Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کوٹ رادھا کشن دُکھانت:مذہبی جنون دا بھرواں نمونا

کوٹ رادھا کشن دُکھانت:مذہبی جنون دا بھرواں نمونا

(روزوار لوکائی) چاچا خاہ مخواہ
November 10th, 2014

کوٹ رادھا کشن وچ پیش آون والا واقعہ ایس دیس اندر دن بدن ودھ رہے مذہبی جنون دی بد ترین مثال اے۔ ایہنے اک پاسے ایس دیس اندر مذہبی رواداری رکھن والے سارے ای انساناں دے سر نیویں کر دتے نیں دوجے پاسے ایس گل دی تصدیق وی کیتی اے کہ مذہب دے ناں اُتے لوک تصدیق کرن دی زحمت وی گوارہ نہیں کردے۔ پاکستان اندر کسے وی بندے نوں قتل کروان لئی ایہہ الزام لانا کافی اے کہ ایہنے مذہبی بے آدری کیتی اے۔ باقی کم اپنے آپ ہو جاندا اے سگوں قتل ہون والے وی عبرت ناک ہوندی اے۔ مذہبی جنون وچ پھسے لوک نہ تے تصدیق دی کھیچل کردے نیں تے نہ ای ویکھدے نیں کہ اسلام دے ایس بارے حکم ہے کیہ نیں۔ بس جو ہتھ آیا، پھڑیا تے بغیر ویکھے اگلے نوں ’’جہنم‘‘ اپڑا چھڈیا۔
ساڈے ایس عمل پاروں سندھ وچ ہندو سہمے ہوئے نیں، بلوچستان وچ ہزارے والاں دی جان عذاب وچ اے، خیبر پختونخواہ دے کجھ علاقیاں وچ سکھاں کولوں جزیا کے لے وی اوہناں دی جان بخشی نہیں ہوندی رہی تے قادیانی ملک چھڈ کے نس رہے نیں جد کہ پورے پاکستان اندر عیسائیاں دی جان نوں خطرے نیں۔ ہور تے ہور مسلماناں دے مختلف فرقے آپو وچ وی اک دوجے توں محفوظ نہیں۔ شیعہ، سُنی، وہابی یاں دیو بندی، ہر اک نوں دوجے کولوں جان دا خطرہ اے۔ اک دوجے نوں شک شبے دی نظر نال ای نہیں ویکھیا جاندا، اوہوں کافر سمجھ کے واجب القتل وی سمجھیا جاند ااے۔ لاہور وچ جوزف کالونی دا مشہور واقعہ سبھ نوں یاد اے۔ عام کر کے زمین، جائیداد یاں فیر رُپئے پیسے دا جھیڑا ہوندا اے تے اوہنوں مذہبی مسئلہ بنا دتا جاندا اے۔ پاکستان وچ سارے غیر مسلماں نوں ہر مسلمان ایہہ تجویز دینا اپنا فرض تے ثواب سمجھدااے کہ ’’تسیں اسلام قبول کر لوو‘‘ تے جدوں کوئی غیر مذہب والا ایہو دعوت کسے مسلمان نوں دے بیٹھے تاں اوہدا قتل لازم اے۔
کوٹ رادھا کشن وچ وی روایتی طریقہ ورتیا گیا، بھٹھا مزدوری لوکاں دے جذبات وچ اُبال آ گیا، اوہناں نے عیسائی جوڑے دے گھر دا گھیراء کر لیا، عیسائی جوڑا دہشت زدہ ہو کے کمرے وچ بند سی پر کھوترنا شروع کر دتا تے چھت پاڑن مگروں مرن والے گھروں باہر آ کے اوہناں دے بد ترین تشدد دا نشانہ بنے۔ اوہناں نوں راہواں وچ گھسیٹیا گیا تے ادھموئی حالت وچ بھٹھے وچ دھکا دے کے ’’دوزخ‘‘ وچ پہنچا دتاگیا۔
ایس بارے اک عالم دین نے پریس کانفرنس وچ آکھیا اے کہ کوٹ رادھا کشن دا واقعہ بربریت تے سفاکیت دی انتہا اے، انج کرن والیاں نے نہ تے اسلام دی کوئی خدمت کیتی اے تے نہ ای پاکستان دی۔ اوہناں آکھیا کہ پاکستان دے سارے سوچ مکتبے تے مذہبی اگوائیاں کوٹ رادھا کشن وچ میاں بیوی نوں ساڑے جان دے واقعے دی بھریوں نندیا کردے نیں۔
ایدوں پہلاں ایہو جیہے ’’لوکائی انصاف ‘‘ دے ہور وی کئی واقعے ہو چکے نیں۔ گوجرانوالا دا کئی سال پہلاں واپرن والا واقعہ اجے وی لوکاں نوں یاد اے جدوں بلدے چلھے اُتے دودھ ڈلھن توں بچان لئی آئے، حافظ قرآن نوں مسیتاں وچ غلط اعلان کر کے لوکاں ہتھوں قتل کروا دتا گیا سی۔ لوکاں نے اوہنوں موٹر سائیکل مگر گھسیٹیا اگ لان دی کوشش کیتی تے وٹے مار مار کے قتل کر چھڈیا۔ انجے ای سیالکوٹ وچ دو بھراواں نوں وی ایسے طرحاں سنگسار کر کے رمضان مہینے وچ مار دتا گیا سی جدوں کہ اوہ دوویں روزے دی حالت وچ سن۔
ایہہ سارے واقعے اجیہے نیں جتھے مسئلہ مذہبی ہے ای نہیں سی۔ کوٹ رادھا کشن والے واقعے وچ قتل کیتے جاون والے عیسائی سن جد کہ گوجرانوالہ تے سیالکوٹ وچ تے مسلماناں نوں ای نشانہ بنایا گیا۔ عام کر کے ایہہ الزام لایا جاندا اے کہ مسئلہ مذہبی نہیں ہوندا پر جے اک فریق دا تعلق کسے اقلیتی فرقے یاں مذہب نال ہووے تاں دوجی دھر اوہدے اُتے مذہبی الزام لا دیندی اے جیہدے پاروں لوکاں دے جذبات اُبالا کھا جاندے نیں تے اوہ ’’فوری انصاف‘‘ کردے ہویاں اگلے نوں تسیہے دے دے کے مار دیندے نیں۔
ایہناں سارے واقعیاں مگر جیہڑی چیز بنیاد اے، اوہ لوکاں دامذہبی جنون اے۔ اسلام سوچ تے سمجھداری دا مذہب اے۔ جیہڑی چیز معقول تے متوازن نہیں، اوہ اسلام نہیں ہو سکدی۔ قرآن پاک وچ تھاں تھاں سوچ تے سمجھ تو کم لین دی تلقین کیتی گئی اے۔ بڑا واضح فرمان اے کہ جے تہاڈ ے کول کوئی خبر یاں گل آوے تاں اوہنوں اگے کھلارن توں پہلاں پوری طرحاں اوہدی تصدیق کر لئی جاوے۔ اک حدیث پاک مطابق جھوٹھے دی پچھان ای ایہو دسی گئی ا ے کہ اوہ کسے گل دی تصدیق کیتے بغیر اوہنوں اگے کھلاردا اے۔ ایہو جیہاں واضح ہدایتاں دے ہوندے ہویاں ایس ملک وچ انج دے واقعے مسلسل ہونا ایس گل دا ثبوت اے کہ اسلام اتے عمل نہیں کیتا جا رہیا۔
معمولی مطابق ساڈے رحم دل وزیر اعلیٰ جو ہر اجیہے واقعے دے بعد جا کے افسوس کردے تے روپئے لٹاندے نیں، اوہناں نے پنجاہ لکھ دے کے اپنے حاتم طائی ہوون دا ثبوت دے دتا۔
ایس واقعے دے نال پاکستان دی باہری دنیا وچ جیہڑی بدنامی ہوئی اوہ کسے کھاتے نہیں گئی کیوں جے ساڈے مذہبی جنونیاں واسطے دنیا دی عزت دی کوئی اہمیت نہیں۔ جتھے تک ایس گل دا تعلق اے کہ لوکاں وچ ایہہ جنون کویں پیدا ہوئے تے ودھدا چلا جا رہیا اے۔ ایہدے دوہ ای کارن نیں۔ اک تاں جہالت تے دوجا اوہناں دی برین واشنگ۔ لاؤڈ سپیکر اُتے مولوی دے بے لگام بولن توں لے کے نصابی کتاباں تیکر، پوری قوم دے ذہن وچ کٹ کٹ کے مذہبی جنون بھریا جا رہیا اے۔ دوجے مذہب والیاں دا زکر انتہائی بے آدر انداز نال لیا جاندا اے، اوہناں دے مذہب دا مذاق اُڈایا جاندا اے۔ جد کہ اوہناں کولوں آس کیتی جاندی اے کہ اوہ ایہدے اُلٹ طرز عمل اپناون۔ ایہہ گل پکی اے کہ جنا چر نصاب راہیں دوجے مذہباں خلاف نفرت کھلارن دا کارا جاری رہوے گا، معقول سوچ پیدا ہونی ممکن نہیں۔ نرا اسلام دا ناں لین نال لوکاں وچ مذہبی رواداری پیدا نہیں ہو سکدی، ایہدے لئی ڈونگھے تے دیر پا قدم چکنے پین گے۔ ایس سلسلے وچ چھیتی کجھ کرن دی لوڑ اے نہیں تاں ایہہ مذہبی جنون پاکستان دے مستقبل نوں خطرے وچ پا دیوے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels