Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> اوباما دی اخباریاں نال آخری ملنی

اوباما دی اخباریاں نال آخری ملنی

December 20th, 2016

امریکہ دے صدر براک اوباما نے آپنی اخیرلی پریس کانفرنس چ آکھیا ہے پئی جدوں اوہناں اٹھ ورھے پہلاں دیش دے صدر دی گدی سنبھالی سی ، اوس ویلے دی تلنا وچ ہُن امریکہ دی حالت بہت ودھیا ہے۔ اخباریاں نال ملن مگروں اوہ آپنے پریوار سنہے ہوائی ٹُر گئے جتھے اوہ کرسمس اتے نویں سال دی چھٹیاں مناون گے۔
 
صدر اوباما 20 جنوری 2009 نوں امریکہ دے 44 ویں صدر بنے سن۔ ایس پریس کانفرنس وچ اوہناں ایس ورھے چ آپنی سرکار دی سپھلتا اتے ناکامیاں دا خوب چرچا کیتا۔ صدر اوباما نے ایہ گل منی کہ اوہناں دی سرکار نوں جد ایہہ پتہ لگیا پئی روس نے ڈیموکریٹک نیشنل کمیٹی دا ای میل سسٹم ہیک کیتا سی تاں اوہناں ستمبر وچ چین چ ہون والے G-20 اجلاس دوران روس دے صدر ولادی میر پوٹن نوں باز آؤن لئی آکھیا سی۔ اوباما کہیا پئی امریکی انٹیلجنس دے اہلکاراں نوں چھ مہینے پہلاں ای پتہ چل گیا سی کہ روسی ہیکر اں نے ڈی این سی دی ای میلاں ہیک کر لئیاں سن۔ اوہناں دسیا پئی اوہناں دی سب نوں وڈی کوشش ایہہ ای سی کہ انٹرنیٹ راہیں روسی ہیکراں دا دھاڑا بوہتا اگے نہ ودھے جس کارن وڈی سمسیا کھڑی ہو سکدی ہووے اتے چوناں دے عمل اتے اس دا کوئی اثر پوے۔
 
اوباما نے دسیا کہ جدوں ستمبر چ چین وچ اوہ روسی صدر پوٹن نوں ملے سن تاں اوہناں سوچیا سی اوہناں نوں پوٹن نال سیدھی گل کرنی چاہیدی ہے۔ اوہناں پوٹن نے باز رہن لئی آکھیا اتے کہیا جے پوٹن نے ایہہ کم نہ چھڈیا تاں ایس دے بڑے خطرناک نتیجے ہوون گے۔ اوباما دا خیال ہے کہ پئی ایس ملنی مگروں امریکی چوناں تے پین والا خطرہ گھٹ گیا سی پر وکی لیکس توں نکلن والی گُپت جانکاری نے ڈاھڈا نقصان اپڑایا ہے۔

ایس دے باوجود امریکہ دے بہت سارے سوجھوان صدر اوباما دی نکھید کردیاں کہندے ہن پئی اوہناں ایس مسئلے نوں حل کرن لئی پریاپت نئیں کیتا ہے۔ اوہ کہندے ہن کہ ایس گل دی پوری پوری سنبھاونا موجود ہے کہ روسی ہیکنگ دا اثر چوناں دے نتیجیاں تے وی پیا ہووے گا جیس وچ رپبلکن پارٹی دے ڈونلڈ ٹرمپ نے ڈیموکریٹک پارٹی دی ہلری کلنٹن نوں ہرایا سی۔ پر اوباما نے اخباریاں نوں دسیا کہ اوہناں ایس مسلے نوں اوسے طراں سنبھالیا جیس طراں ایس نوں سنبھالنا چاہیدا سی۔ اوباما نے البتہ ایہ گل منی کہ اج دے ڈیجٹل کلچر وچ رہندیاں ہویاں ایس تے سخت سائیبر سکیورٹی لاگو کرنی چاہیدی ہے۔

آپنی کمزوریاں اتے ناکامیاں دی چرچا کردے ہویاں اوبامہ ہوراں کہیا کہ شام وچ جاری لڑائی اوہناں لئی سب توں وڈا مسلہ رہیا ہے۔ اوہناں نے آکھیا کہ ہُن اوہ سوچدے ہن کہ ایس مسلے نوں حل کرن لئی اوہ کیہ کجھ وکھرا کر سکدے سن کیوں جے اوتھے جاری خانہ جنگی نوں روکیا جا سکے۔ اوباما شام وچ جاری خانہ جنگی لئی ایران اتے روس تے آروپ لگاندے ہن۔ اوباما ایس گل نوں وی مندے ہن کہ جے امریکہ نے اوس علاقے وچ زیادہ امریکی فوجی گلہے ہوندے تاں حالات چنگے ہو سکدے سن۔

اوباما کہندے ہن کہ اوہناں دے دور دے سب توں ودھیا کم ہیلتھ کیئر پرگرام اتے اسامہ بن لاڈن نوں لبھ کے ختم کرنا ہین۔ ایس توں علاوہ بے روزگاری وی بہت گھٹ ہوئی ہے اتے اوہ ایناں کامیابیاں تے فخر کردے ہن۔ پر سوال ایہ ہے پئی اتہاس اوباما دے دور بارے کیہ لکھے گا۔ ایہ تان آؤن والا ویلا ہی دسے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels