Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ایہہ وی آئی پی نیں کہ بدمعاش؟

ایہہ وی آئی پی نیں کہ بدمعاش؟

جمیل احمد پال
October 10th, 2014

صوبائی راجدھانی وچ سابق وزیراعظم دے سپتر عبدالقادری گیلانی دے سیکورٹی گارڈ نے ڈیفنس دے 23 ورھیاں دے پڑھیار طاہر ملک نوں گڈی اوور ٹیک کرن دے جرم وچ گولی مار کے قتل کر دتا۔ مقتول عید دے تیجے دیہاڑ اپنے بھرا نال موٹر سائیکل اُتے گوشت ونڈن نکلیا سی۔ غازی روڈ اُتے عبدالقادر گیلانی دا سکواڈ وی لنگھ رہیا سی۔ مقتول دے بھرا مطابق سپیڈ بریکر اُتے گڈی ہولی ہوئی تاں طاہر نے گیلانیاں دی گڈی نوں اوور ٹیک کر لیا جس پاروں عبدالقادری گلیانی دے راکھیاں نے اوہنوں گولی مار دتی۔ مقتول چار بھین بھراواں وچوں دوجے نمبر اُتے سی تے بی کام دا پڑھیار سی۔ گولی مارن والے محافظ دے احمقانہ بیان مطابق اوہنے مقتول نوں دور رہن دا اشارہ کیتا پر اوہ نیڑے آ گیا جس پاروں میں مشکوک سمجھ کے فائرنگ کیتی۔
ساڈے وی آئی پی نت دیہاڑ کوئی نہ کوئی اجیہا ’’کارناما‘‘ سر انجام دیندے رہندے نیں جس پاروں لوکائی دے زخماں اُتے لون بروریا جاندا اے۔ ایہناں لئی گڈیاں، جہاز لیٹ کیتے جاندے نیں، سڑکاں کئی کئی گھنٹے بند رکھ کے ایمبولینساں وچ مریض مار دتے جاندے نیں تے کئی وار رکشیاں وچ سوانیاں بچے جنم دے دیندیاں نیں۔ جے کوئی ایہناں دی گڈی نال ریس لاون دا جرم کرے تاں اوہدے اُتے فائرنگ کر کے اوہدی اوقات دس دتی جاندی اے۔ عبدالقادر گیلانی دے گارڈاں ولوں ایہہ تازہ واردات وی ایسے سلسلے دا اک روپ اے۔
ساڈے حکمراناں دے اندر حکمرانی دی جیہڑی بدبو رچ چکی اے اوہ چھیتی کیتیاں نکلن والی نہیں۔ ملتان دے پیرزادے خاندان وچ چار سال حکمرانی کرن دے بعد ایہہ بو ہور وی ودھ چکی اے جس پاروں اوہ بندے نوں بندہ سمجھن دی حس توں معذور ہو گئے ہوئے نیں۔ اوہناں کولوں اینا وی برداشت نہیں ہوندا کہ سڑک اُتے جاندا کوئی بندہ اوہناں دی گڈی نوں اوورٹیک وی کر جاوے تے جے کوئی انج دا جرم کردا اے تاں اوہدی سزا گولی اے۔ قانون وی ایہناں دے پیو دی ملکیت اے جس پارں و وڈے وڈے جرم کر کے مکھن وچوں وال وانگوں نکل آوندے نیں۔
گارڈ دا بیان ہور وی احمقانہ اے۔ اوہ سڑک عبدالقادر گیلانی دے پیو دی ملکیت سی یاں دادے دی؟ جتھوں کسے نوں لنگھن دا حق نہیں سی۔ کیہ ہرمشکوک بندے نوں گولی مار دینی چاہیدی اے؟ گولی وی سدھی۔ کیہ ہوائی فائرنگ کر کے ’’مجرم‘‘ نوں وارننگ دے دینا کافی نہیں سی؟
جے ایس ملک وچ قانون ناں دی کوئی چیز ہے تاں فوری انصاف کیتا جانا چاہیدا اے۔ اسلام دے قانون دے مطابق گولی دا بدلا گولی ای ہوندا اے۔ خیال رکھیا جاوے کہ ایہہ کیس وی ٹڈاپ کیس نہ بن جاوے تے مجرم بچ کے نکل جاون۔ ایس معاملے وچ خون وگائی دین دی وی اجازت نہیں ہونی چاہیدی کہ بے گناہ دی لاش دا مُل پا کے جان چھڈا لئی جاوے۔
حرام دی دولت تے طاقت دے نشے وچ انھے ہون والے وڈیاراں نوں ایہہ یقین رکھنا چاہیدا اے کہ اوہناں دیاں خرمستیاں ساریاں حداں ٹپ چکیاں نیں تے چھیتی ای اوہ ویلا آون والا اے جدوں ایہناں دے منحوس چہریاں اُتے چھتر مارن گے تے فیر ایہناں نوں لُکن دی تھاں وی نہیں ملے گی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels