Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> خوش وسیں او دیس اساڈیا 1857 ء دی جنگ آزادی دے سورمیاں دی یاد وچ!

خوش وسیں او دیس اساڈیا 1857 ء دی جنگ آزادی دے سورمیاں دی یاد وچ!

December 7th, 2016

مراد ورگا راٹھ نہ کوئی ہے
لکھاں کیتی ودی ہے بگاّ بانا

ہفتے نوں گورنمنٹ اسلامیہ کالج جامعہ محمدی شریف ،چینوٹ جاون دا ڈھو لگا تے ایہہ ڈھو بنایا پروفیسر سعید بُھٹا ہوراں جیہناں مینوں تے لہور دے کجھ سَجناں نوں راء احمد خاں کھرل دی یاد وچ ہونے آلے اکٹھ وچ رلت کرن اُتے زور پایا۔ ایس توں پہلاں فصیل جپاّ جی دا فون وی آ گیا سی۔ ہفتے نوں سانوں نکلدیاں کجھ چر وی لگ گیا پر میں تے سانجھ پبلشرز دے امجد سلیم مہناس موٹر وے اُتے چڑھ گئے۔ بڑا سوہنا دن سی تے ادھ مگھر دی دُھپ تے مَٹھامَٹھا نگھ دا سواد۔ اسیں جد 12وجے دے لاگے کالج اپڑے تاں اکٹھ شروع ہو گیا ہویا سی۔ جھبدے اسیں ہال وچ اپڑے تاں ہال نّکو نک بھریا سی سگوں کجھ جی کھلوتے وی سن۔ اسٹیج اُتے پروفیسر سعید بُھٹا،پروین ملک،اقبال قیصیر تے ہور وی کئی جی بیٹھے سن جیہناں وچ کالج دے پرنسپل،محکمہ تعلیم دے افسر، راء احمد کھرل دی ٹابری دے کجھ جی تے کجھ پچھلی تے کجھ اجوکی اسمبلی دے ممبر سن۔میں آپ وی اُستاد ہاں پر میں اینی تمیز تے ساؤ سبھا دے بال گھٹ ڈٹھے نیں۔ جیویں اوہناں تن ڈھائی گھنٹے دا پروگرام نٹھ کے تے سکون نال سُنیا اوس نال میں تاں نہال ہو گیا۔
ساڈے توں اگدوں ای اکٹھ شروع ہو گیا ہویا سی تے لائل پور گورنمنٹ کالج یونیورسٹی دے شعبہ اُردو دے سربراہ ڈاکٹر اصغر بلوچ تقریر کردے پئے سن۔ اوہناں ڈھولیاں نوں وڈیایا تے آکھیا ہر بندے اندر ڈھولا ہوندا اے۔اوہناں آکھیا سانوں ڈھولا زندہ رکھنا چاہیدا اے کیوں جے ایہہ ساڈی وار اے۔ ایہہ ڈھولے ساڈی وار نوں، ساڈی جہد دی کہانی کردے نیں۔
فصیل جپا جی جو سٹیج دے آہری وی سن وچ وچ اپنیاں گلاں راہیں اکٹھ نوں تاء وی دتی رکھدے سن۔اوہناں آکھیا ساتھوں ساڈی تاریخ کھوہ لئی گئی اے،ساتھوں ساڈی بولی کھس لئی گئی اے۔سانوں نہیں پتہ میرا سورما کیہڑا اے؟ احمد شاہ ابدالی اے یاں احمد خاں کھرل اے۔ ہر اک بُلار توں پچھوں اک پڑھیار آ کے ڈھولا پڑھدا سی۔ تے سارا ہال نالو نال اوس دا ہنگارا دیندا سی جس نال ایس گل دی دس پیندی سی پئی اجے وی کیویں بولی تے ڈھولے لوکاں وچ جیوندے نیں تے جیہڑیاں گلاں اسیں لہور بہہ وچارنے آں اوہ لوکاں توں کنیاں دُراڈیاں تے وجوگیاں ہویاں نیں۔
عاصم پڈھیار نظم پڑھی جس دی بہوں سلاہنا ہوئی۔ پھیر راء اسفندیار کھرل گل بات کیتی۔ اوہناں آکھیا راء احمد خاں کھرل تے اوہناں دے ساتھی دھرتی دے سپوت سن تے اوہناں نوں شہادت نصیب ہوئی۔ اقبال قیصر آکھیا اسیں غلام کیویں ہو گئے؟ سانوں ڈھگے کیوں بنا دتا گیا؟ اوہناں نے پڑھیاراں نوں اپنی بولی دی سنبھال کرن تے پہرا دین دا آکھیا۔ پنجابی ادبی بورڈ دی سکتر پروین ملک نے آکھیا۔پنجابیاں نے ہمیش دھاڑویاں دا راہ ڈکیا تے جاناں دتیاں پر سانوں پھیر وی مہنا ماریا جاندا اے۔ ایس توں پچھوں راء احمد خاں ناصر نے اپنی سوہنی نظم سُنائی۔
راء جی اک گل تاں دسو!
تُسیں وی تاں اوہناں وچوں وی ہو نا!
جو دھرتی نوں ماں ورگا کر گئے، دُھپاں نوں چھاں کرگئے
راء عبدالقادر کھرل نے گل کردے آکھیا ایہہ ڈھولے نصابی کتاباں وچ ہونے چاہیدے نیں۔ ایہہ اکٹھ چنگا آہر اے۔سانجھے کم دی گل اے۔راء احمد خاں کھرل اک پچھان اے۔ایہناں وچ ساریاں برادریاں دے لوک سن۔ایہناں پنجاب دی دھرتی لئی جاناں واریاں۔اوہ نماز پڑھدے پئے سن جد اوہناں نوں شہید کیتا گیا۔
اخیر اُتے اکٹھ دے اُچیچے پروہنے پروفیسر سعید بُھٹا گل بات کردے آکھیا ساڈا سارا زور ایس گل اُتے ہوندا اے جو میں نظر آندا پیاں آں ایہہ میں نہیں آں۔نتیجہ صفر اے۔1947 توں لے کے اج تیک پاکستان وچ اک وی وڈا بندہ پیدا نہیں ہویا۔اپنی ہوند دی نفی پئی کردے آں تے کری جاندے آں۔پنجاب ہندوستان دا دسواں حصہ اے پر انسانی تاریخ وچ ایس نے جو پیدا کیتا ،ویداں توں لے کے اوہ گھٹ نہیں سی۔تُرکاں،مغلاں توں لے ہن توڑی تیک پیداوار وچ پنجا ب دا بہت حصہ اے۔پنجاب نالائق بندیاں دی دھرتی نہیں ۔جے کسے نوں آکھیا جاوے توں وی بھیڑا، تیرا پیو وی بھیڑا،تیرا دادا وی بھیڑا تے اوہ اپنے آپ نوں ہینا سمجھن لگ پئے گا۔راء احمد خاں جیویں دُعا کیتی اوہ قبول ہوئی۔اوس دے مُرشد آکھیا تہانوں شہادت نصیب ہونی اے۔ایس توں وڈا مسلمان کون اے؟ہڑپہ،ملتان،بھیرہ،شورکوٹ،ایہہ تہذیباں کتھوں آئیاں نیں؟
اوہناں آکھیا ساڈے اُتے مٹی دا قرض اے۔1857دے لڑاکیاں دی کھوج کڈھو۔جیہڑیاں قوماں اپنے سورمیاں نال اپنی پہچان بناندیاں نیں اوہ جیوندیاں رہندیاں نیں۔ایہہ فردوسی دا قلم سی جس رُستم بنا دتا۔ متیھو آرنڈ نے کیہا سی جے سمندر دی اک چھل آوے تے انگلینڈ غرق ہو جاوے تاں کل لوکاں نوں کیہہ یاد رہوے گا۔ ایہو پئی ایہہ اوہ قوم سی جس شیکسیپر پیدا کیتا۔قوماں رہتل دی پہچان نال زندہ رہندیاں نیں۔کرشن توں بعد ہیر دی کہانی اے۔جھنگ کول دمودر دی پہچان اے۔ اوہناں پڑھیاراں نوں راء احمد خاں کھرل اُتے کم کرن دا زور دتا۔
اخیر اُتے کالج دے پرنسپل راؤ منظور احمد خاں ہوراں گل بات کیتی۔ اوہناں آکھیا اج ایتھے کرانہ بار،ساندل بار،گنجی بار تے راوی بار دے وسنیک آئے ہوئے نیں۔اوہناں راء کھرل دی ماں فتح بی بی تے راء نتھو نوں لئی خیر منگی جیہناں احمد کھرل جیا سورما جمیا۔ اوہناں دسیا ایہہ مہم 1857مئی وچ چھوہی۔ لوکاں چنگا مقابلہ کیتا۔جے ساڈے ایہہ ہیروز کامیاب ہو جاندے پھیرا ساڈا جغرافیہ وی بدل جانا سی تے جاگیردارانہ سماج بدل جانا سی۔
ایس دے نال ایہہ اکٹھ مُکیا تے بڑے سکون نال پڑھیار اک اک کرکے ہال توں باہر تُر گے۔اسیں روٹی ٹُکر کھا کے جد لہور ول پرتے تاں شام کنڈھے آلگی سی۔لال بُکھدا سورج ساڈے پچھے تُریا آوندا سی۔سڑک اُتے پڑھیار اپنے روٹ دیاں بساں نوں اُڈیکھدے پئے سن۔ایہو دھرتی سی جس دُلا تے احمد خاں کھرل جیہے جمے۔مینوں لہور بڑا دُراڈا لگا۔ خورے کل نوں ایہناں پڑھیاراں چوں ای اک ہور وارث، بُلھا جم پووے۔ پڑھیار گھر جاندے کیہہ سوچدے ہوسن؟
اوہنوں میں انکھّی نہیں سمجھدا
جو احمد خاں دا ناں وسارے
ایہہ سارا اکٹھ فصیل جپاّ ہواراں دا آہر سی اسیں اوہناں نوں ڈھیر ودھائی دنیدے آں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels