Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> اسرائیل سعودی عرب،ایران تے لبنان:چکری سیاستاں تے نویں اتحاد

اسرائیل سعودی عرب،ایران تے لبنان:چکری سیاستاں تے نویں اتحاد

وچار ڈیسک
November 18th, 2017

کیہہ سعودی عرب تے اسرائیل وچ سانگے ودھ رہے نیں؟جے ایران تے روس وچ سانگے ودھ سکدے نیں تے ایہہ وی ہو سکدا ہے؟ پر لگدا ایہہ ہے پئی سعودی عرب لبنانی سیاستاں وچ اسرائیل دا بھار ورتنا چاہندا ہے اتے اسرائیل ایران مخالفتاں وچ سعودی بھار ورتن وچ لگیا ہے۔مڈل ایسٹ وچ ترکی، ایران تے قطر وچ سانگیاں پاروں سعودی عرب تے اسرائیل نیڑے آرہے نیں۔ایس نویں ڈیل وچ ٹرمپ دے یہودی جوائی دا ناںآ رہیا ہے جیہڑا سعودیاں دے نیڑے ہے۔پر ایس لئی اسرائیل نوں دو قومی فارمولے نوں منیندے ہوئے فلسطین نوں مننا پئے گا اتے سعودی عرب تے اوس دے اتحادی ملک جنج کویت، یو اے ای، بحرین وغیرہ اسرائیل نوں منن گے۔اینج دوناں ملکاں نوں انہاں بیانیے نوں چھڈنا ہوئے گا جیہڑے پچھلے50ورہیاں توں اوہ اپنے اپنے ملکاں وچ چلا رہے نیں؟ایہہ ایڈا سوکھا پینڈا نہیں۔سعودی عرب وچ جاری کرپشن مکاؤ مہم ایس دی تیاری جاپدی ہے۔سعد حریری دا استعفی حذب اللہ تے اسرائیل دی لڑائی دا دعوت نامہ سی پر اسرائیل ایس دانے نوں چغیا ہی نہیں۔ایہہ سب شامی محاذ دے ٹھنڈے پین توں بعدوں آون والے ویلے دے بندوبست دے جھیڑے اتے تیاریاں نیں جس وچ اہمیتاں اوس سمندری رستے نوں نیں جہیڑا رومی تے رتے سمندراں نوں بحیرہ ہند نال ملاندا ہے۔کیہہ ایس دی سانجھی راکھی ہن سعودیاں اتے سرائیلیاں تے آ رہی ہے؟ دوناں رل مل امریکہ تے یورپی مفاداں دے راکھے بنن گے؟ہن تساں بی بی سی دی ہشیار خبر پڑھو۔

اسرائیل دی فوج دے سربراہ نے آکھیا کہ اسرائیل سعودی عرب دے نال خفیہ معلومات دے تبادلے لئی تیار ہے کیونجے دونوں ملکاں دا سانجھا مفاد ایران نوں ڈکن نال جڑیاہے۔ برطانوی خبر رساں ادارے روائٹرز دے مطابق لیفٹینٹ جنرل گیڈی ائزنکوٹ نے پہلی وار عربی زبان دے اک آن لائن اخبار نوں انٹرویو دیندے ہوئے آکھیا ہے کہ اسرائیل دا لبنان وچ موجودہ حزب اللہ تنظیم تے حملہ کرن دا کوئی ارادہ نہیں ہے۔ سعودی عرب نے حالیہ دناں وچ ایران تے دباؤ ودھاندے ہوئے ایران تے الزام عائد کیتا ہے کہ اوہ عرب ملکاں وچ اپنا اثر و رسوخ ودھان لئی حزب اللہ سمیت مختلف جنگجو گروپاں نوں استعمال کررہیا ہے۔ کجھ دناں پہلے یمن توں ریاض دے ہوائی اڈے تے راکٹ دے ناکام حملے دی ذمہ واری وی سعودی عرب نے ایران تے عائد کیتی سی تے ایس نوں ایران ولوں سعودی عرب دے خلاف اعلان جنگ قرار دتا سی۔ ایران تے سعودی عرب دے درمیان ودھدی ہوئی کشیدگی پاروں بہوں سارے تجزیہ کاراں دے خیال وچ ایران توں مشترکہ دشمنی دی وجہ توں سعودی عرب تے اسرائیل وچ سانجھ ودھ سکدی ہے۔ سعودی عرب دا کہنا ہے کہ اسرائیل توں کسی قسم دے تعلقات صرف اسی صورت قائم ہوسکدے نیں کہ اسرائیل 1968 وچ قبضہ کیتے گئے عرب علاقیاں نوں خالی کردے۔ اسرائیل فوج دے سربراہ توں جداں ایہہ پچھیا گیا کہ سعودی عرب دے نال خفیہ معلومات دا تبادلہ ہویا ہے تے انہاں نے آکھیا اسی ایہہ معلومات فراہم کرن لئی تیار نیں تے جے ضرورت پنیدی تے دوناں ملکاں دے بہت سارے مشترکہ مفاد نیں۔ انہاں نے آکھیا کہ امریکہ وچ صدر ٹرمپ دی ایران تے دباؤ ودھان دے انتخابی وعدے تے کامیابی نے مشرق وسطی وچ نویں سیاسی صف بندی تے اتحاد بنان دا موقع فراہم کیتا ہے۔ اسرائیل دے شہر تل ابیب وچ ہون والے ایس انٹر ویو وچ جنرل ائزنکوٹ نے آکھیا کہ یران دے خطرے دا سامنا کرن لئی اک تگڑا دفاعی منصوبہ تیار کیتا جانا چاہیدا ہے تے دوجے عرب ملکاں نوں دفاعی خفیہ معلومات فراہم کرن نوں تیار نیں۔ حزب اللہ دے خلاف کاروائی دے بارے وچ اک سوال دے جواب وچ انہاں نے آکھیا کہ لبنان وچ حذب اللہ دے خلاف کوئی جنگی کاروائی دے بارے وچ اک سوال دے جواب وچ انہاں نے آکھیا کہ لبنان وچ حزب اللہ دے خلاف کوئی جنگی کاروائی کرن دا اسرائیل دا کوئی ارادہ نہیں ہے ۔پر اسرائیل اپنے خلاف کسی خطرے نوں برداشت نہیں کرئے گا۔ یاد رہے کہ اک ہفتے پہلے لبنان دے وزیراعظم سعد حریری نے سعودی عرب دے اپنے دورے دے دوران اچانک اپنے استعفی دا علان کردتا سی۔ لبنان دے وزیراعظم دے اچانک مستعفی ہون نوں وی خطے وچ جاری سعودی عرب تے ایران دے درمیان رسہ کشی نال جوڑیاں جارہیا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels