Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ایڈونچر آف عمران خان

ایڈونچر آف عمران خان

Wichaar Desk
December 1st, 2014

پیپلز پارٹی دے تاسیس دیہاڑ اُتے خطاب کردے ہویاں پارٹی دے آگو تے سابق صدر آصف علی زرداری ہوراں آکھیا کہ بھگیاڑاں نے اسلام آباد وچ تنبو لا لئے نیں۔ اوہناں نے آکھیا کہ چارمہینے دے سازشی ڈرامیاں نال جمہوریت دی کشتی نہیں کراواں گے، سیاستداناں نوں سنبھل سنبھل کے ٹُرنا پوے گا۔ انجے ای اسمبلی اراکین نال گل بات کردیاں پنجاب دے وزیر اعلیٰ شہباز شریف نے آکھیا کہ عمران خان نے سماج وچ نفرت دا زہر گھولیا اے، معیشت دی بربادی دے ذمے واراں، قرضے معاف کران والیاں قبضہ گروپاں تے کرپٹ لوکاں نال نواں پاکستان نہیں بننا تے نہ عوام عمران خان دی راتو رات اقتدار اُتے قبضے دی ناجائز خواہش پوری ہوون دین گے۔ ایس سلسلے وچ میر حاصل بزنجو نے آکھیا اے کہ عمران خان نے سیاست وچ خطرناک روایت پا دتی اے، دنیا وچ نگران حکومتاں دا کوئی تصور نہیں، جے عمران خان دی خطرناک روایت ٹُر پئی تے گل بہت دور تک جاوے گی، مستقبل وچ ن لیگ وی اوہناں نوں نہیں منے گی تے انج اک نہ مکنا سلسلہ شروع ہو جاوے گا۔
ایہہ تاں سیاسی آگوواں دے بیان سن، لوکاں دا ایہہ حال اے کہ تحریک انصاف دے جلسے وچ جاون والیاں نوں روکن لئی گڈیاں دی پکڑ دھکڑ دے خوف پاروں لوک پریشان نیں۔ لاری اڈیاں اُتے مسافراں دا رش اے تے کئی شہراں توں اسلام آباد جان والیاں سبھے مسافر گڈیاں دی بکنگ منسوخ ہو چکی اے جیہدے نتیجے وچ لوک اپنے معمول دے کماں سگوں خوشی تے غمی پاروں وی کدھرے جان جوگے نہیں رہے۔ جتھے تک اسلام آباد تے راولپنڈی دے واسیاں دا تعلق اے، اوہ اجے پرانے دھرنے دے زخماں نوں ای سیک رہے نیں۔ ساریاں ای سیاسی پارٹیاں جیہناں وچ عمران خان دی اتحادی ق لیگ تے اوہناں دی ’’کزن پارٹی‘‘ عوامی تحریک وی شامل نیں، اوہناں دا ساتھ دین توں آنے بہانے انکاری ہو چکیاں نیں تے انج اوہناں دا ایہہ جلسہ ون مین شو ای بن کے رہ گیا اے۔
ایس سارے کاسے توں لگدا اے کہ عمران خان ہوراں ماضی توں کجھ وی سبق نہیں سکھیا۔ ’’اوئے فلانے۔۔۔‘‘ آکھ کے حکومت توں نامطمئن لوکاں کولوں تاڑیاں وجوا لینا ہور گل اے جد کہ ملکی نظام چلانا اُکا وکھری گل اے۔ عمران خان جو چار حلقیاں وچ دھاندلی توں شروع ہوئے سن، بغیر کسے نِگر پروگرام دتے، سال دیڈھ مگروں ای حکومت نال انتظار کردے ، جس انداز نال ن لیگ دی حکومت چل رہی سی پنج سال پورے ہون مگروں اوہدا اوہی حال ہوندا جیہڑا پیپلز پارٹی دا ہویا، اوس ویلے عمران خان لئی سنہری موقع ہوندا کہ اوہ آون والے پنج سال اپنی مرضی مطابق حکومتی نظام چلاندے۔ اوہناں دے بے صبرے پن نے تیزی نال نامقبول ہوندی ہوئی ن لیگ نوں ای سیانپ عطا نہیں کیتی، ساریاں سیاسی جماعتاں سگوں کرپٹ لوکاں نوں اکمٹھ کر دتا تے اوہ مقابلے اُتے آن کھلوتے نیں۔ اجے وی موقع موجود اے کہ عمران خان انے رویے وچ لچک پیدا کر کے کسے طرحاں باعزت واپسی دا راہ بھال لین دھرنے دے بعد مستقل جلسے سوائے اوہناں دے غبارے وچوں ہوا کڈھن دے ہور کجھ نہیں کر سکن گے۔
(بشکریہ روز وار لوکائی)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels