Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ٹرمپ دی ’’جنت‘‘ اتے نویں جنگاں؟

ٹرمپ دی ’’جنت‘‘ اتے نویں جنگاں؟

عامرریاض
November 11th, 2016
5 / 5 (3 Votes)

ایہہ پہلی وار نہیں ہویا پئی امریکی میڈیا دھوکہ کھا گیا یا فیر میڈیا راہیں دھوکہ دِتا گیاسوچن والی گال ہے؟۔ جس جس نوں ریگن دا 1980 والا الیکشن یاد ہے اوہ جاندا ہے پئی میڈیا نوں پُٹھا وی ورتیا جا سکدا ہے۔ اسانج دی Leaks کنج کم کیتا اتے امریکی خفیہ ادارے کنج چوناں توں پہلاں متحرک ہوئے ایہہ سب تسی جاندے ہی ہو۔ 1978 توں بعد وی ایہہ ادارے ڈیموکیٹاں دے لیڈرجمی کارٹر دے کیوں خلاف ہو گئے سن اتے اس نوں ’’بدترین مثال‘‘ کیوں بنانا چاہندے سن اجہی کہانیاں مشہور سی آئی اے ہرکارے چارلی ولسن اتے جان کے کولی ورگے آپدی کتاباں وچ لکھ چکے نیں۔ ایران وچ موجود سفارت خانے اْتے پاسداران انقلاب دے قبضے نوں چوناں تک برقرار رکھنا لوڑی دا سی اتے ایس قبضہ نوں تنگ نظر قوم پرستی نوں وادھو کرن لئی کارٹر دے خلاف خوب ورتیا گیا کہ جس طرح حالیہ امریکی چوناں وچ ’’ای میلاں‘‘ "Emails" دے مسئلہ نوں ورتیا گیا۔
ریگن دی چوناں وچ میڈیا والے سوچ وی نہیں سکدے سن پئی ریگن 538 وچوں 489 الیکٹرول کالج دے ووٹ لے کے کارٹر نوں بدترین شکست دے گا۔ جس افغان جہاد نوں امریکی سرپرستی وچ لڑیا جانا سی ریگن دا جتنا ایس پروجیکٹ دا حصہ سی۔ پر ہرکارے ایہہ وی چاہندے سن پئی کارٹر تے ڈیموکریٹاں نوں اوہلے وچ رکھن لئی میڈیا تے ایہو دسیا جائے پئی کارٹر وی بڑا تگڑا ہے۔ پر سوچن دی گل ایہہ ہے پئی ٹرمپ کولوں اوہ کیہڑا کم لینا ہے؟ کیہہ دنیا نوں ڈرانا ہے؟ یا چین نال بھارت نوں لڑانا ہے یا ایرانی معاہدے توں پِچھے ہٹنا ہے تے مڈل ایسٹ خصوصاً شام وچ من مرضیاں کرنیاں نیں؟ ٹرمپ جس کابینہ نال ایس میدان وچ اُتر رہیا ہے اوہ ناں کافی نیں اس دی کارروائیاں نوں سمجھن لئی۔ موسمی وٹاندرے (Climate Change) بارے ٹرمپ دے خیالاں تے وار انڈسٹری دی چھاپ وی ہے اتے کوئلے، گیس تے تیل دے مافیا دا پرچھاواں وی۔ ٹرمپ پچھلے ورھے ہون والے پیرس معاہدے توں امریکہ نوں پِچھاں لیانا چاہندا ہے جس تے 190 مُلکاں رَلت کیتی سی۔ نیویارک ٹائمز ایہہ لکھدا ہے پئی آلودہ گیساں پھیلاون وچ امریکہ دُوجے تے چین پہلے نمبر تے ہے اتے جے امریکہ ایس توں پراں ہو گیا تاں فیر موسمی وٹاندرے دے ایجنڈے نوں بہوں نقصان پہنچے گا۔ آلودہ گیساں پھیلاون والیاں (Green house polluters) وچ تریجا وڈا ملک بھارت ہے۔
ٹرمپ موسمی وٹاندرے دے ایجنڈے نال نجھٹن لئی میرون ایبل (Mayron Ebell) نوں اگے کیتا ہے۔ لندن سکولآف اکنامکس توں پڑھے میرون ہوراں’’ گلوبل وارمنگ‘‘ نوں یورپی یونین دا گھن چکر آکھدے نیں۔ انہاں دا آکھنا ہے سرد ممالک نوں گلوبل وارمنگ نال فیدے ہوں گے۔ انہاں ستمبر 2016 وچ پیرس معاہدے دے خلاف بیان دتے سن۔ ٹرمپ نوں کنج جتایا گیا؟ ایس دی کہانی فیر سہی، پر اوہ اگے کیہہ کرے گا ایہہ گل زیادہ اہمیتاں رکھدی ہے۔ امریکہ وچ جنگاں تے اسلحہ نال جڑے وڈّے کاروباری مفاداں والے بے روزگاری تے نفرتاں نوں ورتنا جاندے نیں اتے انہاں نوں ایس گل دا گلہ سی پئی اوبامہ نہ تے کوئی نویں جنگ چھیڑی اتے فیر برما، عراق، افغانستان، کیوبا، ایران نال جنگاں دا ماحول نہ بنن دِتا۔ شام وچ روس نال مل کے جنگ نہ چھیڑنا وی اوبامے دا وڈّا قصور ہے۔ پاک امریکہ میل جول دے حوالیاں نال ایہہ اک اوکھا دَور ہوسی کیونجے جداں اندر دے مسئلے حل نہیں ہوندے تاں غصہ باہر کڈیا جاندا ہے۔ کیہہ ٹرمپ 9/11 وچ رَلتی سعودی خانداناں نوں امریکہ لیا کے ٹرائل کرے گا؟ ہیلری ایس دی کس منہ نال مخالفت کرے گی؟ اوبامہ تے آپدی پارٹی نوں نہیں سمجھا سکیا سی پر جداں ایہہ مقدمہ چلیا تے نسل پرست ایس نوں آپدی اکھ نال ویکھن گے۔ انٹرنیشنل قانون وچ نویں پواڑے پین گے۔ کسی وی امریکی چوناں بعدوں اجہے ہنگامے کدی پہلے نہیں ہوئے۔ ایہہ گل دس پاندی ہے پئی سارے امریکی ٹرمپ نوں نجات دہندہ نہیں منیندے سگوں اوہ ایس دے جتن توں فکرمندیاں وچ نیں۔ پاکستان تے پہلے ہی نشانے تے ہے اتے جے ٹرمپ جنوبی ایشیاء وَل مُنہ کیتا تاں پاکستان لئی مسئلہ وگڑجاسی۔ پر پہلے 6 مہینیاں وچ ٹرمپ اندر دے مسئلیاں تے ہی رُجھیا رہ سی اتے ایہہ اوہ ویلہ ہے جس وچ پاکستان آپدی پالیسیاں نوں بدل کے امریکہ وچ نویں سجن رَلائے۔ پاکستان وچ تنگ نظر قوم پرستاں، بنیاد پرستاں نوں چیتے رکھنا چاہیدا ہے پئی ٹرمپ انہاں دا عکس ہے اتے جے ٹرمپ دُنیا لئی خطرہ ہے تے اوہ وی کوئی دُنیا لئی برکت نہیں۔ ایہہ گل پکی ہے پئی جے پاکستان وچ جمہوری تسلسل جاری رہ سی تے پارلیمان وچ سارے فیصلے سامنے ہوں گے تاں کوئی پاکستان نوں ڈکٹیٹ نہیں کرا سکے گا۔ ہمسائیاں نال چنگا میل جول اتے اَت گردی تے انتہاپسندیاں خلاف اِک مک ہون اتے پارلیمان نوں منے بغیر اسی ٹرمپ، Brexit تے مودی دے دَور وچ پرانے بیانیے نال آپدے وَیری ودھا ہی سکدے ہاں۔




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels