Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> خادم اعلیٰ دے تیرھاں سرکاری دفتر

خادم اعلیٰ دے تیرھاں سرکاری دفتر

روہیل اکبر
October 29th, 2014
5 / 5 (1 Votes)

کسے بھکھے بندے نوں توں کسے نے پچھیا کہ دو تے دو جمع کنے ہوندے نیں تاں جواب ملیا کہ چار روٹیاں۔ اک اکھان ا ے یاں سچ کہ پاکستان دے موجودہ حالات نوں ویکھ کے ایہہ بالکل سچائی لگ رہی اے کہ پاکستان دی کل ابادی وچوں ادھی ابادی غربت دی لکیر توں تھلے حیاتی ہنڈا رئی اے تے اکثریت نوں ایہہ نہیں پتا کہ سید یوسف رضا گیلانی کس وجہ توں نااہل ہوئے سی جے پچھن تاں جواب ملدا اے کہ ملک وچ مہنگائی، غربت تے بجلی دی لوڈ شیڈنگ بہت ودھ گئی سی جیہدے تے جلسے جلوس تے عدالت نے اوہناں نوں سزا سنا کے گھر گھل دتا تے ہُن ایہہ قصے وی عام زبان تے نیں کہ پاکسان دے حکمران صرف لُٹ مار کرن لئی آندے نیں تے اپنی اپنی واری لے کے صبر شکر کردے نیں تے آپس وچ نورا کشتی کردے رہندے نیں۔ جد توں گیلانی صاحب سزا یافتہ ہو کے اقتدار توں فارغ ہوئے نیں اوس ویلے توں ہر سیاسی لیڈر نے اپنی دکانداری نویں سریوں چمکانی شروع کر دتی اے جد کہ اک مخدوم فارغ ہویا تاں اوہدی تھاں دوجا مخدوم آون والا اے تے ویکھدے نیں کہ جو سابقہ مخدوم نہ کر سکیا نواں مخدوم کیہ کرے گا۔ عوام تاں آئے دن غربت دے کھوہ وچ کھبی جا رہی اے۔ ایہناں مخدوماں نال کوئی واسطہ نہیں۔ اوہناں نوں تاں دو ویلے دی روٹی، مناسب روزگار تے لوڈ شیڈنگ دے عذاب توں نجات چاہیدی اے تے نہ مُکھ بدلن نال کجھ ہووے گا تے عوام ایسے طرحاں اوہناں دے جاون تے مٹھائیاں ونڈ دی رہوے گی۔ لمے چوڑے کوٹھیاں وچ رہن والے دو مرلے دے گھراں وچ رہن والے تن تن خانداناں دے بارے وی سوچن کہ جیہناں دی زندگی صرف بجلی، پانی تے گیس تے اے جو چوکھی مہنگی ہوون دے باوجود نہیں ملدی تے قیامت دی ایس گرمی وچ بچیاں دے نال نال وڈیاں دا وی مندا حال ہوندا اے۔ ساڈے سیاست دان ٹھنڈے کمریاں توں باہر نکلن لئی تیار نہیں۔ پاکستان دے سارے سیاست داناں سمیت ہر سرکاری افسر وی گرمیاں دے موسم وچ ٹھنڈی ہوا دے مزے لے رہے نیں تے جیہناں دے پیسیاں نال ایہہ سبھ عیاشیاں ہو رہیاں اوہناں لئی تاں ریلوے سٹیشن تے بس اڈیاں تے وی ٹھنڈے پانی دا کوئی پربندھ نہیں اے تے نہ ای حکومت دا ایہناں اڈیاں تے کوئی کنٹرول اے۔ بس مالک بھیڈ بکریاں وانگ مسافراں نوں ذلیل کردے نیں جد کہ پنجاب حکومت نے وی پبلک ٹرانسپورٹ دے ناں تے وچاری عوام نوں بے وقوف بنایا ہویا اے نکیاں ویگناں نوں بند کر کے ودیاں بساں شروع کیتیاں جو اینی وڈی ابادی لئی ناکافی نیں تے ایہناں بساں وچ مسافراں نوں کھڑے ہوون لئی وی تھاں نہیں ملدی تے ساڈے سیاستدان ای سوچاری عوام دے ناں تے الیکشن لڑدے نیں۔ جمہوریت دا گیت گاند ے باہر جا کے غریب عوام لئی مالی مدد لیندے نیں تے فیر ایسے غریب عوام دے نال ہتھ کر دیندے نیں۔ سبھ کجھ اپنے مفاداں لئی ورتدے نیں لُٹ مار نال پاکستان تے اوہدی غریب عوام دا مستقبل تاریک بناون توں بعد اپنیاں آون والیاں نسلاں دا وی مستقبل محفوظ بناندے نیں تے جدوں بے عزت ہو کے اقتدار دے ایواناں توں نکلدے نیں تاں فیر واپس آ کے عوام دے خیر خواہ بن جاندے نیں ملک تے قوم دا خون چوسن والیاں ایہہ جوکاں اپنی اپنی واری دی اُڈیک بڑی شدت نال کردیاں نیں جدوں ایہہ بلاواں اقتدار وچ ہوندیاں نیں تاں ایہہ خونخوار ہوندیاں نیں جدوں اقتدار توں باہر ہوندیاں نیں تاں فیر اپنی واری دی اُڈیک وچ اپنے دند تیز کر دیاں نیں۔ ایہناں لُٹیرے ڈاکوواں نے ملک نوں ایس حد تے اپڑا دتا اے کہ اج ملک وچ 22 گھنٹے بجلی غائب رہندی اے، سی این جی دی چھٹی ہو جاندی اے۔ کدی پٹرول غائب تاں کدے آٹا تے چینی۔ اج تیک ایہناں حکمراناں دیاں عیاشیاں بند ہو سکیاں۔ سیاستداناں دے نال نال ایس ملک نوں تباہ کرن وچ افسر شاہی دا وی بہت وڈا ہتھ اے۔ اپنے پڑھنہاراں نوں ایہہ دسدا جاواں کہ پنجاب دے خادم اعلیٰ نے وی عوام نوں کافی بے وقوف بنایا ہویا اے جیہدا ویروا کجھ انج اے کہ خادم اعلیٰ پنجاب نے اپنے شاہانہ خرچیاں لئی ایس ویلے تیرھاں دفتر بنائے ہوئے نیں۔ جیہناں اُتے مہینے دا لکھاں روپے خرچ کیتے جاندے نیں۔ جیہناں وچوں ایس ویلے لاہور وچ یارھاں دفتر نیں جد کہ اک اسلام آباد تے مری وچ قائم اے۔ جیہناں اُتے مہینے دے لکھاں روپے فضول خرچ کیتے جاندے نیں۔ لاہور وچ ایس ویلے جو یارھاں دفتر بطور وزیراعلیٰ آفس کم کرن دے نال نال رائے ونڈ، یاد گار، مال روڈ، کلب روڈ، میکلوڈ روڈ، سول سیکرٹریٹ، پنجاب اسمبلی، پنجاب ہاؤس مری، پنجاب ہاؤس اسلام آباد تے ماڈل ٹاؤں شامل اے جتھے ملازم تے دفتراں دے خرچیاں اُتے ماہانہ لکھاں روپے لُٹائے جاندے نیں جد کہ یادگار گراؤنڈوچ بنائے گئے ٹینٹ آفس دا سارا انتظام کرائے تے قائم کیتا گیا سی۔ ایہہ تاں خادم اعلیٰ پنجاب دے نظر آون والے کم ہن جد کہ لگیاں ہوئیاں کارروائیاں دا فیرذکر کراں گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels