Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> اج تے ہو گئی …ترکی، ترکی

اج تے ہو گئی …ترکی، ترکی

عامر ریاض
November 17th, 2016

ترکی ساڈا نواں ’’ایس ایچ او ا‘‘ اے۔ کجھ چر پہلاں جدں یمن پاروں سعودی عرب تے ایران لڑن نوں پھردے سن تے ایہہ ترکی ہی سی جس نے دوناں نوں ٹھنڈا کیتا سی۔ ایران پہلے تے سعودی عرب بعد وچ ’’ایس ایچ او‘‘ رہیا ہے۔ خبر ایہہ ہے پئی ترکی دے صدر طیب اردگان ہوری پاکستان دے دورے تے نیں۔ ترکی یورپ دا بوہا ہے اتے CPEC دا اگلا پڑائو ایران تے ترکی نیں۔ پاک، چین، ایران تے ترکی میل جول نویں اُمیداں دا بھنڈار ہے۔ پر کجھ قوتاں پاکستان وچ اجیہیاں وی نیں جیہناں نوں ایہہ نواں بندوبست ہضم نہیں ہو رہیا۔ اوہ دُدّھ وچ مینگناں پانا چاہندے نیں پر پاکستانی ایہناں نوں سیاندے نیں۔ اردگان اپنی تقریر وچ اوہی آکھیا جو چین، امریکہ سانوں آکھدے رہے نیں۔ پئی سانوں ات گردی تے انتہا پسندیاں دے خلاف وڈا مورچہ لانا ہے۔ ترکی پاکستان نوں بھارت سمیت سارے ہمسائیاں نال مل جل کے رہن بارے گل کر رہیا ہے۔
ترکی دے صدر دے دورے بعدوں کجھ لوکاں پاک ترک سکولاں دے مامے بن گئے۔ یا تے ایہناں گولن توں چپ چپیتے فنڈ آندے نیں یا فیر ایہہ نویں بندوبست توں خار کھائے بیٹھے نیں۔ جے گولن دا نیٹ ورک 120 ملکاں وچ ہے تے پاکستان نوں پتا ہونا لوڑی دا ہے پئی ایتھے ایس تنظیم دے کیہڑے حامی نیں۔ اردگان ہوراں داعش، القائدہ دی نندیا کیتی۔ ترکی وچ ہون والی ناکام فوجی بغاوت تے ایہہ پاکستان ہی سی جس سب توں پہلاں مذمتی بیان کڈھیا سی۔ کیونجے پاکستان آپ ایس دا ڈنگیا ہویا ہے۔ ایس بغاوت توں اک دن پہلاں پاکستان وچ 13 ضلعیاں وچ فوجی سربراہ دی حمائیتاں وچ بینر لگ گئے سن۔ کیہ گولن دے حمایتی پاکستان وچ متحرک سن؟
کڑیاں نال کڑیاں جوڑنیاں لوڑی دیاں نیں۔
اردگان آکھیا پئی پاکستان تے ترکی وچ تجارتاں نوں اک ارب ڈالر (اک کھرب) تک پہچانا چاہندا ہاں۔
کشمیر دے مسئلہ تے اقوام متحدہ دی قرار داداں دی حمایت کر کے اردگان بھارت نوں پیغام دتا پئی پاکستان اکلا نہیں پر ترکی پاک بھارت جنگ نوں نہیں منیندے اتے چنگے تعلقات تے زور دیندے نیں۔
ہن اردگان لہور آ رہے نیں اتے لہور وچ ایہناں نوں جی آیاں نوں آکھن دی تیاریاں زوراں تے نیں۔ جد تسیں ایہہ سٹوری پڑھو گے تے اوہ لہور ہی ہون گے۔ ویسے تے بلاول وی لہور وچ نیں اتے جیالے لیڈر جہانگیر بدر دے گھر پرسا دین اپڑے نیں۔
عمران خان اک وار فیر اکلے کھلوتے نیں۔ ایہناں نال جماعت اسلامی تے شیر پائو وی نہیں۔ قادری ایتھے ہے نہیں تے بس ایہناں نوں شیخ رشید تے اکتفا کرنا پے رہیا ہے اتے شیخ ہوری آپوں ہار چکی جنگ دے ڈھنڈورچی نیں۔
ہُن عمران نوں چاہیدا ہے پئی قادری نوں سدے تے گولن تے پاک ترک ٹیچراں دی کھل کے حمایتاں دا اعلان کردے۔ ویسے اعلان کرن دی اُکا لوڑ وی نہیں کیونجے گولن دے پاکستان ہرکارے آپ اتاولے ہو رہے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels