Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سارک کانفرنس تے اوہدے بعد

سارک کانفرنس تے اوہدے بعد

جمیل احمد پال
November 28th, 2014

نیپال دی راجدھانی کھٹمنڈو وچ ہوون والی اٹھارویں سارک سربراہ کانفرنس اپنے انت نوں اپڑ گئی اے۔ ایہدے انت وچ اپنی گل بات اندر پاکستان دے پردھان میاں نواز شریف ہوراں آون والے سارک وفداں دی شکر گزاری دے اظہار دے نال نال ایس گل دا اظہار وی کیتا کہ اسیں پاکستان وچ 19 ویں سارک سربراہ کانفرنس وچ سربراہواں دی رلت دے منتظر آں۔ مہمان دیس نیپال دے وزیراعظم نے آکھیا کہ سانجھے چیلنجاں نال نبڑن لئی سربراہواں وچکار تعمیری گل بات ہوئی اے تے سبھ نوں قدم ودھانا ہووے گا۔ ایس سربراہ کانفرنس دے انتلے دن اختتالی تقریب وچ نواز مودی ملاقات وی ہوئی جیہدے وچ دوہاں نے ہتھ ملیا تے مسکاناں دے نال اک دوجے کارن نیک سدھراں دا اظہار کیتا۔ اودھر خارجہ دفتر دے ترجمان نے اپنی ہفتہ وار بریفنگ وچ ایس گل دی نندیا کیتی اے کہ سارک کانفرنس وچ پاکستان دے تحفظاں پاروں کجھ سمجھوتیاں اُتے دستخط نہیں ہو سکے۔
سارک اک بھرواں فورم اے جیہڑا دنیا دے اک اہم خطے وچکار لے دیساں وچ بڑا اہم کردار ادا کرن دے نال نال پوری دنیا وچ مثبت کردار ادا کر کے امن تے انسانیت دوستی واسطے فایدے مند ہو سکدا سی۔ بد قسمتی نال انج نہیں ہو سکیا۔ برصغیر دے دیساں وچ ونڈدے نال ای جیہڑے آپسی اختلاف تے دوریاں پیدا ہو گئیاں سن اوہ لگ بھگ ستر سال لنگھن بعد وی انجے دیاں انجے نیں۔ کدی کدی ایہناں وچ تھوڑی بہت کمی وی آئی اے پر مجموعی طور اُتے حالمندا ای رہیا اے۔ خطے دے نکے ملک جیویں مالدیپ بھوٹان تے نیپال وچکار جے کوئی اختلاف ہوندا تاں شاید ایہدا سارک اُتے اینا اثر نہیں پینا سی پر وڈے تنو دیس بھارت پاکستان تے بنگلا دیش دے آپسی دُپھیڑاں نے ایس علاقے نوں امن دا گہوارہ نہیں بنن دا۔ پاکستان تے بھارت وچکار دو وڈیاں تے نکیاں نکیاں کئی جنگاں ہو چکیاں نیں، دوویں دیس اک دوجے دی ویکھا ویکھ ہتھیاراں دے ڈھیر لائی جا رہے نیں تے ایٹمی طاقت بن کے اک دوجے نوں تڑھیاں لاندے رہندے نیں۔ بنگلہ دیش جیہنے پاکستان وچوں ای جنم لیا، اوتھے وی پاکستان بارے کوئی چنگی رائے نہیں پائی جاندی تے بنگلای اپنے دیس دی ازادی لہر سمے دیاں کڑتناں نظر انداز کرن نوں تیار نہیں۔ اوہناں دا موقف اے کہ اسیں پاک فوج دے کارے معاف تے کر سکدے آں پر ایہناں نوں بھل نہیں سکدے۔ پاکستان وچ ایہہ سمجھیا جاندا اے کہ بھارت نے اجے تیکر پاکستان نوں دلوں تسلیم نہیں کیتا۔
اجیہی صورت حال وچ سارک ورگا فورم جیہڑا بہت اہم فورم بن سکدا سی، نرا اک رسمی جیہیا فورم بن کے رہ گیا اے۔ ایہدے سربراہ اکٹھے ہوندے نیں تے سانجھا اعلامیہ جاری کر کے یاں کجھ رسمی سمجھوتیاں اُتے دستخط کر کے نکھڑ جاندے نیں۔ سارک ایہناں دیساں وچ امن لئی کوئی کردار ادا کرن جوگا ای نہیں۔ تجارتی معاملیاں وچ کوئی وڈی ٹورا کاری نہیں ہو سکی۔ یورپی دیساں وچکار ست ست سال تیکر جنگاں ہوندیاں رہیاں، اوہ سارے دیس جیہناں دے تعلقات مگر صدیاں دیاں کڑتناں موجود نیں، اپنے ماضی نوں نظر انداز کر کے اج ترقی دی خوشحالی دی راہ ٹُردے پئے نیں۔ ساڈے ایتھے تاں وڈی توں وڈی جنگ وی 17 دن ای چل سکی اے پر اوہدے اثرات اجے تیکر چھائے ہوئے نیں۔ یورپ ماضی نوں بھل کے مستقبل نوں بہتر بنا رہیا اے پر سارک دیساں نوں ایہو جیہا کوئی قدم چکن دی توفیق نہیں ہو سکی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels