Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> شاہ حسین کالج نوں ختم نہ کیتا جاوے

شاہ حسین کالج نوں ختم نہ کیتا جاوے

جمیل احمد پال
October 27th, 2014

پنجابی حلقیاں وچ ایہہ خبر بہت تشویش نال سُنی گئی کہ پنجابی سیوکاں ولوں قائم کیتے گئے شاہ حسین کالج نوں بند کرن دی سازش کامیاب ہو رہی اے۔ شاہ حسین کالج جو 1970ء دے دہاکے وچ عظیم صوفی دے ناں اُتے قائم کیتا گیا سی، اپنے پہلے دن توں ای دشمناں دیاں نظراں وچ رڑکدا رہیا اے۔ ایس کالج نے پنجابی زبان تے پنجابی لہر نوں روشن خیالی دے دور وچ لے آندا سی تے جتھے ایہدے وچ مان جوگ پنجابی سوجھواناں نوں پڑھان دا مان ملیا، کالج وچ پڑھ کے نکلن والیاں نے وی زندگی دے ہر کھیتر وچ اپنی ہوند دا ثبوت دتا۔
پیپلز پارٹی دے سبھ توں پہلے دور وچ جدوں بھٹو حکومت نے تعلیم نوں قومیاون دی پالیسی اپنائی تاں ستمبر اکتوبر 1972ء وچ ایہہ کالج وی سرکاری تحویل وچ لے لیا گیا۔ ایہدے نتیجے وچ ہور سرکاری اداریاں وانگ ایس کالج دی بربادی دا عمل وی شروع ہو گیا۔ کالج دے موڈھی پروفیسراں نوں ٹرانسفر کر دتا گیا تے مختلف بہانیاں نال کالج نوں بند کرن دے جتن ہوئے جیہناں دی پنجابی سیوکاں ولوں بھرویں نابری کیتی گئی۔ رُلدا کھلدا کالج کسے نہ کسے انداز نال چلدا رہیا پر ہُن ایس کالج نوں بند کرن لئی ایہہ چال چلی جا رہی اے کہ ایہنوں ٹاؤن شپ وچ موجود وڈے کالج وچ ضم کیتا جا رہیا اے۔ انج کالج دا وجود مُک جاوے گا۔
ساڈی حکومت واسطے تعلیم تے صحت دے شعبے سبھ توں غیر اہم نیں جس پاروں ایہناں دی بربادی واسطے ہر قدم چکیا جا رہیا اے۔ کالج نوں دوجے کالج وچ ضم کرن واسطے جیہڑا بہانا لیا گیا اے اوہدے مطابق کالج وچ پڑھیاراں دی تعداد ڈیڈھ سو دے لگ بھگ اے جد کہ 11 پروفیسر نیں۔ کیہ پورے پنجاب وچ صرف ایہہ کالج اجیہا اے جیہدے وچ طالب علماں دی گنتری اینی تھوڑی اے؟ ساڈیاں معلومات مطابق پنجاب اندر ای اجیہے کالج وی موجود نیں جتھے پڑھیاراں تے استاداں دی گنتی برابر دے لگ بھگ اے۔ تعلیم دا شعبہ منافع کمان لئی ہوندا پر ساڈی حکومت ایہنوں وی کاروبار وانگوں چلانا چاہندا اے۔ جتھے آئے دن ڈینگی دیہاڑ الیکشن ڈیوڈیاں تے انج دے ہور کاریاں وچ کالج استاداں دی بے آدری کیتی جاندی اے اوتھے حکومت آنے بہانے کالجاں تے سکولاں کولوں وی چھٹکارہ پاون لئی اُتاولی نظر آوندی اے۔
تعلیم کسے قوم دی بنیاد ہوندی اے پر ساڈی حکومت نے کدی ایس بارے سنجیدہ ہوون دی کھیچل ای نہیں کیتی نہ تے مادری زبان نوں تعلیم مادھیم مِتھ کے تعلیم دے فروغ دی بنیاد رکھی گئی اے تے نہ ای قوم نوں اپنی اصل، اپنے وسیب نال جڑت پھڑن دتی جاندی اے۔ ایس پچھوکڑ وچ شاہ حسین کالج دا انتظام اک کوڑھا جتن وکھالی دیندا اے۔ فضول تے نمایشی کماں اُتے ارباں روپے اڈا دین والی حکومت کالج نوں بند کر کے کنے کو پیسے بچا لوے گی؟ ظاہر اے بچت تے اک بہانہ اے، اصل مقصد عظیم صوفی شاعر دی شناخت نوں گواون واسطے اک نشان مٹانا اے۔
اسیں حکومت وڈیاراں کولوں منگ کردے آں کہ جے شاہ حسین کالج نوں بند کرن نال ای پنجاب دا بجٹ متوازن ہوندا اے تاں کم از کم شاہ حسین دے ناں نوں برقرار رکھیا جاوے۔ ٹھوکر نیاز بیگ وچ اُسارے جا رہے نویں کالج نوں شاہ حسین نال منسوب کردے ہویاں اوہدا ناں شاہ حسین ڈگری کالج رکھیا جاوے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels