Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> گواچی پچھان

گواچی پچھان

احمد رضا
December 9th, 2016

گواچی پچھان

ویلے دی چنگیائی سمجھئیے یا بھیڑ ایہہ کدی رکدا نہیں، ایہہ چلدا رہندا اے جو ایہدے نال چلیا، ایہہ اوہنوں نال لے کے چلیا، جو ویلے دی رفتار توں تیز چلیا ایہہ اوہدے پچھے نسیا تے جو ویلے دے پچھے نسیا تے جو ایہدے نال نہ چل سکیا اوہ پچھے رہ گیا تے ماضی دا قصہ بن گیا۔
ویلے دے نال رنگ بدلدے نیں، ہواواں تے رُخ بدلدے نیں سوچن دے ڈھنگ بدلدے نیں ایہہ بدلاؤ دو طرحاں ہوندا اے، اک تے فطری جیویں پھُلاں دا کھِڑنا، دُھپاں بعد ہنیریاں دا آؤنا ہوندا اے تے دوجا طاقت دے سِر تے طاقتور قوماں آؤندیاں نیں اوہ ماڑیاں قوماں دا جغرافیہ بدلدیاں نیں، رہن سہن دا طریقہ بدلدیاں نیں، تعلیم دا نظام بدلدیاں نیں تے لوکاں دیاں زباناں دے بدلن دے نال نال اوہ سبھ کجھ بدلدیاں نیں جو ماڑیاں نوں جاگریتی تے اپنے حقاں پاسے لے کے آوے.
سانوں ایہ مننا پینا اے کہ اسیں ماڑے آں جے نہیں مناں گے تے ویلے تے ویلے دی رفتار نوں ککھ فرق نہیں پین لگیا، سانوں ایہہ ویکھنا پینا اے ساڈے نال واپریا کی اے؟
سانوں لبھنا پینا اے کہ سانوں کیہڑی اوبھڑ راہ تے ساڈے دشمناں پا دتا جو ہر گزردے دینہہ دے نال اسیں اگے ودھن دی تھاں پچھے ہٹ رہے آں.
جے میرے توں کوئی پُچھے کہ پنجاب تے پنجابیاں دے سبھ توں دو وڈے مسلے کی نیں تے میں ایہہ آکھاں گا کہ پہلا تے بنیاد پرستی اے جو ایس دھرتی دے اندر کسے زہریلے مادے وانگر ایس نوں ڈنگ ریا اے تے ایہہ زہر ہر آندے دینہہ نال ہور ودھ ریا اے جو پنجاب دی ترقی، خوشحالی تے امن نوں کھا نہ جاوے مینوں ہر ویلے ایہہ ڈر رہندا اے۔
تے دوجا مسئلہ پنجاب دا اپنی زبان توں دوری اے زبان صرف بول چال تے ہوندی نہیں ایہہ تے اک پورا نظام ہوندا اے جس نظام اندر کئی ادارے اِکو ویلے اپنی اپنی ذمہ واری نبھاندے پئے ہوندے نیں، پنجاب جدوں تک اس نظام نال نہیں جُڑے گا ایہدی ترقی دا عمل وقتی رہوے گا۔
پنجاب نال زبان دا جو دھرو گوریاں ساڈے نال کیتا اوہ تے اسیں جاندے آں پر کیہہ اج پاکستان بنن دے ستر سال بعد وی اسیں قصور وار گوریاں نوں آکھاں گے؟
پنجابیاں دی اپنی زبان دے نیڑے نا لگن دیاں وی دو ای وڈیاں وجہہ نے، پہلی تے سرکار دی بددیانتی اے دوجا پنجابی دانشوراں دی “دانشوری” اے، ایہناں دانشوراں نے سمے دی لوڑ نوں نہیں سمجھیا، پنجابی دانشوراں دیاں لکھتاں پڑھیے تے دو صدی پہلے دیاں لکھتاں لگن گیاں ایہہ ویلے دے نال پندھ کردیاں نظر نہیں آؤںدیاں، انج لگدا اے ساڈے پنجابی دانشور دا سمے دی رفتار تے چال نال کوئی تعلق واسطا نہیں.
لوکائی دی جو زبان ویلے نیں فطری تے جبری طریقے نال بدلی اوہ ساڈے پنجابی لکھاریاں توں بوہت دور وسدی نظر آؤندی اے، ادب کس لئی لکھیا جاندا اے؟ ادیباں لئی یا لوکائی لئی؟ پنجابی ادب دی اس اوکھڑ نے عام پنجابی نوں کدی اپنے نیڑے نہیں لگن دتا جیس دا نقصان ایہہ ہویا کہ پنجابی دوجیاں زباناں دے نیڑے ہوندا گیا پر ایس دوری نوں ویکھ کے وی پنجابی ادیب اس بنیادی مسئلے نوں سمجھ نا سکیا.
اونہاں اکھراں دا ورتارا ہوندا ریہا جیہڑے آسے پاسے سُنے نہیں جاندے، اکیہویں صدی اپنے نال اک نویں طریقے نال سائنس تے انفارمیشن ٹیکنالوجی نوں اگے لے تے ودھی تے جنگل اچ وسن آلے عام بندے تائیں وی ایس نوں لے کے اپڑ گئی.
دنیا اخبار کتاب تے رسالے توں اگے ودھ کے کمپیوٹر راہیں انٹر نیٹ تے آگئی، سوشل میڈیا دی طاقت نوں من کے ویب چینلز بنے، ویب سائیٹس بنیاں، پاکستان وچ وی صحافت نے نویاں راہواں ول ویکھیا خبراں دا اک وڈا ذریعہ سوشل میڈیا بنیا، استاد لوک وی کتاب چھڈ کے ایتھے آگئے پر ایتھے وی پچھے رئی تے پنجابی، جے ایتھے وی پنجابی آئی تے اوہی اوکھڑاں اپنے نال لے کے آئی اے۔

ایہناں بلاگز دی زبان اج دے پنجابی دی زبان توں سو میل دور کھلوتی نظر آؤندی اے، اج دے پنجابی لکھن والے لکھاریاں نوں اس پندھ نوں مُکان دی لوڑ اے، لوکاں نوں اونہاں دی زبان نال جوڑن دی لوڑ اے تے جوڑن دا اِکو ای طریقہ اے بھئی اک تے ہر گل نوں لکھا لوکاں دی زبان وچ جاوے تے دوجا اج دی زبان وچ لکھا جاوے، اوُس زبان وچ جیہڑی ویلے دے نال صدیاں دا سفر اگے کر چکی اے نہیں تے آکھیا اے ناں کہ ویلا کسے دا سکا نہیں تے نا ایس نوں رحم آندا اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels