Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> بلوچستان وچ علیحدگی دی تحریک

بلوچستان وچ علیحدگی دی تحریک

جمیل احمد پال
January 17th, 2015

سیکرٹری خارجہ اعزاز چودھری ہوراں اپنی گل بات وچ دسیا اے کہ اسیں بلوچ علیحدگی پسنداں نوں پناہ دین والے دیساں نال احتجاج کر رہے آں۔ اوہناں نے چتاونی دتی کہ علیحدگی پسندی نوں ہوا دین والیاں قوتاں نال کرڑے ہتھیں نبڑاں گے، جد کہ علیحدگی پسنداں دیاں سرگرمیاں ودھ گئیاں نیں ۔اوہناں نے بھارت نوں افغانستان تک رسائی نہ دین تے یورپی یونین نوں پھانسیاں دے معاملے وساہ وچ لین بارے وی دسیا۔
بلوچستان دا معاملہ لمے چراں توں، سگوں پاکستان بنن توں ای پاکستان دی سیاست وچ اک دُکھدا پھوڑا بنیا ہویا اے جو کسے نہ کسے بہانے رسدا ای رہندا اے۔ بلوچ لیڈر نو روز خان نوں قرآن اُتے حلف دین دے باوجود اوہدے پُتراں نوں قتل کرن اک ایسا عمل سی جیہنے بلوچوں وچ ایہہ احساس پیدا کیتا کہ پاکستان سرکار قرآن اُتے حلف دے کے وی اوہدی پاسداری نہیں کردی۔ ایہہ اک ایسی سوچ سی جیہدے بہت ماڑے نتیجے نکلے تے اعتبار دا تعلق اُکا ای ختم ہو کے رہ گیا۔
پہاڑاں اُتے گئے بلوچاں نوں ذوالفقار علی بھٹو نے عام معافی دے کے تھلے لیاندا تے اوہناں نوں ملکی قومی دھارے وچ شامل کرن دا مُڈھ بنھیا پر ایہہ رشتہ وی لمے چراں تیکر نہیں چل سکیا۔ کسے نہ کسے طرحاں کار ویہاری تعلقات چلدے رہے پر مشرف دور وچ جدوں بلوچاں دے لیڈر اکبر بگتی نوں قتل کر دتا گیا تاں وساہ دے رشتے نوں ڈھاء لگ گئی۔ ایہہ گولی بگتی نوں نہیں سگوں بلوچاں دے وساہ نوں ای جا لگی۔ ایہدے نتیجے چ اک واری فیر بلوچستان اندر آزاد بلوچستان دا جھنڈا لہرایا جان لگیا، سکولاں وچ پاکستانی قومی ترانہ پڑھنا ناممکن ہو گیا تے عملاً اوتھے بغاوت ورگی صورت حال بن گئی۔ پاکستان نال سانجھ وچ یقین رکھن والے بزرگ سیاستدان ویلے دے نال نال گھٹدے لگے گئے تے اوہناں دی تھاں آزادی پسند تے باغی گرپاں نے لے لئی۔ بلوچستان لبریشن آرمی ورگی تنظیم نے جنم لیا تے اپنے مقصداں نوں اگے ودھانا شروع کر دتا۔ اساڈے سیاستداناں نے وی شاید گل بات دی تھاں گولی نوں ای مسئلے دا حل سمجھ لیا۔ ایہہ انتہائی مہلک سوچ سی۔ بنگلہ دیش وچَ ’’گل دی بجائے گولی‘‘ دی کھیڈ کھیڈن والیاں نوں ایہدے توں سبق سکھ لینا چاہیدا سی پر نہیں سکھیا گیا۔
ہُن جے گوانڈھی تے دوست دیس وی بلوچ باغیاں نوں سہولتاں دیندے نیں۔ تاں اندازہ لایا جا سکدا اے کہ مسئلہ کنا سنگین ہو چکیا اے۔ ایہدے نبیڑے لئی پاکستان نوں لمے چراں تیکر جتن کرنے پین گے۔ ہتھاں دیاں ماریاں گنڈھاں دنداں نال کھولنیاں پیندیاں نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels