Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سندھ دی ونڈ تے عمران خان

سندھ دی ونڈ تے عمران خان

جمیل احمد پال
November 22nd, 2014

لاڑکانے وچ جلسے نال خطاب کردے ہویاں تحریک انصاف دے کُرسی وان عمران خان نے آکھیا کہ سندھ نوں تقسیم نہیں ہوون دیاں گا۔ اوہناں نے آکھیا میں وعدہ کردا آں کہ جدوں تک سندھ دے لوک نہیں چاہون گے اودوں تک کالا باغ ڈیم نہیں بنے گا۔
عمران خان دی سوچ تے طریقہ کار نال اختلاف کیتا جا سکدا اے پر ایہہ گل سارے مندے نیں کہ اوہناں نے روایتی سیاستداناں توں کھرا راہ اپنایا اے جیہدے وچ جھوٹھے وعدے کرن دی کوئی گنجائش نہیں۔ سگوں اوہناں دے ناقداں دا خیال اے کہ اوہ سیاست دے بنیادی اصول یعنی دوست بنان دی تھاں دشمن پید اکرن دے ماہر نیں تے اوہناں نوں اجے تیکر سیاست کرنی نہیں آئی۔ کجھ وی ہووے، عمران خان دے لاڑکانے وچ دتے گئے بیان نوں تحریک انصاف دی پارٹی پالیسی سمجھیا جاوے گا تے سبھ نوں یقین اے کہ اوہ کدی وی سندھ دی ونڈن دی حمایت نہیں کرن گے۔
سندھ دی ونڈ سندھیاں واسطے جذباتی مسئلہ اے۔ سندھ دی دوجی وڈی سیاسی پارٹی ایم کیو ایم نے وی ایس سلسلے وچ محتاط طرزِ عمل اپنائی رکھیا اے۔ الطاف حسین دے مختلف بیاناں توں جتھے پنجاب تے پنجابیاں نال نفرت دی بو صاف محسوس ہوندی اے تے اوہ پنجاب وچ جڑاں تے حمایت نہ رکھن دے باوجود پنجاب دی ونڈ دے پر زور حمایتی رہی اوتھے اوہناں نے اکثر سندھ دی ونڈ نہ کرن دی گل وی کیتی۔ بیتے کجھ چر توں اوہناں نے قلا بازی کھاندے ہویاں سندھ دی ونڈ بارے مختلف بیان دتے تے کدی ملک اندر 20 صوبے بناون دی گل کیتی۔ اوہناں دے ایس بیان پاروں قدرتی طور اُتے سندھ اندر بے چینی پیدا ہو ئی۔ بلاول بھٹو ہوراں اپنیاں تقریراں وچ ایہدی مخالفت کیتی جد کہ سندھی قوم پرستاں نے ایہدے خلاف وکھالے کیتے۔
عمران خان دا بیان سندھیاں دے دل دی اواز اے۔ ایہہ نہیں آکھیا جا سکدا کہ اوہناں نے ایہہ بیان نرا سندھیاں دی حمایت لین لئی دتا اے۔ بھاویں اسی بیان نال سندھ اندر اوہناں دی حمایت وچ وادھا ہووے گا پر اسیں سمجھدے آں کہ ایہہ بیان عمران خان دے دل دی اواز تے سچائی اے۔
ایتھے اسیں ایس گل دا اظہار کرنا ضروری سمجھدے آں کہ پنجاب دی ونڈ دا شوشا وی ایم ایشوز توں قوم دیاں نظراں ہٹان واسطے چھڈیا جاندا اے۔ ایہہ جاگیرداراں تے لالچی سیاستداناں توں سوا کسے دا شوق نہیں، نہ ای عوامی سطح اُتے ایہنوں کوئی حمایت حاصل اے۔ ایم کیو ایم وی صرف ایس لئی ایہدی حمایت کردی رہی اے کہ پنجاب دی ونڈ دے بعد ایہنوں مثال بنا کے سندھ دی ونڈ کروا کے ’’اردو صوبے‘‘ دا خواب پورا کیتا جاوے۔
اسیں عمران خان ہوراں کولوں توقع کردے آں کہ اوہناں نے جیہڑے دو ٹوک لفظاں وچ سندھ دی ونڈ دی مخالفت کیتی اے پنجاب دی ونڈ دی مخالفت وی ایہو جیہے اکھراں نال کرن تے دس دین کہ اوہناں دی پارٹی عام لوکاں دی پارٹی اے جیہڑی جاگیرداراں تے وگڑے سیاستداناں دے ہتھاں وچ کھیڈن نوں تیار نہیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels