Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> استنبول: خلافت عثمانیہ تے امریکی بلانڈاں

استنبول: خلافت عثمانیہ تے امریکی بلانڈاں

ڈاکٹر منظور اعجاز
November 24th, 2014

ایس واری پاکستان جاندیاں سوچیا جو عرب ایئر پورٹاں وچ مسکین پاکستان تے ہنگ بھریاں اکھیاں توں بچن لئی ٹرکش ایئر لائن تے سفر کیتا جاوے۔ اُنج ایہہ ای کھچ سی جو ٹرکش ایئر لائن دا کرایا وی دو تن سو ڈالر گھٹ سی تے اوہ چل وی میرے گراں واشنگٹن توں رہی سی۔ ایئر لائن دا استنبول تائیں دا سفر چنگا سی پر ایئر ہوسٹس مرد زنانیاں دے ورتارے توں پی آئی اے دی بڑی یاد آئی۔ پی آئی اے سٹاف وانگ ای چھیتی چھیتی کھانا کھوا کے ایئر ہوسٹس گپاں وچ لگیاں رہیاں تے مسافر کھان خصم دا سر۔ ترکی دی معیشت دے آنکڑے (اعداد و شمار) پاکستان نالوں کدھرے چنگے نیں پر پتا نہیں کیوں سفر دے ہر پیر تے لگا جو ترک سماج وچ پاکستان والیاں سبھ بیماریاں نیں۔
ساڈے اک ورلڈ بینک دے بیلی جیہڑے اکثر ہوائی سفر وچ ای بہتی زندگی گزاردے نیں کہندے ہوندے نیں کہ جو ہر ملک دے ایئر پورٹ راہیں اوس ملک دی حالت ویکھی جا سکدی اے۔ جے ایس فارمولے راہیں ویکھیا جاوے تے استنبول دے ایئر پورٹ بھیڑے پربندھیاں تے انارکی دا نمونہ سی۔ ہر پدھر دے سٹاف نال انگریزی وچ گل کرنا کندھاں نوں ٹکراں مارنا سی ایس لئی میرے استنبول وچ اک رات رہن دے مسئلے نوں حل کردیاں کئی گھنٹے لگ گئے جدوں میں ایک ٹیکسی ڈرائیور دے اڑکے چڑھ گیا تے پتا نہیں سی اگے کیہ ہوون وال ااے۔
میں اک ویب سائٹ آربٹرز توں ہوٹل بُک کروایا سی۔ ویب سائٹ وچ وکھائیاں تصویراں توں لگدا سی جو ایہہ چنگا بھلا فور سٹار ہوٹل اے تے ایہہ وی لکھیا سی جو تسیں ہوٹل دے کمریاں توں پورے شہر دانظارہ کر سکدے او۔ پر جدوں ٹیکسی والا رکشے ہار اندرون شہر دی بھیڑیاں تے ونگیاں ٹیڈھیاں سڑکاں توں لے جا رہیا سی تے مینوں یقین ہو گیا جو میں تاوان لئی اغوا ہو چکیا اں۔ خیر انج دا کجھ وی نہیں ہویا تے میں اک پُرانی تے بُسی ہوئی بلڈنگ دے ساہمنے اپڑ گیا۔ جیہنوں ہوٹل بنا کے فور سٹار دا درجہ دوایا گیا سی۔ اوس دے آل دوالے ٹُٹیاں بھجیاں کاراں دی پارکنگ لاٹ سی تے آل دوالے گلیاں وچ میلے انھیرے وچ ڈبے نکے نکے دفتر سن۔ انج سمجھو جو اندرون شہر دی کسے گلی نوں کمرشل بنا دتا گیا ہووے۔ ایہہ ہوٹل گھٹ تے نکیاں شہراں دی سراں بہتا سی۔
ٹیکسی ڈرائیور نے چُکن لگیاں مینوں بھروسہ دایا سی جو ٹیکسی دا کرایا ہوٹل والے دین گے تے مینوں بھا ،تا، کرن دی لوڑ ن نہیں۔ پر جدوں ہوٹل اپڑے تاں ڈرائیور مینوں فرنٹ ڈیکس تے کھڑے مینجر دے سپرد کر کے جھبدے غایب ہو گیا ۔ بکنگ دیاں لوڑیندیاں گلاں مُکا کے مینجر نے میرے کولوں ٹیکسی دے کرائے دے پنجاہ ڈالر دی منگ کیتی تے نال ایہہ وی کہہ دتا جو ایہہ بڑا رعایتی کرایا اے جیہڑا صرف ہوٹل والیاں نوں ملدا اے۔ میں کار کرائے تے لے کے شہر ویکھن دی اچھیا دسی تے مینجر صاحب نے اک ارشد نال دے نوجوان نوں سد لیا جیہڑا اوس ویلے قُلی توں لے کے بار اٹینڈر تیکر دے سارے کم بھُگتا رہیا سی۔ مینجر صاحب نے کہیا جو اُنج تے ٹیکسی بڑی مہنگی پوے گی ایہہ نوجوان اپنی ڈیوٹی شروع ہوون توں پہلاں مینوں بہت گھٹ پیسیاں وچ شہر گھما دیوے گا۔ اگلے دن ارشد صاحب نے ای مینوں دسیا جو مینجر نے ٹیکسی لئی میرے کولوں ویہہ ڈالر ودھ لئے سن جیہدا مینوں پہلوں ای بڑا چنگا اندازہ سی۔
ارشد صاحب نے شام توں ای میرے نال جان پچھان ودھانا شروع کر دتی۔ مینوں پچھن لگے جو کیہ اوہ امریکا جا کے کامیاب ہو سکدے نیں؟ فیر آپ ای دسن لگ پئے جو اوتھے اوہناں دی اک گرل فرینڈ اے جیہڑی اک امیر کاروباری امریکی دی دھی اے۔ اوہ ہر قیمت تے بلانا چاہندی اے تے جدوں میں امریکی دھرتی تے پیر دھراں گا تے میرے لئی گھر تے کاروبار دا بندوبست ہو چکیا ہووے گا۔ میں کہیا فیر تے تہانوں کوئی مسئلہ وی نہیں سو واری امریکا جاؤ۔ ایس تے پینترا بدل کے کہن لگا جو میں اپنے خاندان نال وی تے غداری نہیں کر سکدا نا تے میں کدی ترکی نوں نہیں چھڈ سکدا۔ میں کہیا فیر ایتھے ای رہوو جیہدے تے فیر کہن لگا پر اوہ وی تے بلا رہی اے نا۔ میرے خیال وچ اوہدی ساری کہانی من گھڑت سی پر ایہہ تُرکاں دے ذہن دا لشکارہ وی سی جیہڑے مغرب تے یورپ نال رلنا وی چاہندے نیں تے وکھرے وی رہنا چاہندے نیں۔
خیر ساری رات آل دوالیوں کُتیاں دے بھونکن تے روون دیاں اواز آندیاں رہیاں تے فیر سویر ویلے کُکڑاں دیاں بانگاں آون لگ پئیاں جیہڑیاں میں بڑے چر مگروں سُن رہیا ساں۔ ہُن میرا خیال اے جو پُرانے سماجاں تے مغرب وچ فرق رات نوں کُتیاں دے بھونکن دیاں اوازاں تے کُکڑاں دیاں بانگاں دا اے۔
دوجے دن ارشد ہوری مقرر کیتے وقت ہوٹل اپڑ گئے تے استنبول دیاں سرکاں تے گھماندے خرکاں تے سلطنت عثمانیہ دی مہانتا منواندے رہے۔ ارشد ہوری مذہبی بندے تے بالکل نہیں سن پر خلافت عثمانیہ نوں مُڑ کے لیاون لئی بڑے اُتاولے سن۔ اوہناں نوں پکا یقین سی جو یورپین یونین ترکی نوں ایس ڈر توں رلاوندی نہیں جو ترک اوہناں تے چھا جاون گے۔ ایس ترک نوجوان دے دل پشوری کرن والے بھلیکھے پاکستان وچ کھلرے سازشی نظریاں ورگے ای سن۔ اوہدے پاکستانی بھرا وی اپنی تان ایسے گل تے توڑدے نیں جو ساری دنیا اوہناں توں خوف کھا کے اوہناں نوں تباہ کرن پچھے لگی ہوئی اے۔
جدوں ارشد صاحب خلافت عثمانیہ دیاں وڈیائیاں کردیاں کردیاں ہف جاندے تے وچ وچ ایہہ وی کہندے جو اوہناں نوں امریکہ دیاں بلانڈ (ککے والاں والیاں) رناں، بڑا موہندیاں نیں۔ میں کہیا ویکھن نوں تے ترک زنانیاں وی چوکھیاں سوہنیاں نیں تے اوہناں وچ بہت ساریاں بلانڈ وی نیں پر اوہ کہندا ’’نہیں ترکی دیاں بلانڈاں وچ امریکیاں والیاں والا سواد نہیں۔‘‘ سو ارشد ہوری اسلامی خلافت اسلامیہ دی دوبارہ لیانا چاہندے سن تے امریکی بلانڈاں دے وی عاشق سن۔
مینوں پکا یقین اے جو ارشد صاحب مینوں تھوڑیاں جیہیاں سڑکاں تے ای فیر فیر گھماندے رہے۔ اتاترک تے محل تے بلیو مسجد توں وکھ اوہناں کجھ نہ وکھایا۔ شہر دے چارے پاسے خلافت عثمانیہ دے ویلے دیاں کندھاں تے محلاں دے تھٹھوا توں اندازہ ہوندا سی جو ترکاں نے عرباں نوں کیویں کیویں تے کنا کو لُٹیا ہووے گا۔ میں عرباں دی پاکستانیاں نال حقارت توں تنگ ساں پر ایتھے آ کے پتا لگا جو ترک تے عرباں دے وی حاکم رہے نیں تے اوہ غرور وچ اوہناں دے پیو نیں۔ اوہناں لئی تے پاکستان مسکیناں دے وی مسکین نیں (ترکاں لئی عرب مسکین نیں)۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels