Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پہلی بابا گرو نانک کانفرنس

پہلی بابا گرو نانک کانفرنس

ڈاکٹر صغرا صدف
December 1st, 2016

ایس سال بابا گرو نانک دے 548 ویں جمن استھان تے لاہور دے نیڑے وَسدے علم تے گیان دے ترجمان ننکانہ صاحب حاضری دا شرف ملیا۔ پِلاک نے پنجاب دے سارے وڈے صوفی سوجھواناں دے درباراں تے جا کے کانفرنساں کرن دا جیہڑا اعلان کیتا سی اوہدا مڈھ بابا گرو نانک کانفرنس توں ہونا ایس گل دی گواہی اے کہ ساڈے وچکار عرفان، محبت، زبان تے وسیب دی گوڑھی سانجھ موجود اے۔ اسیں امن دی دھرتی دے وسنیک انساناں نوں ونڈن والیاں ساریاں ٹھیکیداریاں توں وکھ آں۔ مینوں بابا گرو نانک دے کلام وچ بابا بلھے شاہ دے کلام دی روح سنائی دیندی اے کیوں جے بلھے وانگوں گورونانک وی مہر داس تے فتح محمد نوں اک ای ہستی دا پرچھاواں سمجھدے نیں۔ مینوں بابا گرو نانک دے کلام وچ شاہ حسینؒ دا ’نی تینوں ربّ نہ بھُلّی‘ رچیا وسیا جاپدا اے۔ ایہہ سُنیہا توحید تے ایکتا ول راغب کرنا اے۔ گرُو دا سوہنا اکھر گُر توں اے۔ انسان گُر دے بِناں مٹی دا پُتلا اے یاں صرف حیوان اے۔ گُر اوہ باطنی دانش اے، اوہ الوہی گیان اے جیہڑا پتھر نوں ہیرے تے خاکی وجود نوں نور وچ ڈھال کے بے مثال بنا دیندا اے۔ بابا گرو نانک ہوراں ذات اندر باری کھول کے اپنے مالک دی جھلک کیہ ویکھی اوہدے تے تن من توں عاشق ہو گئے۔ ساری عمر اوہدی محبت دا دم بھردے رہے۔ اوہدے نال کسے نوں شریک کرنا گوارا نہ کیتا پر محبوب دا جلوہ تے ہر شے وچ سی، جدھر ویکھدے صرف اوہی نظر آندا ہر چہرے وچ منعکس سی، ذات دے آئینے وچ وی صرف اوہدا نور جھلکدا سی، اک اکلّا پر سبھ وچ سمایا ہویا۔ ایسراں ہر منظر تے چہرے نال محبت ایمان دا حصہ بندی گئی۔ شرک تے خورے ذات کوٹھڑی اندر بیٹھے بتاں دا ناں اے۔ غرور تے انا پرستی دی علامت اے۔ صوفی جد اپنی ریاضت نال نفی ٔ ذات دے مرحلیاں توں لنگھ کے کائناتی روح نال ہم آہنگ ہوندا اے تے شرک دا باقی رہنا ممکن نہیں رہندا کیوں جے صوفی قدم قدم خیالِ غیر توں بچدا تے ساہ ساہ محبوب دا وِرد کردا لنگھدا اے۔ اوہدے ساہواں دی ڈوری اوہ تسبیح اے جہدے تے وجود ھُو دا کلمہ پڑھڈا کائنات نوں اپنی محبت دا گواہ بناندا اے۔ بابا گرو نانک نال محبت دا اظہار ساڈے بلاوے وچ لُکیا اے۔ حالاں کہ لفظ گرُو احترام دا مظہر اے پر اسیں دوہری عقیدت دا نکھیڑ کرن لئی بابا گرو نانک آکھنے آں۔ اوہناں دے دربار تے ہندوستان، کینیڈا، برطانیہ تے ہور کئی مُلکاں توں ہزاراں عقیدت مند موجود سن جیہڑے اوتھے بلدے عرفان دے چراغاں نال اکھاں دے دیوے روشن کرن تے کرم دیاں فضاواں توں دلاں وچ محبت دی خشبو بھرن دی چاہ لے کے آئے سن۔ اوہناں دے چہریاں توں چھن چھن کرن آلا چانن ویکھ کے جاپدا سی کہ اوہناں تے نگاہِ کرم ہو چکی اے۔ اوہناں دے دامن تے دل دے ویہڑے پریم دے پھُلاں نال بھرے جا چکے نیں۔ اک عجب مستی دا عالم سی۔ عقیدت تے محبت رَل مِل گئے سن۔ لوک سِر کجے سلام کردے ہوئے خموشی نال لنگھ رہے سن پر اوہناں دے وجود اندر دھمال ہو رہی سی۔ دھمال کسے اک تھاں تے فوکس ہون دا ناں اے۔ لہور توں جان آلے ادیباں، شاعراں تے فنکاراں دے وفد دی کیفیت وی اوہناں توں وکھ نہیں سی۔ مہماناں تے میزباناں دیاں شکلاں تے بولی اِکو سی۔ کدھرے کوئی انجانا تے پرایا نہیں سی، سبھ اپنے لگدے تے محسوس ہوندے سن۔ دھرتی، زبان تے ثقافت دی سانجھ وی قربت دا کارن سی۔ راشد محمود، اقبال قیصر، اکرم شیخ، ہارون عدیم، احمد رضا، یوسف پنجابی، کلیان سنگھ کلیان تے حسن رائے نے بابا گرونانک دی شاعری، تعلیمات تے فلسفے دیاں پرتاں کھولیاں۔ غلام حسین ساجد، بلکار اولکھ، بابا نجمی، نیلما درانی، زبیدہ حیدر زیبی، عبد الرؤف نبی پوری، فرزند شائق، عبد الرشید شاہد، رائے محمد خاں ناصر، امجد علی امجد، عاصم پڈھیار، شہزاد فراموش، خاقان حیدر غازی، فریاد احمد جاوید تے راقم نے اوہناں نوں شعراں دے نذرانے پیش کیتے۔ مبینہ اکبر، بشریٰ صادق تے سجاد بری نے بابا گرونانک تے دوجے صوفیاں دے کلام نوں سُر نال پیش کر کے محفل تے وجد طاری کر دتا۔ پروفیسر جوگا سنگھ ہوراں ایس کانفرنس دا آہر کرن تے پنجاب حکومت تے محکمہ اطلاعات و ثقافت دا بھرواں شکریہ ادا کیتا تے سُنیہا گھلیا پئی پنجاب حکومت نے ستر ورھیاں وچ پہلی وار سرکاری سطح تے بابا گرونانک کانفرنس دا پربندھ کر کے ساڈے دل جِت لئے نیں۔ اسیں تے بابا گرونانک نوں صرف اپنا گرُو سمجھدے ساں ایتھے آ کے پتہ لگیا کہ بابا گرونانک تے تہاڈا تے ساڈا سانجھا اے۔ سارے عقیدت منداں دیاں نظراں وچ وی عجیب جیہی نرمی تے محبت سی۔ اسیں اوہناں نوں کیویں دسدے کہ محبت تے پہلے وی اینی ای سی بس آکھن وچ کُجھ چِر ہو گیا۔
اَج دا سوال ایہہ وے پئی ونڈ ویلے پنجاب دے دونویں پاسے اَگ لان آلی ذہنیت توں کیویں ہوشیار رہیا جاوے۔ ہندوستان تے پاکستان دے وچکار ہون آلیاں ساریاں جنگاں وچ ہمیش نقصان پنجابیاں دا ہویا۔ ایس کانفرنس نال اک نویں سفر وَل پیش قدمی ہوئی اے۔ دلاں تے اک نواں عہد نامہ لکھیا گیا اے۔ محبت دے سنیہے ول پرتن دی گل ہوئی اے۔ بابا گرونانک ہوراں ہندوستان دی ذات پات، دھرم، نفرت تے استحصال وچ ونڈی انسانیت نوں وحدت الوجود دا عرق پیا کے ایکتا دی لڑی وچ پرویا۔ صوفی ہمیش آفاقیت دی گل کردا اے۔ آقا تے غلام دی نہیں صرف انسان دی گل کردا اے۔ اَج ایس سنیہے دی روح نوں سمجھن دی چوکھی لوڑ اے۔ ننکانہ صاحب سکھاں دا کعبہ قبلہ اے۔ اوہناں لئی پنجاب تے پاکستان اک اُچیچی سرزمین اے تے اوہ ایہدے استحقاق نوں مجروح ہون توں بچان دے دلوں خواہش مند نیں۔ جے اسیں سارے رَل کے مادیت دے جالاں وچ جکڑی دنیا نوں ایکتا ول لے کے ٹریے تے نویں دنیا دا منظر نامہ بہت سوہنا ہو سکدا اے۔ رائے محمد خان ناصر تے کلیان سنگھ کلیان دے تعاون تے محبت دے شکریے لئی اکھر لبھ رہی آں۔ ایہہ دونویں نیک روحاں اُمید تے مثبت سوچ دی علامت نیں۔ علامہ اقبال ہوراں بہت پہلے بابا گرونانک نوں وڈیاندیاں آکھیا سی:
پھر اُٹھی صدا توحید کی پنجاب سے
ہند کو اِک مردِ کامل نے جگایا خواب سے
جے اسیں جاگ پئے آں تے امن، بھائی چارے تے خدمتِ خلق دا راہ سانوں اُڈیک رہیا اے۔ آئو سفر آغاز کریئے۔ 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels