Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سندھی رہتل دا (ایکتا) دیہاڑ

سندھی رہتل دا (ایکتا) دیہاڑ

December 6th, 2016

ایس واری سندھی ثقافتاں دا دیہاڑ سب نے منایا اتے فاروق ستار وی اجرک اتے سندھی ٹوپی وچ نظر آئے۔ہور تے ہور امریکی سفیر وی ایس وچ آپدا حصّہ پایا۔ اتوار دا دیہاڑ ایس کم لئی طے سی پر اتوار توں پہلاں ہی پروگرام شروع ہوگئے سن۔ آزادی مگروں ایہہ اوہ چند اک دیہاڑاں وچوں ہے جس وچ سارے نویں، پرانے اتے ہندو، مسلم، مسیحی تے سکھ سندھی ہی نہیں سگوں شودر تے براہمن، وڈے چھوٹے، ماڑے تگڑے سندھی اک مک نظر آندے نیں۔ کدی پنجاب وچ اینج ہی بسنت وی منائی جاندی سی اتے ایس دیہاڑ پورا پنجاب اکو رنگ وچ رنگیا جاندا سی۔ پر فیر اک ڈکٹیٹر آپدی جعلی روشن خیالی پاروں ایس نوں سیاستاں دی نظر کیتا اتے ایس دے مخالفاں بسنت خلاف میڈیائی مدد نال مہماں اساریاں اتے عدالتاں سر درد دا علاج ایہو لبھیا پئی سر ہی وڈھ دینا چاہیدا ہے۔ بس شرفو سیاستاں پاروں پنجاب آپدے ’’ایکتا‘‘ دیہاڑ توں وانجھیا گیا۔
جداں ایاز لطیف پلیجو، فاروق ستار، رضا ربانی، شہلا رضا، شاہی سید، قادر مگسی اتے ہندو، مسیحی، نوے پرانے سب سندھی ایکتا دے مظاہرے کریندے نیں اتے ایس نال سندھ تے پاکستان دونوں تگڑے ہوندے نیں۔
ایہی اوہ دیہاڑ ہے جداں سندھ توں باہر بیٹھے سندھی وی آپ نوں سندھ دا حصّہ سمجھدے نیں اتے اند روالے سارے دھڑے وی اک دوجے نیڑے ہوندے نیں۔ اجہے دیہاڑ مناون نال فرقہ پرستیاں ہی نہیں سگوں شہری پینڈو(سندھی اْردو) جیہڑیاں خلاف بھر واں مورچہ لگدا ہے۔ 2009 توں ایہہ دن منانا شروع کیتا گیا سی ، شروع وچ کجھ جگادریاں مذاق وی اڈایا پر ایہہ ہن سندھ دی شناخت بن گیا ہے اتے ناقداں وی در وٹ لتا جے۔ پیپلز پارٹی ایس دی موڈھی ہے اتے کلچر ایس دا ڈومین ہیگا۔ جے اوہ ایہو کم دوجے صوبیاں وچ وی کرے اتے انہاں صوبیاں نوں وی آپس وچ جوڑن دی پالیسیاں بنائے تاں ایس گل دا فیدہ پی پی پی نوں ہوسکدا ہے۔چیتے رہوے پئی نو آبادیاتی حاکم اتے انہاں توں بعدوں ڈکٹیڑاں دھرمی ونڈاتے فرقو تے لسانی پاڑاں نوں ہمیش ودھایا سی۔ اوہ صوبیاں نوں لڑاندے تے صوبیاں اندر اختلافی گلاں نوں ودھاندے سن۔پر پی پی پی چاراں صوبیاں دی زنجیر جے اتے ایہہ سندھ وانگ تینوں صوبیاں وچ آپدی پالیسی نوں صوبیاں اندر سانجھ نال جوڑے، ایہو اس دا پلس پوائنٹ ہے۔ اہمیتاں ایس گل دیاں نیں پئی پی پی پی آپدی پھسڈی پنجاب پالیسی نوں چھڈے اتے بھٹو وانگ پنجابیاں دے دل وی جتن دا آہر کرے۔
سندھی اجرک تے ٹوپی پانا وڈا کم جے پر نال نال بلاول ہوری ایہہ وی ویکھن پئی اوہ کنج سندھ نوں اک چنگا سرکاری تعلیمی بندوبست دے سکدے نیں۔ سندھ وچ کیوں اج دیہاڑ تیک غیر مسلم سندھیاں لئی ’’اخلاقیات‘‘ دی کتاباں نہیں چھپ سکیاں؟ حلانکہ ایہہ فیصلہ اتے پالیسی پی پی پی ہی بنائی سی۔ گھٹ وگھٹ سندھ ٹیکسٹ بک بورڈ بچیاں لئی جدید دور مطابق چنگیاں نصابی کتاباں تے تیار کرواسکدا ہے۔
چنگے سرکاری تعلیمی ادارے اسارن نال پی پی پی نوں پورے ملک وچ عزتاں ملن گیاں۔ گھٹ وگھٹ کتاباں چنگیاں ہوجاون اتے کچھ ضلعیاں وچ مثالی سکول اتے کالج تے اک ادھ یونیورسٹی بن جاون۔ اجہے کمال نال ہی ضیاالحقیاں نوں مکایا جاسکدا ہے۔ اج رنگاں، طبقیاں، نسلاں، مذہباں، فرقیاں تے زباناں والے سارے سندھیاں نوں رلانا لوڑی دا ہے اتے پی پی پی ایہہ کر رہی ہے پو ایس نوں پورے ملک وچ وی لیجانا چاہیدا جے۔چیتے رہے پئی اینج ہی ات گردیاں تے انتہا پسندیاں وی مک سکن گیاں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels