Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> روس تتّے پانیاں تیک: پر بیانیہ پرانا ہی رہ سی؟

روس تتّے پانیاں تیک: پر بیانیہ پرانا ہی رہ سی؟

November 26th, 2016

پرانا جسّا نواں چولا، پئی بھوئیں تے بدلی نہیں جا سکدی پراَمروداں دی تھاں سٹابری لاون وچ ہرج کوئی ناں۔روس دی انٹیلی جنس، فیڈرل سیکورٹی سروسز دے آگوالیگزنڈر بورٹنی دے دوریاں بعدوں پاکستانی سرکار تتّے پانیاں تیک روس نوں جی آیا نوں آکھن لئی تیار۔ اک زمانہ سی جداں سانو دسیّا جاندا سی جے روس تتّے(گرم) پانیاں تک آگیا تاں ''اسلام خطرے وچ پئے جا سی'' ، اتے افغانستان(1880)، فاٹا(1894)اتے بے نامی صوبہ سرحد(1901)بنا کے اساںآپدیاں پنج نسلاں روس نوں تتّے پانیاں تیک آون توں ڈکن لئی برباد کیتیاں۔نوآبادیاتی حاکماں دے مفاداں پاروں اساںرتّے انقلاب(1917)توں لمیرے چرپہلاں ہی روس مخالف ساں ۔جس نوں چیتا نہ ہوئے اوہ چارلس میٹکاف دی لہور ڈائری(1809)مڑ پڑھ لے یا فیر لارڈ میکالے دی دھماں پاون والی تقریر(1835)دا اوہ پیراگراف جہیڑا روس بارے ہے ہک وار ویکھ لے، اُس نوں سرت دے تاگے لبھ جا سن۔پر رتّے انقلاب بعدوں سانوں ایہو دسیّا گیا پئی روس خدا اتّے دھرماں، مذہباں تے اخلاقاں دا ویری۔ایہہ نہ دسیا پءی اوہ ماڑیاں دی گل وی کردے نیں۔ عثمانی پادشاہت دا کانڈ بچہ کوہلو کرن دے نال نال پہلی لام (WW1)توںدوجی لام(WW2)وچکار کابل، تہران،پنجاب، سندھ، دلی، یوپی، بنگال، حجاز تے مصر تائیں اسلامی جتھے بندیاں نوںدھرم تے فرقیاں دی سیک نال پکایا گیا تانجے ایہہ خدا اتّے دھرماں، مذہباں تے اخلاقاں دے ویری نال نبڑ سکن۔جس نوں کھوج لانی ہے اوہ کیتھ جیفری دی کتاب ”ایم آئی 6“ پڑھے۔ہندواں وچ لال۔بال۔پال توں گاندھی تیک ایسے ایجنڈے دے راکھے۔ گاندھی جی دی لکھت ریکارڈ تے پئی ’میں دھرم دی راکھی پاروں سیاستاںوچ آیا ہاں نہ کہ سیاستاں نوں اگے لیجاون لئی دھرم نوں ورت رہیا ہاں‘۔ایہہ سب گرم پانیاں تیک روس نوں نہ آون دین دا بندوبست۔دھرم، خدا تے اخلاقاں نوں بچاون لئی سب لین حاضر، کتاباں تے آرٹیکل لکھوائے گئے، مسلیاں، ہندواں، سکھاں، پارسیاں تے مسیحاں لئی وکھو وکھ بیانئیے لکھوائے، شاعراں، ادیباں نوں موضوع دتے، رسالے تے اخبار کڈھوائے تے قنون بنائے۔دھرمی ونڈ نوں ٹیک دین لئی اسلامیہ،امامیہ،خالصہ، سناتن تے مشنری سکول،کالج بناون دی اجازتاں دتیاں جو میکالے دے فرمان دے الٹ سی۔میکالے نوں کیہہ پتہ سی پئی روس نال لڑن دے خلاف تجویزاں دین والے لارڈ میودے حفاظتی جیل(کالا پانی) وچ قتل (1872)بعدوں گریثرن تے دھرم اک مک اتے ٹیچا اوہی ، نہ کوئی تتّے پانیاں تیک اپڑے اتے نہ پرانا ریشمی رستہ مڑ چالو ہوئے۔ایس عالمی بندوبست دے راکھے برطانیہ تے فرانس پردوجی لام دے کھڑچ کنڈل وچ 14اگست1941والا اٹلانٹکی گھماپرانے ملکاں نوں امریکہ بہادر دے تھلّے لا دتا اتے نویں شاہ نیںآپدی بساط وچھائی پر مہرے وی ادھار لتے اتے بیانیئے وی۔نواں پرانے نوں ورتدا وی ہے تے رگیداوی ہے۔اخیر امریکہ آپ نوں کڈا وکھرا کردا، اس نوں انہاں گوریاں ہی بنایا سی جہیڑے پورپی برتریاں تے چٹے دے بوجھاں(white man burden)جہیے کوڑ بیانیاں وچ جوان ہوئے سن۔ورلڈ بینک، آئی ایم ایف، اقوام متحدہ نویں گھوڑے، فیل تے توپ بساط تے لا دتے اتے چونویں ویری روس نال سرد جنگ دی بازی شروع۔سب توں وڈا جھوٹ دو نظاماں دی لڑاءی، ایہہ سرد جنگ دا نظریاتی گھن چکر سی۔1941توں 1947وچکار دنیا کنج نویں پادشاہ دی اسیر ہوئی، پیٹر کلارک ساری کہانی لکھ ماری۔پاکستان بناون تے انڈیا نوں آزاد کرن والے امریکی کیمپ(دربار) وچ حاضریاں لئی اتاولے۔کانگرس ورکنگ کمیٹی دا کانجی دوارکا داس کانگرس ولوں امریکہ گیا سی جتھے امریکہ روس دے مقابلے وچ مزدوراں دی نویں عالمی جتھے بندی بنا رہے سن۔1946دے آخری مہینے سن اتے کانجی آپدی اکھاں نال انڈیا نوں آزاد ہوندا ویکھن پاروں چھیتی چھیتی واپسی دی تیاریاں وچ مگن۔ پر پنڈت نہرو دا پتر آگیا پئی ’تیرا امریکہ رکنا بہوں ضروری۔'امریکہ وچ ساڈے دوست گھٹ نیں توں لابنگ کر کیونجے آزاد انڈیا دی ترقیاں لئی ساڈا امریکہ کیمپ وچ رلنا لوڑی دا ہے۔'‘ایہہ سارے پتر کانجی آپدی کتاب وچ لکھ مارے۔مارچ1947وچ سیکولرکانگرس پنجاب دی دھرمی ونڈ لئی دلی وچ قرارداد پاس کیتی اتے 3۔جون نوں کانگرس، مسلم لیگ تے اکالیاں ایس دی دستخط کیتے اتے کیمونسٹاں ایس نوں قبولیا۔جمہوریت دی ماں آکھوان والی برطانوی پارلیمنٹ ایس دھرمی ونڈ تے جولائی وچ قنون بنایا تے دھرمی ونڈ تے مہراں لایاں۔اینج دنیا اس قتلام نوں ویکھیاجس دی نظیراں اج دے دیہاڑ تیک نہیں ملدیاں۔جے نہرو کابینہ مشن من لیندا تاں گھٹو گھٹ ایہہ قتلام نہ ہوندا تے نہ دھرم پاروں لوکاں نوں آپدی بھوئیں چھڈنی پیندی پر ٹاٹے، برلے نوں ایہہ منظور نہیں سی، جسونت سنگھ60سال بعدوں ایہہ من لتا۔بھارت تے پاکستان نویں پادشاہ دے دربار وچ وڑن لئی میکارتھی تھیسس دے متوالے تے دونویں ملکاں وچ کمیونسٹاںنوں پھینٹیاں لایاں۔تلنگانہ توں پنڈی سازش کیس تک سب ریکارڈ تے ہے۔بھارت تے پاکستان پہلے دن توں اک دوجے دے ویری، کشمیر نے ایس اگ نوں ودھایا۔ ہن سرد جنگی بندوبست وچ دونوں اک کیمپ وچ نہیں جا سکدے سن۔روسی کیمپ دوناں دی سیکنڈ آپشن۔فیصلہ تتّے پانیاں والے تھیسس پاروں پاکستان دے حق وچ آیا تے بھارت نوں روسی کیمپ وچ جانا پیا۔ روس دے ٹٹن اتے چین دے وڈا عالمی کھڈاری بنن بعدوں پرانی کہانی مک گئی اتے روس دی انٹیلی جنس، فیڈرل سیکورٹی سروسز دے آگوالیگزنڈر بورٹنی دے دوریاں بعدوںپاکستانی سرکار تتّے پانیاں تیک روس نوں جی آیا نوں آکھن لئی تیار۔پاکستان صوبہ سرحد دی بے نامی 18ویں ترمیم راہیں مکا چکا ہے پر گریثرن تے دھرمی ونڈ دے ایکے دی نیہاں بہوں ڈونگیاں نیںاتے ایس دے ہرکارے بھارت تے افغانستان بارے چلدی پرانی پالیسیاں تے بیانیاں تے پلدے نیں۔ایہہ بیانیہ بدلنا ہن ویلے دی لوڑ جے، کوئی منے یا نہ منے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels