Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ربڑی دودھ تے دہی بھلیاں والا صدر

ربڑی دودھ تے دہی بھلیاں والا صدر

جمیل احمد پال
October 13th, 2014

اگلے دن صدر مملکت ممنون حسین اپنیاں اکھاں دے معائینے لئی ملٹری ہسپتال راولپنڈی تشریف لیائے تاں اوہناں واسطے دو ہیلی کاپٹر ورتیجے۔ اک ہیلی کالپٹر وچ اوہ آپ سوار سن جد کہ دوجا پروٹوکول لئی سی۔ ویروے مطابق صدر وی راولپنڈی آمد سمے سڑکاں اک دن پہلاں ای بند کر دتیاں گئیاں سن۔ ریس کورس گراؤنڈ، پولو کلب تے ہور سڑکاں اُتے چڑی نوں وی پر نہیں سی مارن دتا جا رہیا تے پیدل چلن والیاں نوں وی روک لیا گیا۔ جنی دیر صدر ملٹری ہسپتال وچ موجود رہے، سخت سیکورٹی چھائی رہی جد کہ باہر صدر دی آمد پاروں متاثر ہوون والے لوک خوار ہو کے نعرے بازی کردے رہے۔ صدر دے پروٹو کول دا ملبہ وزیراعظم اُتے پے گیا تے گو نواز گو دے نعرے لائے گئے۔
پاکستان دے حوالے نال ایہو جیہا پروٹوکول شاید کوئی نویں چیز نہیں اے پر میڈیا صدقے لوکاں وچ اینی جاگرتی آ گئی اے کہ ہُن ایہو جیہیاں ڈرامے بازیاں دی گنجایش مکدی جا رہی اے۔ صدر مملکت عوامی نمائندہ نہیں ہوندا کہ ادھے لوکاں دی نفرت دا نشانہ ہووے۔ اوہ کوئی وی ہووے پور ے ملک دی لوکائی واسطے پیو دے بعد پیو دا درجہ رکھدا اے تے اوہنوں احترام دی نظر نال ویکھیا جاندا اے۔ پارلیمانی جمہوریت والے دیساں وچ صدر کسے سیاسی وچار دھارا وی نمایندگی نہیں کردے، غیر جانبدار ہوندے نیں تے پورے دیس دا احترام اوہناں لئی موجود ہوندا اے۔
پر پارلیمانی جمہوریت والے دیساں وچ صدر اجیہے پروٹوکول وی نہیں لیندے جیہو جیہے ساڈے صدر مملکت ہوراں نوں نصیب اے۔ بد قسمتی نال ساڈے ایتھے عام بندہ وی جدوں ’’حکمران‘‘ بندا اے تاں اوہدے مزاج وچ حکمرانی دی بد بو آ جاندی اے۔ اوہی صدر مملکت جیہڑے اک زمانے وچ ربڑی والے دودھ یا دہی بھلے پاروں معروف سن، صدر بنے تاں عام بندے نوں فخر دا احساس ہویا کہ ملک دا صدر ساڈے وچوں تے ساڈے ورگا اے۔ پر جدوں اوہناں دے اکھاں دے معائینے لئی دو دو ہیلی کاپٹر ورتیجن لگ پین تاں لوکاں نوں دُکھ دا احساس ضرور ہووے گا۔ پر ایہدے نالوں وی ماڑی گل لوکاں دے راہ ڈکے جانا اے۔
ساڈے حکمراناں نوں احساس نہیں کہ جدوں اوہناں عام بندے دا راہ ڈکیا جاندا اے تاں حکمراناں خلاف کئی نفرت پیدا ہوندی اے۔ عام بندے اپنے ضروری کماں لئی ایدھر اودھر جا رہے ہوندے نیں، بیماراں نوں ہسپتال لے جانا ہوندا اے کسے نے نوکری کسے نے تعلیمی ادارے جانا ہوندا اے، ایہہ سارے لوک اپنے اپنے کماں توں ڈکے جاند ے نیں۔ اک حکمران دے اکھاں وکھان کارن بہت سارے بیمار اکھاں وکھان توں رہ جاندے نیں۔ کیہ ساڈے حکمراناں دا خون اینا ای گاڑھا تے لوکاں دا خون اینا ای پتلا اے؟
صدر مملکت دی جان نوں کوئی اینا خطرہ نہیں کہ اوہناں واسطے پورا شہر تنگ کر دتا جاوے تے لوکاں دی زندگی عذاب بنا دتی جاوے۔ حکمراناں نوں احساس ہونا چاہیدا اے کہ لمے چوڑے پروٹوکول پاروں اوہناں دی دھون دا سریا تاں شاید ہور سدھا ہو جاندا ہووے پر لوکاں دے دلاں وچ جیہڑی نفرت پیدا ہوندی اے اوہ لازوال ہوندی اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels