Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> زرداری جو آکھ نہ سکیا

زرداری جو آکھ نہ سکیا

عامر ریاض
November 23rd, 2016

آصف زرداری آپدے انٹرویو نال اک وار فیر تھرتھلیاں پا دتیاں جے۔ انٹرویو دی ٹائمنگ بھاویں بڑی اہم سی پر جوکجھ زرداری نہیں آکھ سکیا ایس دی اہمیتاں زیادہ نیں۔ ’’سیاستاں وچ ٹائمنگاں دی اہمیتاں بہوں زیادہ ہوندیاں نیں۔ اوس ویلے ویلا انج دا سی پئی مینوں بیک سیٹ تے جانا پیا۔‘‘ ایہہ پوری گل نہیں اتے نہ ہی اینکر نے ایہدیاں تفصیلاں پچھیاں۔ ایہناں نوں بیک سیٹ تے کیوں جانا پیا اتے ایہناں نوں اجیہی تقریر کیوں کرنی پئی جس بعدوں اوہ آپ باہر چلے گئے تے عاصم دے مقدمیاں دا ’’کٹا‘‘وادھو۔ اوہناں نوں ایس بارے کھل کے گل کرنی چاہیدی ہے۔ پر جے اوہ آکھدے نیں کہ اوہ بلاول نوں وی ذمہ واریاں دینا چاہندے سن تے ایہہ اوہ گل ہے جس تے ہور زیادہ کھل کے گل ہونی لوڑی دی ہے۔
نصرت بھٹو توں بے نظیر ہوراں تیک پارٹی قیادتاں دا جانا وی کوئی سوکھا کم نہیں سی اتے سانوں ’’چاچے‘‘ یاد نیں جنہاں بی بی نوں کراہے پاون دی کوششاں کیتیاں سن۔ زرداری تے فیر بھٹو نہیں اتے اوہ ایہہ منن لئی اج وی تیار نہیں پئی ایہناں دا رول وقتی ہی سی۔ ایہناں دے ویلے وچ پارٹی نے سب توں بھیڑا ویلا ویکھیا۔ ایہناں دی بھین تے یاراں نوں پارٹی دا اُکا خیال نہیں سی یا اوہ پی پی پی دے کلچر توں پرے سن۔ بلاول نوں اوہ سکھن دا موقعہ کیہ دین گے پئی اوہ نانے تے ماں دی سیاستاں دی گُڑھتی لے کے جمیا ہے۔ ایس نوں نانے تے ماں دی سیاستاں توں ہی سکھنیا جے۔ زرداری ہوریں بس ایس دی راہ نوں اوکھا نہ کرن۔
دو مولویاں وچ ککڑی حرام ہون توں بچاون لئی پارٹی نوں پنجاب وچ آپ نوں کھڑا کرنا ہے۔ منظور وٹو دے مقابلیاں وچ قاہرہ تے چن ہوراں دی چوائساں چنگیاں پر جے پارٹی لاہور وچ نہ کھڑی ہوئی تاں فیر پنجاب وچ وی کھڑی نہیں ہو سکے گی۔ لاہور پارٹی دی قیادتاں وچ لہوری منڈے چاہیدے نیں ’’بدر‘‘ ورگے۔پارٹی نوں پنجاب پالیسی حوالے نال آپدے قبیلیاں نوں سدھا کرنا ہو سی۔ پئی تسی پنجاب وچ ہی نویں صوبے کیوں بنانا چاہندے ہو؟
جے پارٹی دا مہاندرا پنجاب مخالفتاں والا ہو سی تاں فیر ایس دی شکلاں وی اے این پی اتے ایم کیو ایم ورگیاں بنن گیاں1970والی پی پی پی دی نہیں۔ سندھ دی پارٹی نوں وی کوئی ودھیا، نظر آون والے کم کرنے لوڑی دے نیں۔ ایم کیو ایم دی توڑ بھن پاروںپارٹی نوں کراچی وچ اک چوکھا ویلا ملیا ہے پر جے سندھ دی پارٹی سیّد غنی تے رضا ربانی نوں اگے کرے تاں گل بن سکدی ہے۔عاصم ہوراں دا ناں اس ویلے تیک ٹھیک جداں تیک اوہ اندر ہے۔
ایہہ پی پی پی ہی ہے جیہڑی کراچی وچ سب دھراں نوں رلا سکدی ہے۔ زرداری ہوری درشنی پہلوان بن کے رہن اتے بلاول نوں پارٹی دے پرانے پکے ورکراں نال بہتا ملن ورتن کرن دین۔
2018ء اک اوکھا پینڈا ہے اتے بی بی دے برعکس اج مارشل لأ وی نہیں تے سندھ سرکار وی پارٹی کول ہے پورے اٹھ ورہیاں توں۔ اج آپدی غلطیاں نوں من کے ہی اگے رستہ لبھے گا۔ پی پی پی ملک تے قوم نوں بہوں کجھ دتا ہے، ایس بارے کوئی شک نہیں۔ 1973 دے آئین توں 18 ویں ترمیم تیک بڑی چنگیاں مثالاں نیں پر پارٹی کولوں بڑیاں غلطیاں وی ہوئیاں نیں۔ اج بڑھکاں مارن دی تھاں آپدی غلطیاں نوں سب دے ساہمنے منن دا ویلا ہے۔
سیاست وچ ٹائمنگ دی بڑی اہمیتاں ہوندیاں نیں تے اج ایہناں غلطیاں نوں مننا وی اوسے ٹائمنگ دا امتحان جے۔ سندھ سرکار سندھیاں لئی وڈا چمتکار نہیں کر سکی پر ہلے وی دو ورہیاں دا ٹائم ہیگا۔ ایہہ سب ملبہ لے کے پارٹی 2018ء دی چوناں وچ کنج اُترے گی؟’’ہائی مورل گرائونڈ‘‘ لئی پارٹی دے وڈکیاں نوں سر جوڑنا ہوسی۔زرداری ہوری ایس وچ بلاول دا پینڈا اوکھا نہ کرن۔پی پی پی پنجاب تے خیبر پی کے دوناں 2008 تیک ایڈیاں ماڑیاں نہیں سن پر پارٹی نویں صوبیاں دا پھاہ آپوں پایا۔ اج زرداری ہوراں نوں مننا چاہیدا ہے پئی پارٹی اک کوڑ پالیسی پاروں پچھے گئی جے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels