Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بھوٹان, بھارتی تجارتی راہداریاں وچ رلن توں انکاری: مودی منصوبہ ٹھپ

بھوٹان, بھارتی تجارتی راہداریاں وچ رلن توں انکاری: مودی منصوبہ ٹھپ

عباس علی صدیقی
December 1st, 2016

بھوٹان دے انکار پاروں بھارتی وزیر اعظم نرندر مودی دا چار ملکی علاقائی راہداری کوریڈور دا منصوبہ ٹھپ ہو گیا جے۔ ایس منصوبے وچ بھوٹان، بنگلادیش، بھارت تے نیپال شامل سن۔ ایہہ چار ملکی معاہدہ جس نوں بی بی آئی این (BBIN)آکھدے نیں مودی دی سفارت کاری دااخیری منصوبہ اے جیہنوں اوہ ایہہ ثابت کرن لئی اگے ودھا رہے سن کہ پاکستان نوں دسیا جائے پئی بھارت دی کڈی طاقتاں نیں۔
بھوٹان دی پارلیمنٹ دی اْچ پدھر نیشنل کونسل’’ گلائیونگ تشوگڑے‘‘ (سینٹ ورگا ادارہ) نیں ایس راہداری منصوبے نوں محولیاتی بھٹ تے سلامتی نوں خطریاں دی چنتاواں پاروںڈک دتا جے۔ گویڑ اے جو بھوٹان ولوں ایہنوںڈکن پچھے چین دا ہتھ اے۔
چار ملکاں دے آگوآں نیں بی بی آئی این بلاک اْتے جون 2015نوں بھوٹان دے دارالحکومت تھمپھو وچ دستخط کیتے سن۔ ہن ایس معاہدے دی تصدیق ویلے بھوٹان دی 25ممبری نیشنل کونسل دے 20ممبراں ووٹ پائے۔ اْکا دو ممبراں معاہدے دے حق وچ ووٹ پائے تے 13ممبراں ایہدے برخلاف۔ پنج ممبرووٹاں توں باہر رہے۔ جے بھوٹان ایس معاہدے دی تصدیق کر دیندا تاں ایہناں چاراں ملکاں وچ لوکاں تے سمیان دیاںسواریاں دی بناں روک ٹوک ٹریفک چلنی سی۔بھوٹان دے مقامی لوکاں، انٹرنیٹ ورتن والیاںتے ٹرکاں ٹیکسیاں دے ڈریوراں ایس معاہدے دی مخالفت کیتی سی تے معاہدے تے دستخط کرن تے حکومت دی نندیا کیتی سی۔
بھوٹانیاں نوں چنتا اے جو معاہدے پاروں، خاص کر بھارت تے بنگلادیش توں گڈیاں دی آوا جاوی دے گھڑمس پاروں اوہناں دا امن تے محول برباد ہوسی ۔ ایہہ وی آکھیا گیا اے جو اسیں ہتھیاریاں نوں بھوٹان وڑن دی اجازت نہیں دیاں گے۔ حکومت ولوں نیشنل کونسل وچ گل کردیاں بھوٹان دے خارجہ وزیر دامچو دورجی آکھیا جو حکومت اپنے محول تے ٹرانسپورٹ انڈسٹری نوں بچائے گی۔
بھارت دے سبھناں گوانڈھیاں چوں بھوٹان اوہدا سبھ توں ودھ بھروسے وند گوانڈھی اے۔ تن سال پہلاں بھارت دے جمہوریہہ دیہاڑ تے بھوٹان دا شاہ خوشی خوشی اچیچے پروہنے دی کرسی تے بیٹھا جدوں اومان دا سلطان عین موقعے تے آون توں انکاری ہو گیاسی۔ بھوٹان عالمی فورماں تے دوپاسی پھڈیاں وچ بھارت دی مدد کردا رہیا اے۔ ایس پاروں بھوٹان دی اچ پدھری پارلیمنٹ ولوں مودی دے ایس مہا منصوبے نوں ردن تے بھارت نوں چوکھا دھکا لگا اے۔ بھارتی ایس تے بڑے تپّے ہوئے نیں اتے سوچدے نیں کتھے بھارت دا بھوٹان تے اثر ڈھلا پئے رہیا اے؟کیہہ بھوٹان نوں بھارت توں دور کرن وچ چین اپنے منصوبے وچ کامیاب ہو گیا اے؟
بھوٹان دی پارلیمان ولوں مودی دے BBINنوں ردن وچ چین دا ہتھ دسناں قدرتی اے کیونجو ایہدا مقابلہ BCIM(بنگلادیش، چین، انڈیا، میانمار) ٹرانسپورٹ کوریڈور نال اے۔ پر لگدا اے کہ ایہدی اصل وجہ ایہہ اے جوجدوں بھوٹانی پارلیمان تصدیق لئی معاہدہ چایا تاں دکھنی بلاک معاملے نو پرکھن وچ ناکام رہیا۔ جدوں بھوٹان دی ہیٹھلی پدھر دی پارلیمان نیں معاہدے نوں منظور کیتا سی تاں اپوزیشن نیں جگمی تھنلے دی اگوائی وچ ایہدی چوکھی نندیا کیتی سی۔ سیاستداناں دا چیتا سئوڑا نہیں ہوندا۔ پچھلے الیکشناں توں ذرا پہلاں بھارت نیں گھریلو گیس توں سبسڈی موڑ لئی سی، ایس پاروں تھنلے ہار گیا۔ اصل وچ بھارت اوہنوں دلی وچ بیٹھیاں نوں اعتماد وچ نہ لین اتے چین نال مذاکرات کرن تے سزا دینا چاہوندا سی۔ اخیر تھنلے دی نکتہ چینی نے اچ پدھری پارلیمان دی سوچ بناون تے اثر پایا۔
بھوٹان دے سوشل میڈیا تے نیشنل کونسل دے فیصلے دی بھرویں سلاہنا کیتی جا رہی اے۔ دو سال پہلاں کھٹمنڈو سارک سربراہی کانفرنس دے موقعے تے مودی آکھیا سی جو دکھنی ایشیا وچ علاقائی جڑت اگاہاں ٹرے گی ــ،بھاویں سارک راہیں جاں سارکوں باہر۔ بھاویں اسیں ساریاں راہیں جاں کجھ ملکاں راہیں۔ جدوں مودی ایہہ تقریر کیتی اودوں ایہہ گل ظاہر ہو گئی سی جو سارک موٹر وہیکل ایگریمنٹ (MVA)، جیہدا مسودہ بنا لیا گیا سی تے 2014وچ دستخط نہیں ہوون گے کیونجو اوس اْتے اخیر ویلے پاکستان نے اعتراض کیتے سن۔
پاکستان دے اڑیکے پاروں بھارت نیں پوربی برصغیر دے علاقیاں وچ درلبھ جنور دی بھال چھوہ دتی۔ مطلب علاقائی مل ورتن دا اک اثردار تے کارگر ماڈل جس دے سارے ممبراں وچ اکسارتا ہووے۔ ایشیائی ترقیاتی بنک دی تکنیکی مدد نال BBINموٹر وہیکل ایگریمنٹ بنایا گیا سی جس راہیں پنج ورھیاں وچ اٹھ بلین ڈالراں نال سڑکاں دے 30منصوبے توڑ چاڑھے جانے سن۔
بھوٹانی اپوزیشن آکھیا اے جو BBINنوں موٹر وہیکل ایگریمنٹ دی بجائے تعلیم، زراعت تے محولیاتی تبدیلی ورگے معاملیاں تے مل ورتن نال شروع کرنا چاہی دا سی۔
پر ہن بھوٹان دے انکار پاروں لگدا اے جوبھارتی وزیر اعظم دی خارجہ پالیسی دا ایہہ اک مڈھلا منصوبہ ڈب جاسی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels