Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بلاول دیاں بڑھکاں تے ملواناں دی ہک تڑی

بلاول دیاں بڑھکاں تے ملواناں دی ہک تڑی

December 20th, 2016
5 / 5 (1 Votes)

اجکل سندہ دے وچ خاص طورتے باقی ملک وچ عام طور تے پیپل پارٹی (پیپلز پارٹی) نوں سیکیولر تے لبرل بڑھکاں مارن دا شوق آ پیا ہے۔ مطلب کہ میرے خیال وچ ملک دیاں دو ہاں تناں پارٹیاں (عوامی نیشنل پارٹی تے متحدہ الطاف) سمیت پیپل پارٹی دا روپ بہروپ اوہی سیکولرتے لبرل دسدے نیں تے اوہدے وچ میرے حساب نال ایہ کوئي زیادہ غلط گل وی نہیں پر اوہناں نے کتیا اوہی ہے جو اوہناں نوں طاقت تے اقتدار دے حوالیاں نال وارا کھاندا ہے، ایس واسطے تسی ویکھو جیالیاں دا چیئرمین بلاول زرداری بھٹوکدی مندراں وچ جاکے پیا دیوالی تے ہولی پیا مناندا ہے تے سنتاں تو کمبلاں دے تحفے پیا لیندا ہے تو کدی عسائیاں دیاں گرجیاں وچ جا کے کھلوندا ہے تے ہور تے ہور کداں سر اتے ساوی پگ تے گل وچ سلیٹی چادر پا کے سنی تحریک والیاں نال دسن وچ پیاا آوندا ہے۔ ایہہ اوہوہی ساوی پگڑ والے نیں جنہاں وچوں ممتاز قادری بنیا سی۔
ایہ اوس پدھروی گل وی نہیں جیہڑا اوسدا نانا کردا سی تے استاد دامن کہندےسن "کدی شملے تے کدی مری جارہیاں" غور نال ویکھو تے مینوں کدی کدی فارسی دے مہان شاعر تے صوفی حافظ شیرازی دیاں بلاول دی ایہہو جیہاں حرکتاں ویکھ کے سطراں چیتے آونیاں:
حافظ گر خیر خواہی بہ خاص و عام
بہ مسلماں اللہ اللہ بہ برہمن رام رام
مطلب کہ اوہ ہی صوفی غلام مصطفی تبسم ہوراں والی گل کہ بھئي سکھی وسناں جے تو چاہناں ایں میرے غالبا ایس جہان اندر۔ یعنی کہ حافظ شیرازی کہندے سن "حافظا! جے توں کسے خاص تے عام نال سکھ چین چاہندا ایں تے مسلمان نال اللہ اللہ تے برہمن نال رام رام کر کے رکھیں۔" تسی تے اساں جاندے ہی  آں کہ زرداری دا نیانا کوئي اج دا حافظ شیرازی یا صوفی تے ہے نہیں۔ ایہہ تے کرسی دی کھیڈ ہے، تے فیر اوس کرسی دی کھیڈ کھیڈن لئي جے لوڑ ہوندی تے فیر اوہنوں تسیں فضل الرحمان جیہے کٹھ ملوانے نال جھپی پاوندے تے اوہدا چماں لیندے وی ویکھدے ہو۔ ایہو کہ بھئی! دسو نی سہیلیو!
میں تہانوں دسداں آں۔ ایہہ اپنے جمن لاتوں پیپلز پارٹی دی ریت رہی ہے کہ تسی کھائو پیو دوستاں تے ساتھیاں نال رج کے یعنی کہ سیکیولر تے لبرل وچاراں تے سوجھواناں نال، تے بھکے تسےعوام نال تے باقیاں نال سووون ویلے جاکے مسیتے وڑ جائو ملواناں نال۔ پیپلزپارٹی کیہہ عوامی نیشنل پارٹی (یعنی نیپ) ورگی اصلی تے وڈی سیکیولر پارٹی دا وی اوہی حال سی۔ ایہو کارن سی تے انیہہ سو ستر دی چوناں توں وی پہلاں اونہاں دا اوس وقت لہندے پاکستان وچ چوناں تے چوناں تو مگروں جیہڑا ایکا بنیا سی اوہ دو صوبیاں اودوں دا صوبہ سرحدتے بلوچستان وچ مولانا مفتی محمود نال اونہاں جمعیت ععلمائے اسلام نال بنیا سی۔ اوس دا چیتا ہ ہوئے گا تہانوں بہتیاں نوں کہ سرحد وچ جے گورنر ارباب خلیل سن تے وڈا وزیر یا چیف منسٹر مولانا مفتی مجمود سن۔ اوہ ملتان دے مدرسے دارالعلوم قاسمیہ توں اٹھ کے چیف منٹر صوبے سرحد یا پختون خواہ دے بنے سن۔۔ تے شراب تے وی پابندی لائي پورے صوبے دے وچ تے جمیعت دے ملوانے مسیتاں وچ کہندے پھردے خطبیاں وچ کہ نظام شریعت دا صوبے سرحد وچ نافذ ہوگیا تے بھٹو نوں وی اونہاں دے دورے دے وج صوبے وچ شراب نہں ملدی۔ خیر ایہہ تے بڑھکاں سن اونہاں دا کوٹا اونہاں دے نال ہوندا سی جیہدا سارا بندوبست اسلم خٹک کردا سی۔ اوہناں نے کیہڑا ساڈے ورگیاں وانگ گتیاں (ٹھیکیاں) تے جا کے لینا سی! ہن پیپل پارٹی دی سندہ وچ حکومت ہے تے سندہ ہائیکورٹ دے جج نے صوبے وچ شراب دے ویچن تے پابندی لائي ہوئی ہے۔صرف ایس کم وچ عدلیہ کجھ زیادہ ہی ازاد ہے۔
مگر ایہہ وی تہانوں داسدا چلاں کہ ایہہ نیشنل عوامی پارٹی سی جیہڑی انیہہ سو چوہتر وچ سکیولر ہون دے باوجود قومی اسمبلی وچ احمدیاں نوں غیر مسلم اقلیت قرار دتے جان نوں ووٹ دیندی سی۔ تے دتا سی۔ چلو۔ مزے دی گل اہہو ہے کہ پیپلزپارٹی دے نائب صدر تے قومی اسمبلی دے ممبر ، شاعر تے صوفی منش پیر مخدوم محمد زمان طالب المولا قومی اسمبلی وچ احمدیاں نوں غیر مسلم قرار دین لئی ووٹاں دے ویلے اوس دینہہ خود نوں غیر حاضر کیتا سی تے اسمبلی توں پرے رہے سن۔ واحد ایم این سن جنہاں نے ووٹ نہیں دتا اس طرح۔ میرا ہک گدی نشیں پیر تے دوست کہندا ہے" اساں تے اپنے مرشد نوں خدا مندے ہاں جے ایہہ نبی مندے نیں تے کیہڑا اسمان ڈگ پیا جے!"
عحیب جیہا چوں چون دا مربہ بنایا سی ایس پارٹی دے بناون والیاں نے۔ کہندے اسلام ساڈا دین ہے تے سوشزم ساڈی معشیت"
تے سندھی زبان وچ سندہ تے ہند دے مہاں شاعر شیخ ایاز نے اوس تے اک بیت کہیا سی:
سوشلزم اسلام وچ زم زم وچ وڈکا
ملاں کڈہ نہ اڈکا (حیران)
ایہہ داروہے گآ دین دا

تسی ویکھیا تے ساری دنیا نے ویکھیا بھٹو صاحب اپنی حکومت دے آخری دناں وچ ملواناں دی وکٹاں تے کھیڈن لگے تے مارے گۓ۔ جمعے نوں چھٹی۔ اتوار دی چھٹی ختم شراب چکلے کلب جواگھر بند ۔ تے اوہناں دی خود چٹھی ہو گئ۔ ملواناں دی وکٹ تے کھیلن کوئي سوکھا کم نہیں سیکیولراں لئي، جناح تے کموانسٹاں نے وی ہندوستان وچ ایہو کم کیتا سی ۔ مسلم ہاں تے مسلم لیگ وچ آ' انگریزآں تے جناح دی کھیڈمسلماناں لئي ہندوستان وچ وکھو وکھ ملک وچ ہندوستان دے کمونسٹاں دے اڈدا تیر اپنے پچھوڑے لیندے اوس وچ وی شامل ہوگئے تے مارے گۓ۔ کيا جسمانی تے باقی سیاسی موت۔ اوہ تہاڈے فیض اجمد فیض اوہ میجر اسحاق تے او سارے بابے فیر کدی اتے نہيں ہوئے تاریخ وچ۔ چنگا ہویا کہ سجاد ظہیر واپس وطنے ہندوستان نوں ٹر گئے سن۔
تے بھئي قصہ مختصر۔ بلاول بھٹو نوں ہک عظیم طوطے وانگوں اوہدے کھبے پاسے یا لیفٹیے انکلز ایہہ سارے منتر جنتر سکھاندے مندر مسیتے وڑن، متھا ٹیکن، ہولی دیوالی نتال۔ فیض تے شیخ ایاز دیاں نظماں۔ جس طرح طاوق علی ہوراں نے شروع شروع وچ لندنوں اوس منڈے دی ماں نوں اردو وچ تقریراں سکھاونیاں، فیر اوہ ملوانے انکل وی ہن جناں دی پیٹ وچ داڑھی ہے یا ابا جی تے پارٹی دی کرسی دی کیھڈ ہے۔
پچھلے دناں سندہ اسبملی دے وچ ایک ممبر ولوں سندہ وچ اقلیتاں دیاں کڑیاں تے بچے بچياں نوں زبرستی مسلمان کرن توں روکن لئي قانوناں دا بل بھاری اکثریت نال منظور کیتاگیا ۔ مزے دی گل کہ سول سوسائٹی دی کوششاں نال ایہہ بل پیر پگاڑو دی مسلم لیگ فنکشنل دے ممبر نے پیش کیتا سی۔ ساریاں ممبراں دے ولوں اک رائے نال اس منظور کیتے ہوئے بل مگروں ہر پاسے بلے بلے ہوگئي سی تے ساریاں نے ایہو کریڈٹ کلا پیپل پارٹی نوں دینا شروع کیتا سی۔ لبرل بڑے خوش سن، بلے بلے ہو گئی کہ ملواناں دے کیمپاں وچ حشر چک دتا گیا۔ ملواناں دی ماں مر گئی۔ شاہ بھٹائي نے کہیا سی "ملاں مرے تیری ماں۔" میں تہانوں دساں جے سندہ وچ ہندواں دیا ںکڑیاں نہ نسدیاں یا نسائياں جاندیاں ، تے اونہاں دے کڑیاں منڈیاں نوں مسلمان نہ کیتا جاندا تے فیر شاید ہی پاکستان بنننا سی۔ ایہو ہک ہور گل ہے فیر کدی سہی۔ بس بل پیش کیہہ کیتا گیا چوفیر ملوانیاں وچ ہا ہا کار مچ گئی۔ کیونکہ وزیرستان تے مریدکے تو ں بعد سب توں زیادہ کیمپ ،لشکر تے جہادی اجکل سندہ وچ ہن۔ حافظ سعید سمیت سارے آگو اجکل سندہ وچ رہندے ہن۔ صوفیاں دی دھرتی سندہ اتے ہزاراں دے وچ مجمعے حافظ سیعد دےجلسے کھچدے نیں۔دوجے پاسے مولانا فضل ارحمان (جناں دے بارے وچ اونہاں دے والد مولانا مفتی محمود ملتان وچ اپنے ملن والیاں نوں دسدے اوہ اونہاں دے وڈے پتر توں ہوشیار رہون کہ اوہنے پولیس لئي مخبری کرن شروع کتی ہے) جنہاں دی یاری دا دم ہر دم آصف زرداری بھردے رہندے نیں تے اوہناں دا ہک رلتی دوست ڈاکٹر قیوم سومرو آصف زرداری دا سجا ہتھ بنیا ہویا ہے جنہوں پی پی پی نے سینٹر وی بنوایا سی۔ ڈاکٹر قیوم سومرو اصل وچ جیل وچ ڈاکٹر ہوندا سی جتھے اوہدی یاری اس ویلے دے قیدی آصف زرداری نال ہوئي سی)- ایہہ جیلاں دیا ں بنیاں یاریاں وے لوکو! مولانا سندہ آئے تے جلسیاں وچ حکومت نوں تڑي دتی کہ اوراقلتیاں یا کڑیاں دا مذہب زور نال تبدیل کرن خلاف بنےہوئے قانون دا بل واپس لیتا جائے۔ تے اوس گل واسطے حافظ سعید ہوراں ، لشکراں تے دہشت گرداں دے آگو واں تے دوجے ایس طرح دے کن ٹٹیاں نے وی اج دیہاڑے پاکستان دفاع کونسل دے ناں تے کراچی وچ جلسے دے ایک بڑے اکٹھ دی دھمکی دتی ہو‏ئی ہے۔ بس ملواناں دی ہک تڑی تے سندہ وچ پی ی پی دی حکومت نے ایہو بل واپس کرن دی گل کیتی کہ اساں کسے"غلط فہمی" تے بنیا ہویا بل واپس کرن واسطے سوچ رہے ہاں۔ دسو!
اصل وچ تہانوں نہیں پتہ کہ پی پی پی تے ملوانے ایس موقعے تے ایک دوجے دے فطری اتحادی نظر آوندے نیں تے اجے کجھ بہتا چر نہیں ہویا جو شکارپور وچ صوبائي اسمبلی دیاں چوناں وچ پیپل پاررٹی دے امیدوار امتیاز شیخ نوں جتوان لئي جمعیت علمائے اسلام فضل الرحمان دے امیداوار نوں بٹھا دتا گیا سی ۔ ایہو ہی او موقعہ سی جدوں بلاول مولانا فضل الرحمان نوں جھپی پاندے تے اونہاں دا چماں لیندے ویکھے گۓ سن۔ باقی ست خیراں نے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels