Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بی بی سی توں پنجابی پروگرام

بی بی سی توں پنجابی پروگرام

جمیل احمد پال
November 23rd, 2016

برٹش براڈکاسٹنگ کارپوریشن نے آوندے سال توں اپنے پروگراماں نوں کوئی ڈیڈھ درجن ہور زباناں وِچ نشر کرن دا فیصلا کیتا ا ے۔ ایہناں زباناں وِچ پنجابی وی شامل اے۔
پنجابی بولیندڑ حلقے ولوں ایس اقدام اُتے خُشی دا وکھالا کیتا جا رہیا اے۔پنجابی زبان نال بیتے ڈیڈھ دو سو ورھیاں توںجو ہتھ ہوندا آ رہیا اے‘ اوہدا نتیجا ایہ نکلیا اے کہ پنجابی دے حقّاں دے حوالے نال کوئی خبر ملے تاں اسیں اوہدے اُتے وی خشی نال بغلاں وجاندے آں‘ حالاں اوہ ساڈا ایسا حق ہوندا اے جو اوپریاں نے کھوہیا ہویا اے۔
بی بی سی جہڑا 1940 توں مختلف زباناں وچ پروگرام نشر کردا آ رہیا اے‘ اوہدی فہرست وچ تن درجن دے لگ بھگ زباناں شامل نیں جہناں وچ کئی زباناں ایسیاں وی نیں جو پنجابی نالوں بہت گھٹ گنتی دے لوکاں دِیاں زباناں نیں پر اوہناں دی کوئی نہ کوئی سٹریٹیجک اہمیت اے کہ بی بی سی نے پنجابی نوں نظر انداز کر کے اوہناں نوں اپنی فہرست وِچ شامل رکھیا۔ بیتے ورھیاں وچ افغانستان وچ دو طاقتاں دی پراکسی جنگ ہوئی تاں بی بی سی نے پشتو نشریات وی شروع کر دِتیاں۔
ایہدے ٹاکرے پنجابی نوں ماسکو‘ تاشقند‘ بیجنگ تے ہور کئی دیساں دے ریڈیو سٹیشناں اُتے نشریات دی زبان ہون دا مان ملیا رہیا۔ بی بی سی تے نہیں‘ لندن تے برطانیا دے ہور بہت سارے ریڈیو سٹیشن وی پنجابی زبان وِچ پروگرام نشر کردے نیں۔بعض ریڈیو سٹیشن تاں نرا پنجابی لئی ای وقف نیں۔ ایہو صورتحال کینیڈا تے امریکا دی اے۔
بی بی سی دا مسئلا ایہ رہیا اے کہ اوہ آپ مختیار ادارا ہو کے وی انگریزاں دی سامراجی پالیسی توں باہر نہیں نکل سکدا۔ انگریز جدوں برصغیر وچ آیا تاں اوہنے اپنے مفادات لئی ایتھے اردو نوں رواج دِتا۔ اوس سمے ایس زبان نوں ’’ہندستانی‘‘ آکھیا جاندا سی تے ایہدے توں مراد اردو تے ہندی دوویں سن۔ انگریز نے ایس زبان نوں فارسی رسم لخط وچ لکھن دی حوصلا افزائی کیتی تے ایہنوں ’’ریختا‘‘ توں اردو بنا چھڈیا۔ فیر ایہنوں پنجابیاں دے سر اُتے سوار کیتا گیا۔ جہناں پنجابیاں نے اوس سمے مادری زبان دے حق وچ جلسے جلوس کیتے‘ اوہناں نوں گرمکھی مگر لا دِتا گیا۔ سکھاں نے گرمکھی قبول کر لئی جا کہ مسلماناں نے فارسی توں جانو ہون پاروں فارسی رسم لخط نوں ترجیح دتی تے انج اردو نوں اپنے گلے دا ہار بنا لیا۔اج ایہ حال اے کہ اگ لین آئی گھر دی مالک بنی پئی اے تے پنجابی معذرت چاہندا روَیّا ورت کے اپنے حق دی گل کردے نیں۔
بی بی سی نے پنجابی نوں اپنیاں نشریات لئی اپنایا اے تاں ایہ اوہناں دی اپنی ضرورت اے۔ پنجابی نوں اوہناں دی ضرورت نہیں۔ جے بیتے ستر اسّی سال پنجابی اوہناں توں بغیر وی برطانیا دی تیجی وڈی زبان بن گئی اے تاں بی بی سی دے نشریے اوہنوں ہور کیہ وڈا کر لین گے؟ پنجابی نوں ورت کے البتا بی بی سی نے اپنی اِک وڈی ضرورت پوری کیتی اے۔
(روزوار ’’لوکائی‘‘ لاہور… 23 نومبر2016 دا ادارِیا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels