Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> دھرنے تے سہکدی ہوئی ملکی معیشت

دھرنے تے سہکدی ہوئی ملکی معیشت

جمیل احمد پال
October 4th, 2014

ٹریڈ ڈویلپمنٹ اتھارٹی آف پاکستان دے چیف ایگزیکٹو نے فیصل آباد وچ گل بات کردے ہویاں آکھیا کہ دھرنیاں کارن ملکی معیشت نوں زبردست نقصان ہویا اے تے سیاسی جماعتاں نوں ایہدے اُتے قابو پاون لئی سنجیدہ جتن کرنے ہون گے۔ اوہناں نے ہور آکھیا کہ ویت نام دی 9 کروڑ آبادی دیاں برآمدات ڈیڈھ سو ارب نیں جد کہ ساڈی 20 کروڑ آبادی دیاں صرف 25 ارب، جد کہ جولائی اگست وچ دھرنیاں تے ہور کارناں پاروں ایہہ برآمدات ہور گھٹ گئیاں نیں۔
پاکستان دی آئی سی یو وچ رکھی ہوئی معیشت نوں ہمیشہ ای مسائل دا ساہمنے رہی ااے۔ دھرنے تاں ملکی تواریخ وچ اک واری دتے گئے نیں، باقی 67 سالاں وچ ہور مسائل نے ای ملکی معیشت نوں سر چکن نہیں دتا۔ بھارت نال مسلسل دشمنی دی فضا تے جنگاں دے نال نال اسلحہ اکٹھا کرن دا جنون، ایس توں وکھ سیلاب، زلزلے تے ہور قدرتی آفتاں وی معیشت دی تباہی دا کارن بندیاں رہیاں نیں۔ بیتے دس کو سالاں وچ رہی سہی معیشت نوں جس چیزنے تباہ کیتا، اوہ بجلی تے گیس دی لوڈ شیڈنگ اے جیہدے پاروں وڈی تباہی پھر گئی اے۔ نہ کارخانے چلدے نیں، نہ کجھ برآمد ہوندا اے تے نہ ای مزدور نوں روزگار ملدا اے۔
ایہہ سارے عوامل اپنی تھاں پر جیہڑی چیز نے معیشت دا جنازہ کڈھ کے رکھ دتا اے، اوہ اے نت دیہاڑ ودھدی ہوئی کرپشن کردا اے سگوں ہُن ایہنوں مندا سمجھیا ای نہیں جا رہیا۔ اج پاکستان دی گنتی اوہناں دیساں وچ ہون لگ پئی اے جتھے کرپٹ ترین لوک موجود نیں۔ ایسے پاروں معیشت دی کوئی تند سدھی پیندی نظر نہیں آوندی۔
دھرنے، سیلاب، زلزلے تے ہور قدرتی آفتاں اپنی تھاں، جے اسیں دم توڑدی معیشت نوں سہارہ دینا اے تاں سبھ توں پہلاں لوڈ شیڈنگ تے کرپشن اُتے قابو پانا پوے گا جیہدے بغیر ڈاواں ڈول معیشت وچ کوئی سدھار نہیں آ سکدا۔ لوڈ شیڈنگ ختم کیتے بغیر ساڈے کول کیہڑی شے اے جیہڑی برآمد کرن لئی موجود ہو سکدی اے؟ ایس لئی حکومت تے حکومتی نمائندیاں نوں سارے الزام دھرنے تے قدرتی آفتاں اُتے سٹ کے چین دی نیندر سون دی تھاں اصل بیماری دا علاج کرنا چاہیدا اے۔۔۔۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels