Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پاکستان وچ اینی سستی موت کیوں اے؟

پاکستان وچ اینی سستی موت کیوں اے؟

’’روز وار لوکائی‘‘
November 21st, 2014

سرگودھا دے ہسپتال وچ مرن والے بالاں دی تعداد وچ وادھا ہو گیا اے۔ جمعرات والے دن 3 ہور بچے ہلاک ہون د ے بعد جانہار بالاں دی کل گنتی 11 ہو گئی اے۔ وزیراعلیٰ پنجاب ولوں بنائی گئی 4 رکنی کمیٹی نے ہسپتال دے دورے سمے ایس گل اُتے سخت خفگی دا وکھالا کیتا کہ بال نرسری وچ غیر متعلق لوک آزادی نال آ جا رہے سن، جد کہ مختلف ہور کماں وچ وی مداخلت ہو رہی سی۔ کمیٹی دے دورے بعد فوری طور اُتے ایہہ کم بند کر دتے گئے۔
اکو ہسپتال اندر 48 گھنٹے دے اندر اندر 11بچیاں دی موت ایسا معاملہ اے جیہدے اُتے جنا وی ماتم کیتا جاوے گھٹ اے۔ ہسپتال جیہڑے شفا تے صحت ونڈن لئی ہوندے نیں، پاکستان اندر موت ونڈن لگ پئے نیں۔ ایہدے وچ کوئی شکل نہیں کہ ایس دیس وچ لوک کُتے بلیاں وانگوں موت دا شکار ہوندے نیں تے اوہناں واسطے صرف کمیٹیاں قائم کیتیاں جاندیاں نیں جیہناں دی رپورٹ دے بعد کاغذی کارروائی دے بعد معاملہ اپنی موت آپ مر جاند ے نیں۔
پاکستان جتھے ہوش گواؤ مہنگائی تے ہر پاسے اپنے جھنڈے گڈے ہوئے نیں، وڈی توں وڈی تنخواہ لین والے وی پریشان نیں کہ دو ویلے دی روٹی کیویں کھائیے تے بل کتھوں دئیے اوتھے موت اینی سستی اے جیہدی حد ای کوئی نہیں۔ کدی ٹائنو ورگے سیرپ نال، کدی تہواراں اُتے زہری شراب نال، کدی مذہبی بنیاد اُتے سنگسار کر کے، پُلس مقابلیاں وچ ، ٹریفک حادثیاں وچ تے ہور ہر طرحاں عزرائیل دا کم سوکھا کرن دے جتن ہر ویلے ہوندے رہندے نیں۔ پنجاب دے وزیر اعلیٰ اکثر اجیہیاں موتاں مگروں واردات یاں موقعے اُتے اپڑ کے افسوس وی کردے نیں تے مرن والیاں دے وارثاں واسطے لکھ دو لکھ، کدی پنج لکھ تے کدی ودھ دا اعلان فرما دیندے نیں۔ ایہہ تاں پنجاب دی گل اے، دوجے صوبیاں وچ انج دا عمل وی گھٹ ای ہوندا اے۔
پاکستان وچ سڑکاں بازاراں وچ موت بڑی سستی اے پر ہسپتالاں نوں کیہ ہونداجاندا اے؟ سرگودھا دے ہسپتال وچ جو ہویا اے، اوہ کسے مہذب دیس وچ ہویا ہوندا تاں ہُن تیکر بہت سارے لوکاں دی گردناں دوالے رسا ولھیٹیا گیا ہوندا۔ پر ایتھے ہسپتالاں وچ آکسیجن تے ساہ دواون دیاں مشیناں کم نہیں کردیاں، وینٹی لیٹر نہیں ہوندے، کدی جان بچاؤ دواواں نہیں ہوندیاں، اپریشن واسطے ضروری کٹ غایب ہو جاندے نیں تے کدی ڈاکٹر صاحبان کول ویلا نہیں ہوندا۔ ایہہ اوہ دیس اے جتھے ینگ ڈاکٹر کئی کئی دن ہڑتالاں کر کے کنے سارے مریض مار چھڈدے نیں تے اوہناں دے خلاف کارروائی دا کوئی اتا پتا نہیں لگدا۔ پیسے نہ ہوون پاروں لوک علاج توں محروم رہندے تے سسک سسک کے جان دیندے نیں۔
سوال ایہہ اے کہ کیہ ایہو اوہ پاکستان سی جیہدا سُفنا قائداعظم نے ویکھیا سی تے جیہدی خاطر لوکاں نے انگریز توں بغاوت کیتی سی؟ کیہ ایس ملک وچ سو فیصد لوکاں دا ضمیر مر گیا ہویا اے؟ جے نہیں تاں انج کیوں ہو رہیا اے؟


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels