Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سندھ طاس معاہدہ: ورلڈ بینک دی ضمانت؟

سندھ طاس معاہدہ: ورلڈ بینک دی ضمانت؟

December 13th, 2016

ورلڈ بینک نے اک وار پھیر سندھ طاس معاہدے وچ ثالثی توں ہتھ کھچدیاں دوہاں ملکاں نوں کیہا ہے جو اوہ جنوری تیکر آپسی گل بات راہیں مسلیاں نوں حل کر لین۔ دوہاں ملکاں وچکار جھیڑا کشن گنگا تے ریتلے دے پن بجلی بناون والے پروجیکٹاں تے ہے۔ پاکستان دی منگ ہے جو ورلڈ بینک اہناں مسلیاں دے حل لئی عدالت بناوے پر ہندوستان دا کہنا ہے جو ایس تے ماہر (ایکسپرٹ) لایاجاوے۔ ورلڈ بینک نے دوہاں دی منگ نوں رد کردیاں کہیا ہے جو اوہ نہ عدالت بنا رہیا ہے تے نہ ہی ماہر لا رہیا ہے سگوں اوس نے کہیا ہے جو دوہیں ملک آپسی گل بات راہیں اہناں مسلیاں دا حل کڈھن۔
سندھ طاس معاہدہ ۱۹۶۰وچ ہویا سی جیس تے ہندوستان دے وزیر اعظم پنڈت جواہر لال نہرو تے پاکستان دے صدر ایوب خان نے دستخط کیتے سن۔ ایس معاہدے وچ ایہہ متھیا گیا سی جو دریائے ستلج، بیاس تے راوی دا پانی ہندوستان نوں ملے گا تے چناب جہلم تے سندھ دا پانی پاکستان نوں۔ معاہدے وچ ایہہ شق رکھی گئی سی جو ہندوستان پاکستان نوں ملن والے دریاواں تے بجلی پیدا کرن دے پروجیکٹ لا سکدا ہے پر اوہ پانی نوں نہ روک سکدا ہے تے نہ ہی ۲۰ فیصدی توں ودھ پانی مقامی لوڑاں لئی ورت سکدا ہے۔ہندوستان نے ایسے شق راہیں کشن گنگا، تے ریتلے ورگے ہائیڈرو الیکٹرک پروجیکٹس بنائے ہین۔ پاکستان دا دعوی ہے جو ہندوستان اہناں پراجیکٹاں راہیں پاکستان دا پانی روک رہیا ہے پر ہندوستان ایس نوں منن توں انکاری ہے۔ ایس جھیڑے دے حل لئی ہندوستان اک ماہر لوانا چاہندا ہے جدوں کہ پاکستان ایس تے عدالت لوانا چاہندا ہے۔
معاہدے وچ لکھیا ہویا ہے جو جے کر دوہاں دھراں وچ کسے مسئلے تے پاڑ پے جاوے تے اک غیر جانبدار ماہر نوں لایا جا سکدا ہے جیہڑا دسے جو پانی رک رہیا ہے یا نہیں۔ جے کر ماہر ایہہ فیصلہ نہ کر سکے تے شکایتی ملک عدالت بنوان دی منگ کر سکدا ہے۔ ایس عدالت نوں بناون وچ ورلڈ بینک کردار ادا کر سکدا ہے۔ پر ورلڈ بینک دے ماہراں دا کہنا ہے جو ایہہ معاہدہ دو دھراں وچکار ہے تے ورلڈ بینک ایس دا ضامن نہیں ہے۔ ہاں جے دوہیں دھراں منن تے ورلڈ بینک ماہر لا سکدا ہے یا عدالت بناون وچ مدد کر سکدا ہے۔
پاکستان وچ ایہہ گل دھمی ہوئی ہے جو ورلڈ بینک معاہدے دا ضامن ہے تے جے کوئی دھر وی معاہدے دی خلاف ورزی کرے تے ورلڈ بینک ایس نوں روک سکدا ہے۔ حقیقت ایہہ ہے جو ورلڈ بینک کول اجیہا کوئی اختیار نہیں ہے جو اوہ کسے وی دھر نوں جبری روک سکے۔ورلڈ بینک دا کہنا ہے کہ اوہ دوہاں دی مرضی نال ثالثی توں ودھ کجھ نہیں کرسکدا۔ ایسے لئی اوس نے دوہاں ملکاں دیاں منگاں رد کردیاں اوہناں نوں آپو وچ گل بات کرن لئی آکھیا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels