Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ڈونلڈ ٹرمپ اتے امریکہ چ قومی جھنڈے ساڑن دی گھٹناواں

ڈونلڈ ٹرمپ اتے امریکہ چ قومی جھنڈے ساڑن دی گھٹناواں

December 1st, 2016

پچھلے سال 28 اگست دی گل ہے جدوں لہور چ اک بندے قمرالزمان نوں پاکستانی جنھنڈے نوں اگ لان دے جرم تے گرفتار کیتا گیا سی۔ ایس بندے بارے دسیا گیا کہ اوہ پہلاں فوجی سی اتے اوہنوں لمبے سمے تک ڈیوٹی توں غیر حاضر رہن دے جرم چ فوج توں کڈھ دتا گیا سی جیدے مگروں اوہنے ایک نجی سکیورٹی کمپنی چ نوکری شروع کر دتی سی۔ پولیس نے ایہ وی دسیا کہ اوہنے لوکاں دے ساہمنے پاکستان دے خلاف نعرے وی لائے سن۔
پاکستانی جنھڈے نوں اگ لان دے خلاف پاکستان پینل کوڈ سیکشن 123 دے تحت اوہنوں گرفتار کر کے اوہدے خلاف مقدمہ قائم کیتا گیا۔ ایہ تاں نئیں پتہ لگ سکیا کہ بعد وچ قمرالزمان نال کیہ ہویا پر پاکستان اتے دنیا دے بہت سارے دیسان وچ قومی جھنڈے نوں اگ لانا اک وڈا جرم سمجھیا جاندا ہے۔ عام طور اتے جھنڈا دشمن ملک داساڑیا جاندا ہے جیویں پاکستان وچ بھارت دا اتے بھارت چ پاکستان دا جھنڈا ساڑن دی گھٹناواں ہُندیاں ریندیاں ہن۔ پر جے کوئی بندے اپنے وطن دے جھنڈے نوں ساڑے تاں اس دا سیدھا مطلب ایہ ہی ہے کہ اوہ اپنے وطن نال ای دشمنی کر رہیا ہے۔
امریکہ چ وی صدارتی چوناں مگروں تھاں تھاں تے پردرشن ہوئے اتے امریکی جھنڈے وی ساڑے گئے جیس دی وجہ نال بہت سارے امریکی شہریاں نوں دکھ ہویا۔ چوناں جتن والے اُمیدوار ڈونلڈ ٹرمپ نے اک ٹویٹ چ آکھیا ہے کہ کسے نوں وی امریکی جھنڈا ساڑن دی اجازت نئیں دتی جانی چاہیدی ہے اتے جے کوئی بندہ ایہ حرکت کردا ہے تاں ایس دا سزا دوشی دی شہریت ختم کرنا یا اوس نوں جیل بھیجنا ہونا چاہیدی ہے۔ ایس بارے سارے میڈیا وچ بہت چرچا ہو رہی ہے۔اوہناں دے ورودھیاں دا کہنا ہے پئی جھنڈا ساڑنا امریکی آئین ہیٹھاں بولن دی ازادی راہیں غلط کم نئیں ہے۔
پر شید لوکاں نوں چیتا بُھل گیا ہے کہ اک دہائی پہلاں ہلری کلنٹن نے وی ایہوجہی سزا دی منگ کیتی سی۔ ہلری ہوری اوس سمے نیو یارک توں سنیٹر سن اتے اوہناں سورگیے رپبلکن سنیٹر رابرٹ بینٹ نال رل کے فلیگ پروٹیکشن ایکٹ 2005 پیش کیتا سی۔ ایس بل چ آکھیا گیا سی کہ امریکی جھنڈا ملک دے ایکتا دی نشانی ہےاتے ازادی، انصاف تے برابری دی قدراں نوں ظاہر کردا ہے۔ جھنڈا ساڑن نال امریکیاں لئی پیڑا توں وی وڈا نقصان ہے۔ایس لئی امریکی آئین دی پہلی ترمیم ہیٹھاں ایس دی اجازت نئیں دتی جا سکدی۔بل وچ امریکی جھنڈے نوں اگ لاؤن دے اپرادھیاں نوں ایک لکھ ڈالر جرمانے یاں اک سال قید یاں پھیر دوواں دی سزا دتی جانی چاہیدی ہے۔ بل وچ ایہ وی آکھیا گیا کہ جے ساڑیا جان والا جھنڈا امریکی سرکار دا ہووے تاں ایہ سزا ودھا کے ڈھائی لکھ کیتی جاوے۔ پر ایس بل وچ شہریت ختم کرن دی سزا دی صلاح نئیں دتی گئی جیویں کہ ٹرمپ ہوراں آپنی ٹویٹ وچ آکھیا ہے۔
امریکی سنیٹ نے ایہا بل سنیٹ دی عدلیہ بارے کمیٹی نوں پھڑا دتا اتے پھیر ایس داو ی اوہو حشر ہویا جیہڑا پاکستانی اسمبلی وچ بلاں دا ہوندا ہے۔ مطلب ایہ ہے کہ ایہ بل وی آپنی موت آپ مر گیا۔
پرایس بل مگروں ہلری کلنٹن دی نکھید کرن والے کجھ سوجھواناں نے آکھیا کہ ایہو جہے بل دی کوئی لوڑ نئیں۔ نیو یارک ٹائمز دی لیکھک این کورن بلٹ نے آکھیا کہ امریکہ چ قومی جھنڈے نوں ساڑن دا کوئی واقعہ 11 ستمبر 2011 دی گھٹنا مگروں نئیں ہویا جدوں ہیمپشائر دے آکسی ڈینٹل کالج دے کیمپس وچ ہزاراں امریکی جھنڈے لیر لیر کر دتے گئے سن۔ طالب علماں 11 ستمبر دی گھٹنا چ مرن والے ہر بندے دی یاد وچ اک اک امریکی جھنڈے نوں لیر لیر کیتا سی۔ ایس دے بعد کالج دی انتظامیہ نے اوہناں طالب علماں دے خلاف کارروائی وی کیتی سی۔
شکلاگو لاء سکول دے پروفیسر جیفرے سٹون کہندے ہین پئی ڈولنڈ ٹرمپ دے ٹویٹ توں پہلاں ایہر کوئی وڈا مسلہ نئیں سی۔ اوہناں امریکی سپریم کورٹ دے سورگیے جج اینٹونِن سکالیا داو ی حوالہ دتا جیناں آکھیا سی پئی امریکی آئین وچ بولن دی ازادی دے حق ہیٹھاں قومی جھنڈا ساڑن دی اجازت ہے۔ ڈونلڈ ٹرمپ نے جج سکالیا دی تعریف کردیاں آکھیا سی کہ اوہ بڑے عظیم جج ہین۔ نیشنل کانسٹی ٹیوش سینٹر دے صدر جیفرے روزن نے وی آکھیا ہے کہ امریہع دیاں دوویں وڈیاں پارٹیاں دے لوکاں وچ ایس گل تے اتفاقِ رائے ہے کہ امریکی آئین دی پہلی ترمیم قومی جھنڈے نوں اگ لاؤن دا حق مندی ہے۔ اوہناں آکھیا کہ جے ایہہ مسلہ اک واری پھیر سپریم کورٹ چ لیایا گیا تاں ایس گل وچ کوئی شک نئیں ہے کہ سپریم کورٹ اک واری پھیر ایس حق نوں من لوے گی۔
ہُن سوال ایہ ہے کہ کی نویں امریکی صدر ڈونلڈ ٹرمپ وھائیٹ ھاؤس اپڑن مگروں ایس بارے آپنے قول انوسار کوئی قنون سزی کروان گے یا ں نئیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels