلے دے حکمراناں نوں خش کرن دارواجی ’’بابو‘‘ طریقہ ہے؟ جے ایوب،یحی اتے ضیا ڈکٹیٹر نہیں سن تے مشرف کنج ڈکٹیٹر ہویا؟جے نصابی کتاباں وچ جنرل ایوب دی برکتاں ہی پڑھائیاں جاون گیاں اتے ضیا شاہی بارے ہتھ ہولارکھیا جائے گا تاں فیر بچیاں کولوں، نویں نسل کولوں کیہ امیداں رکھو گے؟۔ ایوب یحیٰ تے ضیا الحق بارے جیہڑے جملے 9 ویں، 10 ویں وچ بچہ پڑھے گا اوہ فیر مشرف دے حق وچ ہی رہے گا بھانویں تساں سرخی ’’مشرف دا قبضہ‘‘ ہی لادیو، جنج 10 ویں دی مطالعہ پاکستان دے صفحہ 24 تے لکھیا ہے ۔ڈکٹیٹر تے ڈکٹیٹر ہی ہوندا ہے بھانویں اسلامی ہوئے یا سیکولر۔پنجاب سرکارجے اج وی ایوب تے ضیا دی چمپی کرنا چاہندی ہے تے پھیر مشرف دی مخالفتانں دا اْس کول کوئی جواز نہیں۔
تہانوں ایہہ گل لکھنی ہوسی پئی ایہہ چارو مارشلائی سرکاراں غیر آئینی سن اتے انہاں نے پاکستان نوں کمزور ہی نہیں کیتا سگوں اداریاں نوں وی تنازعیاں وچ رگیدیا۔انہاں چاراں نے اسلام ، جدت پسندیاں تے بلدیاتی بندوبست نوں نراآپدی طاقتاں ودھاون وچ ورتیا اتے سیاسی آگواں تے پاپولر سیاسی جماعتاں نوں توڑیا تے ذلیل کیتا۔ ایس سب نال پاکستان جمہوری دور وچ وڑ نہ سکیا۔ پہلا آئین 1956 وچ بنایاگیا سی اتے آئین بناون والیاں وچ اکثریت تحریک پاکستان وچ کم کرن والیاں دی سی۔ اس آئین دے تحت پہلی چوناں جنوری 1959 وچ ہونیاں سن پر اکتوبر1958 وچ ایوبی مارشلا آگیا۔کرپشن دا ایوبی قنون ’’ایبڈو‘‘ مخالفاں نوں نکرے لاون دا گھن چکر سی۔ایوب دے خلاف لوکاں لمیری جدوجہداں کیتیاں اتے جدوں ایوب نوں کڈہن دا ویلہ آیا تے اوس نے سپیکر قومی اسمبلی نوی اقتدار نہ دتا اتے یحیٰ خان آوڑیا۔ 13 سالاں دے دو مارشلاواں پاروں ملک ہی ترٹ گیا۔ 1973 وچ سیاستداناں ملک نوں متفقہ آئین دتا اتے بہوں سارے قنون وی اسمبلیاں بنائے۔ویلے سر چوناں ہوئیاں پر 5 جولائی1977 نوں’’دھاندلیاں‘‘ دا بہانہ بنا کے اک وار فیرنواں ڈ کٹیٹر ضیا الحق آوڑیا اتے اوس نے افغان جہاد وچ سانوں واڑ دتا۔ افغان مہاجرین دے نال نال ساڈی سوسائٹی وچ اسلحہ تے نشے(ہیروئن) آئے تے فرقہ پرستی وی ودھ گئی۔مادرپدر پرائیوٹائزیشن وہ آئی تے پبلک اداریاں دا بیڑہ غرق ہویا اتے صوبیاں نوں لڑائیا گیا۔ ضیا الحق دے مرن بعدوں جمہوریت بحال ہوئی پر کسے وی حکومت نوں چلن نہ دتا کیونجے آمرتیاں دی اولاد سرکار وچ طاقتور سی۔ 12 اکتوبر نوں اک وار فیر مارشلاء لادتا گیا۔ 2008 نوں جمہوریت مڑ بحال ہوئی اتے 8 سال توں ملک وچ جمہوری بندوبست چل رہیا ہے۔پر ایہہ سب کجھ نصاباں وچ نہیں۔
چاروں آمراں نے ریفارمز کرن دی بڑکاں لائیاں پر کیونجے انہاں دا عوام اتے میقول سیاسی جماعتاں نال ویر سی تاں مارے اوہ سب ناکام ہوئے۔انہاں چاروں آمراں دے ویلے وچ پاکستان اتے اْس دے ادارے کمزور ہوئے جس پاروں وڈی طاقتاں نے من مرضیاں دے فیصلے کروائے۔ جدوں تیک تساں نصابی کتاباں وچ آپدے بیانیے نہیں بدلوں گے، نرا جمہوری میثاقاں دی گل کرن نال کوئی فرق نہیں پئے گا۔ اج سارے سیاسی کارکناں نوں ایہہ ویکھنا ہوسی پئی اساں سندھ ، پنجاب، بلوچستان تے خیبر پی کے وچ آپدی نویں نسل نوں کیہ پڑھارہے ہاں۔ سیاسی کارکناں دی جدو جہداں بارے تے اک سبق نہیں نہ ہی آمراں خلاف چلن والیاں لہراں دے ناں ہی دسے گئے نیں کہ اینج جمہوریت بارے ساڈے بچے کیہ سوچن گے؟ نصاباں نوں بدلو، پاکستان آپوں بدل جاسی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels