Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کیہ امریکی پردھانگی مک رہی اے؟

کیہ امریکی پردھانگی مک رہی اے؟

ڈاکٹر منظور اعجاز
November 24th, 2016

صدر دیاں چوناں جت کے ڈونلڈ ٹرمپ نے امریکہ دے دنیا نال کار ویہار نوں نویں سرے توں اسارنا شروع کر دتا ہے۔ اوہناں نے چوناں دی مہم ویلے ایہہ وعدہ کیتا سی جو اوہ امریکہ نوں سب توں اگے رکھن گے۔ ایہدا مطلب ایہہ سی بئی امریکہ اوہناں معاہدیاں تے باندھاں وچوں نکل جاوے گا جنہاں نال امریکہ دا مالی نقصان ہوندا اے۔ امریکہ دے نقصان دا ایہہ مطلب سی بئی امریکہ اوہناں بیوپار معاہدیاں نوں چھڈ دیوے جیس نال امریکہ دی صنعت باہر جا رہی ہے تے امریکی مزدور بیروزگار ہو رہے ہین۔ ایسدا دوجا مطلب ایہہ سی بئی امریکہ اوہناں دفاعی معاہدیاں نوں بدل دیوے جنہاں پاروں امریکہ اپنی فوج تے ودھیرے خرچ کردا ہے تے جاپان تے جرمنی جیہاں ملکاں نوں مفت دفاعی چھتری دیندا ہے۔
دفاعی معاہدیاں دی گل تے پھیر کدی کراں گے پر ایس لکھت وچ اسیں امریکہ دی بیوپار راہیں پردھانگی تے جھات ماراں گے تے ویکھاں گے جو کیہہ ڈونلڈ ٹرمپ سچی مچی امریکی سرمایہ داراں نوں دوجے ملکاں وچ پیسہ لاون توں روک سکدا ہے؟ ایہہ گل چیتے رکھن جوگ ہے جو امریکہ اپنے وادھو سرمایے راہیں دنیا دی پردھانگی اپنے ہتھ وچ رکھی بیٹھا ہے۔ امریکہ فوجی پکھ توں وی ساری دنیا وچوں تگڑا ہے پر تگڑا تے روس وی سی جیس نوں دنیا دی پردھانگی توں پچھے ہٹنا پیا۔ ایس لئی ایہہ گل صاف ہے جو جے امریکی سرمایہ باہر جاون توں روک دتا جاوے تے امریکی پردھانگی دا انت ہو جاوے گا۔ اج دی دنیا وچ سرمایہ رنگا رنگ بیوپار معاہدیاں نال اک توں دوجے ملک جاندا ہے۔ امریکی سرمایہ وی انج ہی باہر پیر پسار رہیا سی۔
دونلڈ ٹرمپ تے بیوپار معاہدیاں وچوں نکلن دا بڑا بھار ہے۔ اوہناں چوناں ویلے ایہہ وعدہ کیتا سی جو اوہ نیفٹا وچ مڈھلیاں ادلا بدلیاں کرن گے تے ٹرانس پیسیفک پارٹنر شپ ( ٹی ٹی پی) معاہدے تے دستخط نہیں کرن گے۔ نیفٹا امریکہ کینیڈا تے میکسیکو دے وچکار معاہدہ ہے جدوں کہ ٹی ٹی پی وچ باراں ملک رلتی ہیں۔ اہناں باراں ملکاں وچ جاپان، آسٹریلیا، ویت نام ، میکسیکو تے کینیڈا ورگے ملک رلتی ہین۔ نیفٹا تے پہلے توں عمل ہو رہیا ہے پر ٹی ٹی پی تے اجے تیک ممبر ملکاں نے دستخط نہیں سن کیتے۔ ڈونلڈ ٹرمپ ہوراں اعلان کردتا ہے جو اوہ ٹی ٹی پی وچوں نکل رہے ہین۔
ڈونلڈ ٹرمپ جنہاں ریاستاں دی وجہ توں صدر دا الیکشن جتے ہین اوہناں وچ مسئلہ ایہہ ہے جو ایہہ وڈیاں صنعتی ریاستاں سن۔ امریکی سرمایہ دار اہناں وچ اپنا کاروبار ٹھپ کے سرمایہ میکسیکو، کینیڈا، چین تے ہندوستان ورگے ملکاں وچ لے گئے تے اہناں ریاستاں وچ صنعتی شہر اجڑ گئے تے بھکھ ماری پے گئی۔ اہناں ریاستاں دے مزدور سمجھدے ہین جو ایس دا سبب نیفٹا تے ٹی ٹی پی ورگے بیوپار معاہدے ہین۔ اوہناں نے ڈونلڈ ٹرمپ نوں جتوایا ہی ایس لئی ہے جو اوہناں وعدہ کیتا سی کہ اوہ اہناں بیوپار معاہدیاں وچوں امریکہ نوں کڈھ لین گے۔ ہن ڈونلڈ ٹرمپ ہوراں اپنا وعدہ پورا کرن لئی ٹی ٹی پی توں نکل جاون دا اعلان کیتا ہے۔
سوال پیدا ہوندا ہے جو کیہہ امریکی سرمایہ دار اپنی صنعت اوہناں ملکاں ول لے جانا بند کر دین گے جتھے پیداوار دی لاگت بہت گھٹ ہے؟ میکسیکو یا چین وچ اوہو شے ڈالر وچ بندی ہے جیہڑی امریکہ وچ پنجی ڈالر وچ تیار ہوندی ہے۔ ایہہ فرق مزدوراں دی اجرت نال پیندا ہے۔ امریکہ وچ ہنر مند مزدور دی اجرت پنجی ڈالراں توں ودھ ہے جدوں کہ ایہہ میکسیکو یا چین وچ اک یادو ڈالر ہے۔ ایس لئی ٹاکرا امریکہ دے مزدوراں تے سرمایہ داراں وچکار ہے: سرمایہ داراں نوں باہر پیداوار کرن وچ منافع ہے تے مزدوراں نوں سرمایہ اندر رکھ کے مزدوری ودھ ملدی ہے۔ سوال ہے اہناں وچوں کیہڑا جتے گا؟ ظاہر گل ہے جو سرمایہ داری نظام وچ سرمایہ دار ہی جتدا ہے تے ایس واری وی ڈونلڈ ٹرمپ دے وعدے سکھنے وعدے ہی رہن گے تے امریکی سرمایہ کسے نہ کسے روپ وچ باہر جاندا رہوے گا۔
جیویں پہلاں کہیا گیا ہے امریکہ دی پردھانگی وی سرمایے دے دنیا وچ کھلار پاروں ہے۔ ڈونلڈ ٹرمپ جو مرضی کہندا رہوے امریکی سامراجی نظام ایویں اپنی پردھانگی نہیں مکا دیوے گا۔ ایس لئی ڈونلڈ ٹرمپ اک پاسیوں بیوپار معاہدے توڑ وی دیون تے امریکی سرمایہ کار باہرلی دنیا وچ اپنے وڈھے منافعے لئی کوئی ہور راہ لبھ لین گے۔ مکدی گل ایہہ بئی چلدے امریکی نظام نوں ڈونلڈ ٹرمپ دے آون نال کوئی خاص فرق نہیں پوے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels