Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> میکسیکو سٹی: اک ایہو جیہا شہر جتھے کوئی غصہ نہیں کریندا۔ میگن فرے

میکسیکو سٹی: اک ایہو جیہا شہر جتھے کوئی غصہ نہیں کریندا۔ میگن فرے

وچار ڈیسک
December 4th, 2017

میکسکو امریکہ دا ہمسائیہ اتے لاطینی امریکہ دا وڈا ملک ہے جس نوں ہسپانوی زبان بولن والا سب توں وڈا ملک آکھدے نیں۔ایتھے مڈھ قدیم توں ازٹیک تے مایا تہذیباں چلدیاں سن جس نوں میسو امریکہ رہتلی سلسلہ آکھیا جاندا ہے۔ جنج عراق وچ میسوپوٹامیا سی یا پنجاب نوں یونایاں پینٹا(پنج) پوٹامیا آکھیا سی اینج ہی میکسکو دے واسیاں نوں امریکہ دی قدیمی رہتل دا بوتھا منیندے نیں۔ سمندر پارپرانے ہسپانیہ (اندلس)یعنی پرتگال، سپین تے مراکش نال ایس دا پرانا سانگا کدوں توں ہے ایس دی آپدی کہانی۔اموی دور وچ عرب افریقہ ول آئے تے انہاں دا مورو(موری) بر براں نال ٹاکرا ہویا جنہاں دے رومناں نال جھیڑیاں دی تریخ وادھو سی۔انہاں مورواں نوں موری وی آکھیا جاندا ہے اتے موپلے وی اتے بربر تے ایہہ سن ہی۔انہاں پاروں عربی تے مادری زباناں دے ملن ورتن نال ہسپانوی یعنی سپینش زبان وڈی ہوئی۔فیر جداں مصری مملوکاں تے عثمانی ترکاں دے جھیڑے ودھے تاں مورواں نوں شکستاں ہوئیاں جس نوں گرناڈا دی فتح آکھدے نیں۔مورواں نوں سپین توں کڈھ ماریا پر ہسپانوی زبان تے ازٹیک رہتل ایس وچ وڑ چکی سی ۔16ویں صدی وچ سپین دے نویں حاکماں سمندر پار میکسکو تے قبضہ کیتا تے ازٹیک رہتل تے ہسپانوی زبان دے سانگے بہوں تگڑے ہوئے۔نوآبادیاتی فبضیاں وچ باہرلے تے اندرلے اک دوجے تے اثر پاندے نیں پر اکثر کوڑ تریخ لکھن والے کسے اک دھڑے ول ہو کے یک پکھی گل ہی کریندے نیں۔ازٹیک تے ہسپانوی ملن ورتن دا کیہہ اثر اج وی ہے ایس بارے بی بی سی تے اک لکھت چھپی ہے جس نوں تساں وی پڑھو۔
غصہ انسان دا سب توں وڈا دشمن ہے پر فیر وی تُسی ایس توں جان نہیں چھڑا سکدے۔ کدی نہ کدی تہانوں غصہ آہی جاندا ہے۔ پر کجھ شہر ایسے وی نیں جتھے غصے نوں بہت بُرا سمجھیا جاندا ہے۔ اوچی آواز وچ گل کرن نوں بھیڑا سمجھیا جاندا ہے۔ تسی ایہو سوچ رہے ہو گے کہ شاید لکھنؤ دی گل ہورہی ہے کیونجے لکھنؤ دے بارے وچ وی ایہو کجھ مشہور کیتا ہویا ہے۔ مشہوریاں تے ایہہ نیں پئی لکھنؤ والے گالہہ وی تمیزاں نال دیندے نیں(ویسے یوگی ادتیا ناتھ وی یوپی دا ہے اتے مایا دیوی وی۔پر لکھاری ایس بارے چپ)۔ پر ایس لکھت وچ لکھنؤ دی گل نہیں ہورہی ہے سگوں ایہہ ایہو جہے شہر دا ذکر ہے جو ست سمندر پار ہے۔ جی ہاں! میکسیکو سٹی دا ذکر ہورہیا ہے۔ میکسیکو سٹی وچ عوامی تھاواں تے تسی غصے دا مظاہرہ نہیں کرسکدے ۔ ایتھوں تک کہ کسی بحث نوں وی تہانوں خوش اسلوبی نال مکانا ہوندا ہے۔ میکسیکو وچ شراب دے نشے وچ دھت ہون والیاں دا رویہ قابو وچ ہونا چاہیدا ہے۔ میکسیکو سٹی وچ رہن والے بچیاں نوں شروع ہی توں اپنے جذباتاں نوں کنٹرول کرنا سکھایا جاندا ہے۔ ایتھے لوکاں دا خیال ہے کہ غصے نال تہاڈا اپنا ہی نقصان ہوندا ہے۔ ایتھے لوک غریباں دا خیال رکھدے نیں۔ جے اوہ لائن وچ کھڑے نیں تے اپنی واری نوں اڈیکدے نیں تے افراتفری نہیں مچدی۔ میکسیکو دے عوام دے رویے وچ تمیزاں نسل در نسل توں چلدی آرہیاں جے۔ میکسیکو وچ یورپی لوکاں دے وڑن توں پہلے ایتھے ازٹیک سلطنت ہوندی سی جو ایتھوں دی اخیری پردھان تہذیب وی سی۔ 1519 وچ سپین نے میکسیکو تے قبضہ کیتا تے فیر ازٹیک تے سپین دی تہذیب دے ملاپ توں ایتھے نویں رہتل جنمی۔ میکسیکو وچ سپین دی بادشاواں نے تِن سو سال تک حکومت کیتی پر فیر وی ایس شہر دی رہتل وچ سپین دا اثر ودھیا پر ایتھے آن والیاں نے میکسیکو دے مقامی لوکاں توں وی بہوں تہذیبی گلاں سکھیاں۔ اج کل اک اندازے دے مطابق ڈیڑھ کڑوڑ بندے ازٹیک رہتل دی مختلف قبائلی زباناں بولدے نیں۔ انہاں وچ پائی جان والی چاشنی باہرلیاں اپنائی ۔ مکدی گل ایہہ ہے پئی میکسیکو تے لمیرے چر تک باہرلیاں راج کیتا۔ ایتھے دی عوام حکمراناں تے پورا وساہ نہیں کھاندی۔ میکسیکو وچ جے تُسی کسی توں رستہ پچھو تے ایس نوں پتہ نہ وی ہوئے تے اوہ نہ کہندے ہوئے جھجھکدا جے۔ ایتھے لوکاں وچ کجھ برائیاں وی نیں پر خش مزاجیاں وادھو نیں۔ اوہ ایتھے آن والے سیاحاں نوں گھمن پھرن دا خوب موقع دیندے نیں۔ جے تہانوں زندگی وچ کدی موقع ملے تے میکسیکو چکر لانانہ بھلنا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels