Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کالا باغ ڈیم بہت ای ضروری اے

کالا باغ ڈیم بہت ای ضروری اے

ریاض احمد چودھری
October 3rd, 2014

بجلی دی ودھدی ہوئی لوڈ شیڈنگ تے زراعت لئی پانی دی تھوڑ دی انتہائی خراب صورت حال وچ ساڈے نامور ماہراں کالا باغ ڈیم دی تعمیر نوں ملک دی بقا لئی بہت ای ضروری قرار دتا اے تے آگاہ کیتا اے کہ فوری تعمیر شروع نہ ہوون دی صورت وچ غربت تے بھُکھ ملک دا مقدر بن جاوے گی۔ کالا باغ ڈیم نہ بنن دی وجہ توں ملک نوں سالانہ 132 ارب رُپئے دا نقصان ہو رہیا اے۔ سندھ طاس وائرس کونسل پاکستان دے چیئرمین تے ورلڈ واٹر اسمبلی دا چیف کوارڈینیٹر نے کہیا اے کہ بھارت آبی منصوبیاں تے سالانہ 38 ارب ڈالر خرچر کر کے پاکستان نوں 2015ء تیکر صحرا تے ریگستان وچ تبدیل کرن دی منصوبہ بندی کر چکیا اے۔ امریکہ اسرائیل سمیت کئی ملک پاکستان دی تباہی دے منصوبے وچ ایہدی مکمل پُشت پناہی کر رہے نیں بھارت ست نویں ڈیم وی شروع کر چکیا اے۔ بھارت پاکستان آون والے دریاواں دا پانی روکن دے منصوبیاں تے انتہائی تیزی نال عمل کر رہیا اے تے افسوسناک گل ایہہ اے کہ سادی کرپٹ اسٹیبلشمنٹ تے پاکستان دے کجھ لُکے ہوئے لوک بھاری ڈیل ہیٹھ بھارت نوں ایہہ ملک دشمن منصوبے پورے کرن دا موقع دے رہے نیں۔ بد قسمتی نال ایہہ سیاستداناں تے بیورو کریٹس نوں کالا باغ ڈیم نہ بنن دی وجہ توں پیدا ہوون والے مسئلیاں دا کوئی اندازہ نہیں۔
کوئی ڈیم دی تعمیر نال نوشہرہ دے ڈُبن دے خطرے نوں جواز بنائی بیٹھا اے تاں کوئی لسانی تے علاقائی مسئلیاں وچ گھریا ہویا اے۔ حالاں جے ماہراں د اکہنا اے کہ نوشہرہ ڈیم نوں 150 فٹ اُچا اے ایس لئی ایہنوں کوئی خطرہ نہیں۔ ڈیم نال صرف پنجاب نوں نہیں خیبر پختونخواہ نوں وی فائدہ ہووے گا۔ اوتھے اٹھ لکھ ایکڑ فُٹ زمین وی کاشت ہووے گی۔ جیہدے نال صوبے وچ غربت گھٹ ہووے گی۔ کالا باغ ڈیم راہیں بجلی صرف 1.02 روپے فی یونٹ قیمت تے مل سکدی اے۔ دنیا بھر وچ آبی ذخیریاں دے ماہراں تے پاکستان وچ ڈیمز دے ماہراں نے حکمراناں نوں خبردار کیتا اے کہ جے ڈیم تعمیر کیتے گئے ہوندے تاں پاکستان بارشاں تے سیلاب دے ایس پانی نوں نہ صرف آئندہ کئی ورھیاں تیک زرعی مقصداں لئی سٹور کر سکدا اے سگوں ایہہ تباہی تے بربادی وی نہ آندی۔ ایس پانی نال عوام نوں سستی بجلی وی ملدی رہندی۔ پتا نہیں سندھ نوں کالا باغ ڈیم بنن تے کیوں اعتراض اے۔
کجھ سندھ لیڈر ایس مخالفت وچ پیش پیش نیں جیہناں کول ایہدی مخالفت دا کوئی تسلی بخش جواب نہیں۔ جدوں منگلا تربیلا ڈیم بن رہے سن تاں ایہی لوک ایس ویلے وی رولا پا رہے سن۔ پر دوویں ڈیم بن جاون توں بعد سندھ نوں ملن والا پانی دُگنا ہو جاوے گا تے کالا باغ ڈیم بنن توں بعد سندھ نوں ملن والے پانی وچ ہور وادھا ہووے گا۔ تے سندھ دا بہا وی جاری رہوے گا۔ کالا باغ ڈیم نہ بنیا تاں ایہہ سندھ تے پاکستان لئی خود کشی دے برابر ہووے گا۔ ڈیم دی تعمیر نال سندھ دے نال کوئی زیادتی نہیں ہووے گی۔ جے ڈیم نہ بنے تاں ساڈی زراعت تباہ ہو جاوے گی۔ ایہہ پاکستان دا نقصان اے یوں جے سندھ دی زراعت ختم ہو گئی تاں لوک بھُکھے مرن گے۔ ڈیم بنن نال مون سون دیاں بارشاں د اپانی ڈیم و چ سما جاوے گا۔ کتھے ایہدے توں چھے ہزار میگاواٹ بجلی پید اہووے گی تے انج وطن عزیز نوں لوڈ شیڈنگ توں وی نجات مل جاوے گی۔ واپڈ ادے حکام دا کالا باغ ڈیم دی تعمیر نال بے گھر ہوون والے افراد وی آباد کاری وچ اپنے تجربے نوں وی وروتوں وچ لیاون گے۔
آبادکاری دے ایس منصوبے تے پنج ارب تہتر کروڑ (پنج سو تہتر کروڑ) رُپئے صرف ہوون گے۔ ایس منصوبے تے عمل در آمد توں کئی اجیہے افراد وی ساڈھے بارھاں ایکٹر زرعی زمین دے مالک بن جاون گے ۔ جیہناں کول ایس وییل اک یاں ادھے ایکڑ دے نیڑے تیڑے زمین اے۔ ایہناں لوکاں نوں زمین ملے گی اوہ نہری نظام نال جُڑی ہووے گی۔ کالا باغ ڈیم دے متاثراں نوں اوہناں نوں موجودہ رہائش دے نیڑے ای نویں طرز دے پنڈاں وچ آباد کیتا جاوے گا۔ مجموعی طور تے 47 پنڈآباد کیتے جاون گے۔ جتھے بے گھر ہوون والے خانداناں نوں رہائشی پلاٹ وی ملن گے۔ پنڈاں دی آبادی لئی ضروری سہولتاں تے روزگار دے وسیلے وی حکومت دیوے گی۔
لوکاں نوں فنی تربیت دیاں سہولتاں بچیاں لئی تعلیم تے علاج معالجہ گندے پانی دے نکاس دا وی پربندھ ہووے گا۔ سیاست دان کالاباغ ڈیم دی مخالفت چھڈ دین۔ ایہہ تکنیکی معاملہ اے ایہنوں سیاسی نہ بناون۔ ایہنوں ماہراں اُتے چھڈ دتا جاوے۔ ملک بھر دے انجینئر تے ڈیماں دے ماہر ایس سلسلے وچ جو وی فیصلہ کرن گے اوہنوں قبول کر لیا جاوے۔ ڈیمز دی تعمیر بہت ضروری اے کیوں جے سیلاب دا جو تجربا قوم نوں ہویا اے ہُن اوہ دوبارہ اجیہا تجربہ برداشت کرن دی طاقت نہیں۔ نوائے وقت دے ایڈیٹر انچیف مجید نظامی نے کالا باغ ڈیم دی تعمیر دے حق وچ اواز چُک کے قومی سدھراں دی ترجمانی کیتی اے۔ رب واسطے ترقی دے ضامن کالا باغ ڈیم نوں متنازعہ بنا کے سیاست دی نذر نہ کرن۔
(شکریہ روز وار لوکائی)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels